Acts 8

hadiyya

← Chapter 7 Jump to: Chapter 9 →

1Ee balla Yerusaaleemanne hee'llo'i amma'nnaanonne kee'mmaalli hawwii yaayyanchii afukko. Yesuus asse'u keeniinsi bagaan mulli keen hundim Yihudannee Samaare'ennee binnito'o.

2Isxifaanoosam Waa'ina gatto'oo manni waammito'o. Lobakatam wi'llito'o.

3Ihukkaarem Saawul min hundam aagukkuuyyi goonaa meentoo gosaasaa karaxxi minenne aagisimminne amma'nnaano bi'isam hee'ukko.

4Oo binnito'i amma'nnaanim matto'i beyyi hundannem Waa'i sagara kutto'o.

5Filiphphoosim Samaare'enne yoo beero'o maraa Kiristoos bikkina ee beero'i mannina alallaatukko.

6Habus dut keeniinsi sagara iimaa'aa laaraa firu bikkinaa shiihuwwii dimmuwwii lobakat fayye'am hee'u bikkinaa Filiphphoos wocam hee'u woshshaa issam hee'u agannaa minaadab hundim danaamisa qoossaa macceesamii moo'amii hee'ukko.

8Ee bikkina ee beero'onne lobakat liiranchi ihukko.

9Ihukkaarem ee beero'onne lobakat ammaniinsi ki'isaa kiiroo mat Simi'oona yakkam kiiraanchi hee'ukko. Ixxim kiirimminne Samaare'enne yoo minaadaba maalalsiisam hee'ukko. Odim ixxi gagam «An lobane» yam hee'ukko.

10Hoffaanniinsi ki'isaa lobaannonne afeebe'e manni hundim «Ku manchi Lob Malaayye yamamaa weeshamoo Waa'i malaayye» yaa ixxi woshsha danaamisa qoossaa macceesam hee'ukko.

11Lobakat ammaniinsi ki'isaa Simi'oon kiirimminne minaadaba maalalsiisam hee'u bikkina ixxi wocoo woshsha danaamisa qoossaa macceesam hee'ukko.

12Ihukkaarem Filiphphoos Waa'i adilla'n bikkinaa Yesuus Kiristoos bikkinaa mishiraachchi sagara kurukkaare macceesaa amma'nnimminne goonii meentii xammaqamukko.

13Simi'oon ixxi gagim amma'nnaa xammaqamaa lasage Filiphphoos exxukko. Ixxim dut mare'ii lobakat agannii ihookkoka moo'aa maalalukko.

14Yerusaaleemanne hee'llo'i Yesuus asse'u keen Samaare'i uulli manni Waa'i sagara aa'llo'isa macceesso'i ammanenne Pheexiroosaa Yohaannisaa ee manni beyyo asse'llo'o.

15Oo Samaare'i uulli manni xale'i Moollanni Yesuus summinne xammaqanta'a hee'llo'o bagaan ixxuwwanne matonnem Keesammi Ayyaan dillukkoyyi hee'ukko. Ee bikkina Pheexiroosii Yohaannisii ixxuwwi beyyo matta'a oo manni Keesammi Ayyaana aa'llamisina Waa'a uunxito'o.

17Lamim ee manni hanenne anga issita'a Waa'a uunxito'i ammanenne oo manni Keesammi Ayyaana aa'llo'o.

18Yesuus asse'u keen manni hanenne anga issito'aare Keesammi Ayyaan dillukkisa Simi'oon moo'aa «Anim hanenne i anga issoommi manchi Keesammi Ayyaana aa'oo'isina ka malaayye iinam uwwehe» yaa Pheexiroosaamina diinate eebukko.

20Ihukkaarem Pheexiroos ixxena dabaraa «Waa'i uwwoo uwwancha at diinatinne aa'lleena sawwitti bikkina ki diinat kiinninne maqirem bi'ona.

21Kiikki wodan Waa'i illagenne xabbeen ihubee'i bikkina ka woshshanne kiina qood te'im saam bee'e.

