Titus 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Korende aye, kwana amang’ana ayagwenerete okworokereria kw’obogima.

2Abagaaka mbagwenerete babe aberiti, abare nogosika, aberendete ase onsi, babe abagima ase okwegena, na ase obwanchani, na ase oboremereria.

3Naboigo nabakungu abagotu babe norogendo rw’obochenu, tibaba abang’achi, gose abasomba ase okonywa edivai enyinge, korende babe aborokia b’ayare amaya,

4erinde borokererie abakungu abasubati banche abasacha babo, na abana babo.

5Naende babe aberendete ase onsi, abachenu, abagokora emeremo ase chinka chiabo, abaya, abaigwerete abasacha babo abanyene, erinde ring’ana ria Nyasae tiriramwa.

6Naboigo nabamura, obasorore babe aberendete ase onsi.

7Ase amang’ana onsi bweorokie aye omonyene koba ekiorokererio ki’ogokora okuya, na ase okworokereria kwao obe oyotagosaria, korende oyosikire.

8Ogokwana kwao kobe okw’obogima, okwo gotanyare gosoerwa, erinde omoengereria onde bwensi asooke, taba ne ring’ana riibe agokwana igoro yaito.

9Abasomba baigwere abanene babo ase amang’ana onsi, babagwenere, na tibaba abakobairaneria bobe,

10tibaba abaganga, korende baorokie obwegenwa obuya ase onsi, erinde ase amang’ana onsi ogokora kwabo kobe ekiorokererio ekiya gi’okworokereria kwa Nyasae, Omotooria oito.

11Naki obuya bwa Nyasae bwaorokigwe nogotooreka ase abanto bonsi.

12Obo nigo bogotworokereria okwanga amang’ana atari ay’obonyasae, na okogania okobe gw’ense eye, erinde tonyare kwerenda ase onsi, na koba noboronge amo ne chingencho chi’obonyasae ase ense eye ya bono,

13gatoganyete ogoikeranigwa kw’ogosemeria gosesenirie, na okooroka kw’obonene bwa Nyasae omonene, na Omotooria oito Kristo Yeso,

14oyobweruete omonyene ase engencho yaito, erinde atoboorie korwa ase ogosaria gwonsi, na gwesiberia ere omonyene abanto babe abaye, bare nomokia ase ogokora okuya.

15Kwana amang’ana aya, kurera, na gotogonyera nokobua gwonsi. Monto onde bwensi tagochaya.

← Chapter 1 Jump to: Chapter 3 →