Mark 12

hadiyya

← Chapter 11 Jump to: Chapter 13 →

1Odim Yesuus qeessa awwonsaanina, Seera losisaaninaa lommanninaa kobi'llishshinne kurukkuuyyi «Mat ammane mat manchi woyi'n kaashsha kaasukko. Ee woyi'n kaashshi kululleetam ootaa woyina ciinsakkam bare hinukko. Woyi'n kaashsha egerimminam godo'o baxukko. Ee lasage ee woyi'n kaashshi beyyo abuullaanina uwwaa mulli uulla marukko.

2Oo woyi'n kaashshi annichchi woyi'n misha feerakkam amman afukkaare woyi'n mishika eebona abuullaa'n beyyo awwaadaaniinsi mato asse'ukko.

3Ihukkaarem abuullaan ee awwaadaancho amadda'a ganta'a kora'i angam daba'lloo'isa issito'o.

4Woyi'n kaashshi annichchim la'mmekam mulli awwaadaancho asse'ukko. Abuullaan ixxom kininne qokkito'o; sholliisso'ome.

5Odim mulli awwaadaanchom asse'ukko; eeham shito'o. Ee'isam mulli keenom asse'ukkaare mat mat keeno ganto'o; mat mat keenom shito'o.

6Kaba gatukkok iittoo ixxi beeto asse'imma. Ixxim ‹I beeta'i hayditamo› yaa lasaanchonne asse'ukko.

7Ihukkaarem oo abuullaan ixxuwwina'i ixxuwwim ‹Lagaanchi kane; waallehe, lag niihan ihoo'isina ixxom shinona!› yaqqanto'o.

8Beetom amadda'a shita'a leeshooma woyi'n kaashshi beyyiinsi biiranne fissita'a uunjito'o.

9Eehaara'i woyi'n kaashshi annichchi maha issookko? Ixxi gagim waaraa ee abuullaano shookko. Woyi'n kaashshoomam mulli keenina uwwookko.

10Hanqinam Keesammi Kitaabanne ‹Kininne mine baxxam keen «Awwaadooyyo» yita'a uunjito'i kinchi lophphaa awwaadoo lamejji kinchi ihukko.

11Oohim Waa'i baxo; ni illinnem moo'nnaa maalallummo› yamamu sagara qananaa'llakko'oyyonnihe?» yukko.

12Ka kobi'llishsha wocukkok ixxuwwinatte ihukkisa laqqo'i bikkina ixxo amaddeena hasso'o. Ihukkaarem minaadaba baddito'i bikkina utta'a matto'o.

13Ee lasage Farisaawe'uwwiinsii Heeroodis manniinsii matqaxa woshshinne Yesuusa digaaddona asse'llo'o.

14Asse'anto'i keenim ixxi beyyo matta'a «Losisaancho! At hanqo'ane, mannika miine moo'lloobee'ane, Waa'i googo hanqo'isa losissoohanee manninam golo'lloobee'anee ikkittisa lanqoommo. Oroo'm adilina gibiro miqimmi hasisoohonnii hasisooyyo?» yito'o.

15Ihukkaarem ixxuwwi labisaan ikko'isa la'aa «Mahina eese keentakkamuulla? Huno'o, moo'oommo mat diinaara eebbehe» yukko.

16Ixxuwwim mat diinaara eebbo'o. Yesuusim ixxuwwina «Ka diinaaranne yoo misilii kitaabii ayyane?» yaa xa'mmukko. Ixxuwwim «Qeesaarane» yita'a dabatto'o.

17Yesuusim ixxuwwina «Eehaara'i Qeesaaran ihu luwwa Qeesaarinam uwwehe. Waa'an ihu luwwa Waa'inam uwwehe» yukko. Ixxuwwim ixxonne lobakata maalalto'o.

18Odim «Manni lehaa lasage ki'ooyyo» yitam Saduuqaawe'uwwi Yesuus beyyo waatta'a

19«Losisaancho! Muse'e niina ‹Mat manchi meentichcho eebaa ooso qaroo'n lehulas ixxi abbaayyi ee meentichcho laggassaa ee lehukkaannina shumo'i ihoo ooso qarimmi hasisookko› yaa kitaabaakko.

20Mat ammane lamar abbaayyuwwi hee'llo'o. Ee abbaayyuwwiinsi won meentichcho eebaa ooso qaroo'nnim lehukko.

21Ee lasage wona awwonaanchi ee meentichcho laggassukko. Ixxim ooso qaroo'nnim lehukko. Odim saxxekim laggassukko. Ixxim ooso qaroo'nnim lehukko.

22Ee'isinne lamarim ee meentichcho eebbo'ookko; ihukkaarem ixxuwwi ooso qattoo'nnim leto'o. Lasaanchonne oo meentichchom leto'o.

23Eehaare isa'i lamarim eebbo'ookko leto'i keen lehiinsi ki'llam ayyaamo hinkannina arette ikkamo?» yito'o.

