Mark 14 — hadiyya

1Shaashshiqqi Ugudinaa Qorosho'i Ugudinaa lam balli gataakkoohaannonne qeessa awwonsaanii Seera losisaanii hantaarinne Yesuusa amadda'a shitam googo hassam hee'llo'o.

2Ihukkaarem «Minaadab hambalaachcha ki'isoobee'isa Ugudanne ihoone» yaqqanto'o.

3Yesuusim Biitaananne oddomachchonne firoo baddisoo jabbi yoo Simi'oon minenne maaddanne afuuraakkoohaannonne mat meentichcho lobakata bito xee'aalli Naardoos shitto'i yoo albaasxiroos bilqaaxa amadda'a waatto'o. Isem ee bilqaaxa iiqqa'a shitto'ooma Yesuus horoorenne dunto'o.

4Ee ammane ee beyyonne hee'llo'i keeniinsi mat mat oo meentichcho issito'i luwwanne nadadda'a «Ku shitto'i mahina korabeyyonne bi'oohane?

5Sas xibbi diinaariinsi hanaan biteesamaa diinate buxina uwwimmi xansiisam hee'ukko» yaqqanto'o. Ee meentichchom gaddo'o.

6Ihukkaarem Yesuus ixxuwwina «Ullehe; ise mahina hawwissakkamuulla? Ise iina danaamisa issito'ookko.

7Bux hundi ammanem ki'nnuwwinnette; hassakko'i ammane ixxuwwa hara'mmitakkeena xantakkamo. Ihukkaarem an hundi ammane ki'nnuwwinne hee'oommoyyo.

8Ise issiteena xantamqaxa issito'ookko. An waammina gudona i orachchonne gaassita'ahim shitto'o labbo'ookko.

9Hanqinam an ki'nnuwwina kuroommo; heer uullanne mishiraachchi sagar alallaattamoo beyyi hundannem ku ise issito'i luwwi isena tiissiishshi ihoo'isina kuramookko» yukko.

10Ee lasage tommiinsii lamem losaaniinsim mat hee'u Asqorotokkichchi Yihud Yesuusa higisaa uwweena qeessa awwonsaa'n beyyo marukko.

11Ixxuwwim ee woshsha macceesso'i ammanenne liiranta'a ixxena diinate uwwiteena sagara aaggo'o. Yihudim ee ammaniinsi ki'isaa Yesuusa higisaa uwweena makki ammane hasam hee'ukko.

12Shaashshiqqi Uguxxi geex ambula durakkam Qorosho'i Uguxxi luxxi ayyaamonne Yesuusik losaan «Uguxxi hurbaata kiina hannonne gudinsona hassootto?» yita'a xa'mmito'o.

13Yesuusim ixxi losaa'nneka lamo «Beero'o mallehe. Eekke'em wo'i harachcho iyyaakkoo manchinne edantakkamo; ixxom awwonnehe.

14Ixxi aagoo mine aaggakka'a mi'n annichchina ‹Losisaanchi «I losaaninnem uguxxi hurbaata itoommi koyyi min hannonnette?» yoolla› yi'llehe.

15Ixxim hundem luwwim gudaakkoo geejji fooq mine moo'isookko. Eekke'e gudissehe» yukko.

16Lamem losaanim beero'o matta'a hundem luchchom Yesuus kurukkisam ihaa siiddo'o. Eekke'em uguxxi hurbaata gudisso'o.

17Uulli hiimu ammanenne Yesuusim tomminnee lamem losaaninnee maqirem waarukko.

18Hurbaata ittu'uuyyim Yesuus ixxuwwina «Hanqinam an ki'nnuwwina kuroommo; iinninne maqire ittakkam ki'nnuwwiinsi mat eese higisaa uwwookko» yukko.

19Ixxuwwim ee woshshanne lobakata kichche'lla'a annannichchim «Anettennihe?» yitu'uuyyi xa'mmito'o.

