Acts 2

hadiyya

← Chapter 1 Jump to: Chapter 3 →

1Shaashshiqqi Ugud afu ammanenne awwonaan hundim mateeyyoominne mat beyyonne wixxita'a hee'llo'o.

2Dangonnem malaayyaam hambu'llamisa gugoo sagar waaraa ixxuwwi afuutto'i mine hundoomannem wo'mmukko.

3Allabo laboo gii'l labannuwwim waaraa ixxuwwanne annannichchonnem baxxansamaa afuurukkuuyyi moo'llo'o.

4Keesammi Ayyaan hundannem dillukkaare oo Ayyaan wocisukkisa mulli suuminne wocimma asheetto'o.

5Yihuxxek Waa'ina gatto'oo keen uulli hundiinsim waatta'a Yerusaaleemanne hee'llo'o.

6Ixxuwwim ee sagara macceessa'a wixxito'o. Annannichchim ixxi gaqqi suuminne amma'nnaan woccu'uuyyi macceessa'a maalalto'o.

7Ixxuwwim lobakata maalalta'a «Ku woccam keen hundim Galii'l uulli mannayyonnihe?

8Neese annannichchim woncoommi ni gaqqi suuminne woccu'uuyyi macceensoommok kuk hinkido'i woshsha?

9Neese Phaarte'enne, Meede'enne, Ilaame'enne, Maspheexoome'enne, Yihuxxi uullanne, Qaphaadooqe'enne, Phaanxoosanne, Issiyanne,

10Firge'enne, Phimfiliyanne, Gibxannee Qaareena yakkam beero'i gadanonne yoo Liibiyannee hee'nnoommi keen yoommine. Odim Oroo'm beero'onne hee'nnoommi Ayihuxxi mannii Ayihuxxi manni amma'nnatonne daba'llinummi keenii yoommine.

11Qarxeesa yakkam uullannee Arabannee hee'nnoommi keenim yoommine. Neese annannichchim Waa'ika malaayyaam baxo niihaanninne annannichchi suuminnem kuttu'uuyyi macceensoommuulla» yito'o.

12Ee bikkina ixxuwwi hundim maalalta'a mal bi'ukkaare ixxuwwina'i ixxuwwim «Kuk maruwwa?» yaqqanto'o.

13Ihukkaarem mulli keen «Woyi'n diqaasa agga'a dimbita'atette» yita'a naacco'o.

14Ihukkaarem Pheexiroos tomminnee mat asse'amaaninnee maqirem uullaa sagara iimaa'aa minaadabina «Yihuxxi uulli mannii Yerusaaleemanne hee'llakkam mannii hundim an wocoommi woshsha qoossitakka'a macceessehe. Ku woshshi ki'nnuwwina la'amaakkoohan ihona.

15Ki'nnuwwina laboo'isanne ku manni agaa dimbukkoyyo; mashka'oomim kaba uulli soodukkaanniinsi xale'e sas sa'aata.

16Ihukkaarem kuk Waa'i hiraagaanchi Yoo'eelinne ihaa

17‹Lasaanchi doollenne kid issoommo. Maara edde'u keenonne hundannem iikka Keesammi Ayyaana dilliisoommo. Ki'nnuwwik goo'n oosii landi oosii hiraago woccamo. Ki'nnuwwik harde'i keenim kaalta moo'llamo. Ki'nnuwwik lommannim haqaawwe'ookko.

18Eeyya, hanqinam ee ammane iina awwaaddam keenonne, goonannee meentonnee iikka Keesammi Ayyaana dilliisoommo. Ixxuwwim hiraago woccamo.

19Moollanni waaroo la'amaakkoo malaayyaam balliinsi gaassaa hanaan iimanennem maalalsiisoo luwwa woroon uullannem mare'e moo'isoommo. Xiig, giirii umbu'lli'nnoo'i wiriirii ihookko. Eelliinchi tuunsookko. Aganim xiiganne daba'llookko.

21Moollannika summa weeshoo keen hundim gatookko› yaa wocu woshsha.

22Isra'ee'l minaadaba, ka woshsha macceessehe. Waa'i malaayyaam baxo, maalalsiisoo luwwaa mare'ee ki'nnuwwi lambe'enne ixxi kollinne issaa ki'nnuwwina la'isu mancho, ixxom Naazireexxi Yesuusa ki'nnuwwi gagim laqqakkamo.

23Ee Yesuusa Waa'i sawwaa gudisu sawwitinnee gaassim ixxena yoo lachchinnee ki'nnuwwina uwwukkaare ixxo jor manni anganne saqalamaa lehoo'isa issitakko'o.

24Ihukkaarem ixxo leh kaa'eena xanoobee'i bikkina lehika malaayye Waa'i ixxeensi hooraa lehiinsi ki'isukko.

