Zechariah 9

Gussi (EBIBILIA ENCHENU) 2020

← Chapter 8 Jump to: Chapter 10 →

1Eri nering’ana rikong’u riakwanetwe n’Omonene igoro y’ense ya Hadaraki, riikere nonya nomochie o Damesiki. Amaiso ’abanto b’ebisaku amo nay’Abaisraeli nigo arigereretie Omonene.

2Boigo ring’ana erio riikere ense ya Hamati esinyaine na Damesiki, riikere na Turo na Sidoni, nonya abanto b’aroro bare abang’aini mono.

3Turo bweagacheire chiburi chinkong’u, naende osangereirie chindwenyi chie chifeta chinyinge buna orotu, ne chitahabu chinyinge buna eubi ere ase chinchera.

4Korende rora, Omonene nayoure chinibo chiaye, na atugute okobua kwaye ase enyancha, na omochie oyio omonyene nosambwe nomorero.

5Ekero Asikeloni orarore ayio, noiroke mono; Gasa boigo noro noiroke na goichana; naboigo n’Ekironi, ekiagera ogosemeria kwaye gwasirigwe. Omoruoti o Gasa nasirigwe, na abanto tibakomenya Asikeloni.

6Asidodi nomenywe nabanto batarochi inchera, na inche Omonene ninsirie kegima oboenenu bw’Abafilisti.

7Nindusie amanyinga ’ebing’wanso korwa ase emenwa yabo, na okogechia koria korwa ase amaino abo; na barabwo nababe abatigari ba Nyasae oito, nababe buna abagambi b’egesaku ki’Abayuda, abanto b’Ekironi nababe abatigari ba Nyasae oito, nababe buna abagambi b’egesaku ki’Abayuda, abanto b’Ekironi nababe buna Abayebusi.

8Erio inche Omonene nindende enyomba yane, erinde abarwani b’esegi tibabaisa goeterao gose koiranerao; na abachandi b’abanto baane tibabaisa gochao, ekiagera bono inche ninyerigererie namaiso aane.

9Inwe abanto ba Sayoni goka mono! Ee, inwe abanto ba Yerusalemu, aka eriogi ri’omochengo! Rora, omoruoti oino nkobachera are; ere nomonyene oboronge na omobui. Nigo are omokanyeku oriinete etigere, ee, oriinete emori y’etigere, akamori g’etigere.

10Ninsirie chigari chi’esegi korwa ase abanto ba Efraimu, ne chibarasi chi’esegi korwa Yerusalemu. Ninsirie na amata ’esegi. Omoruoti oyio nararerie abanto b’ebisaku omorembe. Obogambi bwaye nabobe korwa enyancha eyemo goika eyende, na korwa ase Orooche rwa Eufarati goika ase chinsinyo chi’ense.

11“Ase engencho y’amanyinga ’okobwatana okwo nakorire naye ninsibore abasibwa bao, mbarusie ase engoro etari namache.

12Inwe abasibwa more nogosemeria, irana ase eburi yaino. Ase rituko ria rero nigo nkobarareria inwe ng’a nimbae amaya ara kabere.

13Nakumbire Abayuda buna nkumbete obota bwane, naagirie Abaefraimu buna ensara ng’agetie ase obota bwane. Aye Sayoni, ninkore abana bao abamura babe buna amatimo, barwanerie abamura b’Abagiriki; ningokore obe buna omoro bw’omorwani esegi etuoni.”

14Omonene naoroke igoro y’abanto baye, ne chinsara chiaye chisoke buna okomesa gw’enkoba. Omonene Nyasae nabugie egetureri, achiche nekembugu‐mbugu gekorwa sugusu.

15Omonene bw’Emeganda nakengere abanto baye, barabwo mbasirie ababisa babo, batiringe amagena e chinduruche chiabo. Mbanywe batinde, baake amariogi, babe buna abanto batindire edivai. Mbaichorigwe buna ebitaabo bi’amanyinga ’ebing’wanso, na babe buna chikoona chi’egesasimero chiichire amanyinga.

16Ase rituko riria Omonene, Nyasae obo, nabatoorie, ekiagera nigo bare abanto be riicho riaye. Barabwo nigo bare buna amagena e rigori rinene abekire ase egutwa, akomeka‐meka na komoreka ase ense yaye.

17Ee, naki obuya bwaye na obosiani bwaye bore bw’ogokumia! Endagera yaye nenorie abamura baye bagirigente, na edivai yaye enyia nenorie abaiseke baye bagirigente.

← Chapter 8 Jump to: Chapter 10 →