Zechariah 7

Gussi (EBIBILIA ENCHENU) 2020

← Chapter 6 Jump to: Chapter 8 →

1Ase rituko ria kane, omotienyi o kianda noro Kisilewi, omwaka o kane bw’okogamba kw’omoruoti Dario, ring’ana ri’Omonene rigacha asende inche Zakaria.

2Abanto ba Beteli konya batomire Sareseri, na Regemu‐Meleki, na abanto bande babo bagende gosaba Omonene, erinde banyore ogwancherwa korwa asare;

3boigo baborie abakuani b’enyomba y’Omonene bw’Emeganda na ababani. “Inee! Ntogenderere korera na kweng’ata ase omotienyi o gatano, buna twabeire togokora ase engaki y’emiaka emenge?”

4Erio ring’ana ri’Omonene bw’Emeganda rigacha asende, rigantebia,

5“Kwana nabanto bonsi b’ense eye, na abakuani, obaborie: Ekero mwarenge kweng’ata na korera ase kera omotienyi o gatano, na oyo o gatano na kabere, ase chingaki echi chionsi chi’emiaka emerongo etano na ebere, Inee, nigo mwarenge kweng’ata ase engencho yane?

6Na ekero mokoria na konywa, Inee, timori gokora ayio ase ogweisanekia inwe abanyene?

7“Inee! Amang’ana ayio agwenerete mono tari aro Omonene orenge gokwana goetera ase ababani ba kare, ekero ekio Yerusalemu omenyire nabanto, na igo orenge osesenirie ore nemechie yaye yayoetanaine, naende abanto bamenyete ase ense ya irianyi na ase ense omweya?”

8Naende ring’ana ri’Omonene rigacha asende inche Zakaria, rigantebia,

9“Omonene bw’Emeganda nigo agoteba iga: Monache ebina bia boronge, na kera omonto abe nobwanchani na amabera ase oyomwabo.

10Timokorera ababoraka bobe, gose chintakana, gose abamenyi bare ase egati yaino, gose abataka. Omonto tabaisa koroberia ase enkoro yaye akorere oyomwabo bobe.

11“Korende abanto bakaba abamwenu, bakaanga koigwera, bagaticha amato abo ng’a tibabaisa koigwa.

12Bagakong’ia chinkoro chiabo pa buna rigena rikorokwa elimasi ng’a tibabaisa koigwera amachiko na amang’ana ’Omonene bw’Emeganda atomete n’Omoika oye goetera ase ababani ba kare. Ase engencho eyio Omonene bw’Emeganda akaba nendamwamu enene.

13Omonene bw’Emeganda nigo agoteba iga: Buna koreng’ana barabwo bataigwerete ekero nabarangeretie, bono nainche tinkoigwa ekero barandangerie.

14Ase ayio nigo ndarente ekembugu‐mbugu mbasiarere gochia ase abanto b’ebisaku, abwo batabamanyeti. Ense eye egatigwa ere bosa, na omonto onde tarenge goeta ase egati yaye, gose koiranao, ekiagera ense eyio engiya nigo egotigwa ere bosa.”

← Chapter 6 Jump to: Chapter 8 →