25Daawiitim Yesuus bikkina ‹An i Waa'a hundi ammanem i illagenne moo'oommuulla. Ixxim iinninne maqire yoo bikkina kaa'amoommoyyo.

26Ee bikkina an lobakata liiramoommo. Wocummuuyyim liiranchinne wocoommo. Ee hanniinsim lophphaa an sooxxi eroomma neeyyato issummuuyyi hee'oommo.

27Mashka'oomim at i foore Si'oolanne uttooyyo. Kiina keesamukkokam shamona uttooyyo.

28At iina heechchanne massoo googo moo'issaatto. Odim at iinninne maqir ihimmi eese lobakata liiransookko› yukko.

29Iyyabbaayyuwwa, niyyanni Daawiit lehukkisa, waammamukkisaa ixxi waammim kaballi afeebe'e ni beyyonne yoo'isaa an ki'nnuwwina caakkisaa kuroommo.

30Daawiit hiraagaanchi hee'u bikkina Waa'i ixxi shumo'iinsi mat mancho ixxi adilla'n barcumanne afuusseena ixxena hide'ukkisa la'aa hee'ukko.

31Ee bikkina Waa'i doo'llaakkoo Kiristoos Si'oolanne gatoobee'isaa ixxi maarim shamoobee'isaa gaassaatim la'aa lehiinsi ki'oo'isa kurukko.

32Ee Yesuusa Waa'i lehiinsi ki'isaakko. Ee woshshinam neese hundim naqaashshuwwa.

33Ee bikkina Yesuus Waa'i makkanne lombinne afuurimminnee Waa'i ‹Uwwoommo› yu Keesammi Ayyaana aa'imminnee ka moo'llakkamokaa macceessakkamokaa issoolla.

34Daawiit iimane firukkoyyo. Ihukkaarem ixxi ‹Waa'i i Moollannina «Ki diina'a ki lokkiinsi woroon isseembe'e i makki kollonne afuure» yaakko› yaa Yesuus bikkina wocukko.

36Ee bikkina ka ki'nnuwwi saqaltakko'i Yesuusa Waa'i Moollannaa ixxi doo'llaakkoo Kiristoosattee issukkisa Isra'ee'l minaadab hundim qoossitakka'a laqqehe» yukko.

37Mannim eekka macceesso'i ammanenne ixxuwwik wodan nakkamukkaare Pheexiroosinaa Yesuus asse'u mulli keeninaa «Niyyabbaayyuwwa, maha issino?» yito'o.

38Pheexiroosim ixxuwwina dabaraa «Ki'nnuwwik baaxiil haafamoo'isina annannichchim baaxiilo biiraa yitakka'a Yesuus Kiristoos summinne xammaqammehe. Keesammi Ayyaa'n uwwancham aa'llakkamo.

39Mashka'oomim Waa'i ‹Uwwoommo› yu neeyyat ixxi kollonne weeshu keenina ayyenam ki'nnuwwina, ki'nnuwwi oosinaa Waa'i eroommiinsi qee'llito'i keeninaa hundinatteme» yukko.

40Odim lobakat mulli woshshinnem qoxxisaa kuraa «Ka boqqi qaranchiinsi ki'nnuwwi gaga gatixxehe» yaa sogukko.

41Ee bikkina ee balla sas kuma ikkamqax manni ixxi woshsha aa'lla'a xammaqanta'a amma'nnaa'n xigonne exxito'o.

42Oo exxito'i keenim Yesuus asse'u keen losissam losishshina, mateeyyoomina, mateeyyoo'm ichchinaa Waa'a uunximminaa ixxuwwi gaga higissa'a uwwito'o.

43Lobakat maalalsiisoo luwwii agannii Yesuus asse'u kee'n kollinne iham hee'u bikkina manni hundim baddukko.

44Amma'nnito'i keen hundim mateeyyoominne hee'llam hee'llo'o. Ixxuwwina yoo luwwi hundim maqi'llan hee'ukko.

45Ixxuwwina yoo luwwa hundam biteessu'uuyyi ayyenam hasisoo'isinne baxxansitam hee'llo'o.

46Odim balli hundam mat ikka'a Keesammi Mine mattam hee'llo'o. Ixxuwwi minneewwannem hurbaata danaam wodaninne liirantu'uuyyi mat ikka'a ittam hee'llo'o.

47Waa'am galaxxitam hee'llo'o. Odim manni hundim ixxuwwi er manni ikko'isa wocam hee'ukko. Moollannim amma'nnaa gatu keeno ballina ballina ixxuwwanne edam hee'ukko.

← Chapter 1 Jump to: Chapter 3 →