22Odim at jor to'achchinne wo'mmittisaa baaxiil keese karaa amadukkisaa moo'ummi bikkina at ki boqqoomiinsi saxxitaa daba'llitaa ayyi la'ukko ki woda'n jor sawwite Waa'i haafoo'isina Waa'a uunxe» yaa dabarukko.

24Simi'oonim dabaraa «Ki'nnuwwi yitakko'i luwwik ma'lluchchim eesenne afoobee'isa Waa'a uunxehe» yukko.

25Pheexiroosii Yohaannisii Waa'i sagara alallaatta'atii kutta'atii lasage Samaare'i uulli lobakat gattenne mishiraachchi sagara kuttu'uuyyi Yerusaaleema daba'llito'o.

26Moollanni asse'amaanchim Filiphphoosina «Ka beyyiinsi ki'llaa Yerusaaleemiinsi Gaaza yakkam beyyi afeebe'e massoo googinne woroo'n qaranne yoo uulli kolli mare» yukko. Oo googim udma'i uulli goog hee'ukko.

27Filiphphoosim ki'aa marukko. Maraa Hindaake yakkam Tophphe'i adilaka amaxxa hundam egeraanchi ihu Tophphe'i uulli mat muleessa'i manchinne edamukko. Ixxim Yerusaaleema Waa'ina otosseena waaraa

28faraxxi gaare'enne saa'llaa daba'llaa elle'ukkuuyyi hiraagaanchi Issaayyaas kitaabu kitaaba qananaa'am hee'ukko.

29Keesammi Ayyaanim Filiphphoosina «Mattaa ee gaare'enne hincihe» yukko.

30Ee bikkina Filiphphoos ee manchi beyyo geeraa maraa hiraagaanchi Issaayyaas kitaabu kitaaba qananaa'ookkoka macceesaa «Qananaa'lloo woshsha qoossitaatennihe?» yaa xa'mmukko.

31Ixxim Filiphphoosina dabaraa «Kurookkok bee'eka hinkid qoossaa la'eena xanoommo?» yaa gaare'enne firaa ixxenne maqirem afuuroo'isina Filiphphoosa xa'mmukko.

32Kitaabiinsi oo muleessa'i qananaa'am hee'u beyyim «Durakkeena massakkam gereechchisa te'im odda muroo manchi illagenne duudaa cawwaa uroo gereechchisa ixxi suume fooqaa'ukkoyyo.

33Ixxi gagam hoffiisukko. Hanqo'i oogato'om siixxukkoyyo. Ixxim ka uullanne hee'oobee'isa shakka'a hoorakko'i bikkina ixxeka shumo'o ayyi kureena xanookko?» yoohan hee'ukko.

34Oo muleessa'im Filiphphoosina «Hay kure! Ku hiraagaanchi kid yookkok ixxi gaginattennii mulli manchinatte?» yukko.

35Filiphphoosim ee kitaabiinsi ki'isaa Yesuusika mishiraachchi sagara ixxena kurimma asheerukko.

36Googo amadda'a mattu'uuyyim wo'i yoo beyyo affo'aare oo muleessa'i Filiphphoosina «Ka moo'e! Wo'i keyye yookko. Xammaqameena eese mah hoorookko?» yukko.

38Eehid yaa faraxxi gaare'e uullisiisukko. Ee lasage muleessa'ii Filiphphoosii lamim wo'i woro dillita'a Filiphphoos muleessa'a xammaqukko.

39Xammaqaa lasage lamim wo'i woriinsi fitto'aare Keesammi Ayyaan Filiphphoosa agaa massaa lasage oo muleessa'i la'mmaagge Filiphphoosa moo'ukkoyyo. Muleessa'im liiramukkuuyyi marukko.

40Ihukkaarem Azaaxoosa yakkam beyyonne Filiphphoos siidamukko. Ixxim Qiisaariya yakkam beero'o marukkuuyyi beero'uwwi hundinam mishiraachchi sagara alallaatukko.

← Chapter 7 Jump to: Chapter 9 →

Recommended Reading

Commentary Acts Commentaries → Devotional Acts Devotional Guide → Get This Bible hadiyya Study Bible →