Zechariah 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Naende Omonene akanyorokia Yoshua, omokuani omonene, oteneine ase obosio bw’omomalaika bw’Omonene, na Saitani oteneine ase ensemo ya borio ya Yoshua okomosoera.

2Erio Omonene agatebia Saitani, “Aye Saitani, inche Omonene ningotogonyere! Ee, inche Omonene nachorire Yerusalemu, ningotogonyere! Inee! Omonto oyo tari ekegenga giataboretigwe korwa ase omorero ime?”

3Bono Yoshua nigo ateneine ase obosio bw’omomalaika, obegete chianga chire ne riko.

4Erio omomalaika oria agachika abwo bateneineo ase okomokorera, akabatebia, “Morusie chianga echio chire ne riko.” Nyuma y’ayio omomalaika oria agatebia Yoshua, “Naama! Narusirie ebibe biao korwa asore, ninkobekere chianga chingiya chi’omoyega.”

5Erio inche ngateba, “Bono mobekere egetambaa ekerabu motwe.” Ase igo bakamobekera egetambaa ekerabu motwe na bakamobekera ne chianga chiria chingiya, ekero omomalaika oria bw’Omonene ateneineo.

6Erio omomalaika oria bw’Omonene akamoenekeria Yoshua, akamotebia,

7“Aya naro Omonene bw’Emeganda agoteba: Korabwatie chinchera chiane, na obwate aya nagochikeire, rirorio nogambere enyomba yane, na orende chiraaro chiane. Ninkoe ribaga ogochera asende amo nabwo bagonkorera aiga.

8Aye Yoshua, omokuani omonene, tegerera oigwe amang’ana aya, aye amo nabagisangio bao, abwo baikaransete ase obosio bwao, ekiagera abwo nabanto bare ekemanyererio ki’amang’ana agochigocha: Naama! Inche nintome omosomba one okorokwa Omoseboka.

9Rigereria, ase obosio bwa Yoshua nabekire rigena erimo; nareo amaiso atano na abere arigereretie rigena erio. Inche Omonene bw’Emeganda nigo ngoteba iga: Nimang’ere ase rigena erio ririko ririgwenerete, na nindusie ebibe bi’ense eye ase rituko erimo.

10Ase rituko erio kera oyomo oino narangerie oyomwabo ache, baikaranse komo inse y’emesabibu na emeko yaye.” “Nabo Omonene bw’Emeganda atebire.”

← Chapter 2 Jump to: Chapter 4 →