24Yesuusim ixxuwwina «Ki'nnuwwi huushantakkamok Keesammi Kitaab yookkokaa Waa'i malaayyee laqqakkambee'i bikkinatte.

25Leto'i keen lehiinsi ki'llam ammane Waa'i asse'amaa'nnisa ikkamo bagaan eebbamoyyoo ladiissamoyyoo.

26Ihukkaarem giir aphpham hee'u shif aganna kuroo Muse'i kitaabanne leto'i keen lehiinsi ki'llamisa kitaabamukkoka qananaa'llakko'oyyonnihe? Waa'i Muse'ena ‹An Abrihaam Waa'a; Yisaaq Waa'a; Yaaqoob Waa'a› yaakko.

27Waa'i hee'oo kee'n Waa'a bagaan lehu kee'n Waa'ayyo. Ee bikkina ki'nnuwwi lobakata huushantakko'ookko» yukko.

28Seera losisaa'nnek mat ee beyyo waaraa Saduuqaawe'uwwi fitantam woshsha macceesam hee'ukko. Ixxim Yesuus ixxuwwina danaamisa dabarukkisa macceesaa «Hundiinsim lophphoo ijaaj hinkane?» yaa Yesuusa xa'mmukko.

29Yesuusim ixxena «Hundiinsi lophphoo ijaaj ‹Isra'eela, macceese; ni Moollanni Waa'i mexxo'i Waa'a.

30Ki Moollanni Waa'a wo'm wodaninne, wo'm tiirinne, wo'm sawwitinnee wo'm malaayyinnee iitte› yoohane.

31La'mmekim ‹Ki beshichcho ki gaqqisa iitte› yoohane. Ka keeniinsi lophphoo mulli ijaaj bee'e» yukko.

32Seera losisaanchim Yesuusina «Losisaancho hanqame! ‹Waa'i mato; ixxeensi bagaan mulli Waa'i bee'e› yitaa woccittokim hanqa.

33Odim wo'm wodaninne, wo'm tiirinne, wo'm sawwitinnee wo'm malaayyinne Waa'a iittimmii beshichchom gaqqisa iittimmii shokkiisakka'a hincaa'akkam kitimiinsii mulli kitimiinsii hundiinsim lophphoohane» yukko.

34Yesuusim oo manchi qooroominne dabarukkisa moo'aa «At Waa'i adillaniinsi qee'llitaattoohaneyyo» yukko. Ee lasage ayyim Yesuusa maham xa'mmeena iggukkoyyo.

35Keesammi Minenne Yesuus losisukkuuyyi «Seera losisaan ‹Kiristoos Daawiit beeto› yitamok mahinatte?

36Daawiit ixxi gagim Keesammi Ayyaaninne ‹Waa'i i Moollannina Ki diina'a ki lokkiinsi woroon isseembe'e i makkanne afuure› yaakko.

37Eehaara'i Daawiit ixxi gagim Waa'i doo'llaakkoo Kiristoosa ‹Moollanna!› yaa weeshulas Kiristoos hinka'isinne Daawiitina beet ihookko?» yukko. Ee beyyonne hee'u dut manni Yesuus wocu woshsha liiranchinne macceesam hee'ukko.

38Yesuusim losisukkuuyyi «Seera losisaano ege'llehe. Ixxuwwi qeeraa'l eddechcha edde'lla'a do'immaa meerannem manni ixxuwwa xummaatisonaa hassam keeno.

39Odim wixxixxi minneewwannem hundiinsi e'lloo beyyonne afuuchchaa maadda itteena afuuttam ammanem lombi beyyonne afuurimmaa hassam keeno.

40Qeeraa'llissa'a Waa'a uunxitu'uuyyi xummaan keeno labbamo. Aro'i lehu kee'n amaxxam boggamo. Ee bikkina ixxuwwanne afoo oogato'i kee'mmaalla» yukko.

41Keesammi Minenne diinate uwwakkam mu'uxxi gadanonne Yesuus afuuraakkoohaannonne dut manni ee mu'utanne diinate issookkoka moo'ukko. Dut goddaanim lobakat diinate issito'o.

42Aro'i lehaakkoo mat buxichchom waatta'a mat saantima ihoo lam meenzo'o issito'o.

43Yesuusim ixxi losaano ixxi beyyo weeshaa «Hanqinam an ki'nnuwwina kuroommo; aro'i lehaakkoo tu buxichcho ka mu'utanne issito'i diinat mulli keen hundim issito'aanniinsi lobane.

44Mashka'oomim mulli keen hundim uwwito'ok ixxuwwina ihaa gatukkaanniinsette. Ihukkaarem ise ma'lluchchimbee'i buxichchotte ikka'a isena yooqaxichchi hundichchom uwwito'ookko» yukko.

← Chapter 11 Jump to: Chapter 13 →