20Yesuusim ixxuwwina «Iinninne maqire bixxiranne anga aagissakkam tommiinsii lamiinsii mat eese higisaa uwwookko.

21Manchi Beeta'i ixxi bikkina Keesammi Kitaabanne kitaabamukkisam lehookko. Ihukkaarem Manchi Beeto higisaa uwwoo manchina aayye! Oo manchi qaramubeeta'n e'llam hee'ukko» yukko.

22Ixxuwwi ittu'uuyyim Yesuus qorosho'o ki'isaa Waa'a galaxxukko. Iiqaatim «Hii'nnehe; kuk i maara» yaa ixxuwwina uwwukko.

23Odim humbullonne yoo woyi'n diqaasam ki'isaa Waa'a galaxxukko. Diqaasam uwwukkaare hundim aggo'o.

24Yesuusim ixxuwwina «Dut keenina dunamoo haareechchi hidi'l i xiig kane.

25Hanqinam an ki'nnuwwina kuroommo; Waa'i adillanonne haareechchi woyi'n diqaasa agoommi ayyaam afeebe'e ka woyi'n diqaasa od agoommoyyo» yukko.

26Ee lasage mazmuura zammatta'a Wee'l duuna matto'o.

27Yesuus ixxi losaanina «Keesammi Kitaabanne ‹Allaaraancho aphphisoommo; allaachchi gereebbim binnookko› yamamaa kitaabamu bikkina ki'nnuwwi hundim eese laggakkamo.

28Ihukkaarem an lehiinsi ki'aa lasage ki'nnuwwiinsi gaassaa Galiila afoommo» yukko.

29Pheexiroos ee ammane Yesuusina «Mulli keen hundim keese laggota'nnim an hore'em lagoommoyyo» yukko.

30Yesuusim Pheexiroosina «Hanqinam an kiina kuroommo; kaballi hiimo antabaa'i lam kore muunoo'n gaassitaa eese sas kore laggootto» yukko.

31Ihukkaarem Pheexiroos «Kiinninne maqire lehoomta'nnim keese hore'em lagoommoyyo» yukko. Gatto'i losaan hundim ixxi yukkisam yito'o.

32Ee lasage Yesuusii ixxi losaanii Geeteseemaana yakkam beyyo matto'o. Yesuusim ixxuwwina «An Waa'a uunxeembe'e keyye afuullehe» yukko.

33Ixxim Pheexiroosa, Yaaqoobaa Yohaannisaa ixxenne maqire amadaa marukko. Eekke'em Yesuus lobakata kichche'ukko; u'nnamukkome.

34Ixxuwwinam «An lehoomqaxa kichche'aammo; ki'nnuwwi keyyenne egellehe; qoxxehe» yukko.

35Ixxuwwiinsim hofqaxa qee'llaa maraa uullanne illillaachcha ubaa «Iyyannaa! Iyyannaa! Kiina hundi luwwim xanamoohane. Ki doo'l ihulas ka hawwi humbullo iinniinsi higise. Ihukkaarem i doo'llis ihoo'n at doo'llittisa ihona» yaa Waa'a uunxukko.

37Ee lasage sasem losaa'n beyyo daba'llaa waaraa diriitto'ookkoka moo'aa Pheexiroosina «Simi'oona, diriittaatennihe? Hofqax ammanem baqitaa egetteena xantooyyonnihe?

38Kabadem keenanchanne aaggakkambee'isa baqitakka'a Waa'a uunxehe. Tiir hundi ammanem gudaakkoohane. Ihukkaarem maar hoongaancho» yukko.

39Odim maraa illagee'n sagaram wocukkuuyyi Waa'a uunxukko.

40Ee lasage losaa'n beyyo daba'llaa waarukko. Diriir ixxuwwa amadaa hee'u bikkina diriitto'oo moo'ukko. Ixxuwwim ixxena woccam luchcho laqqo'oyyo.

41Saxxaaggem ixxuwwi beyyo waaraa «Kabad afeebe'em iinse'llakka'a usheexxitakka'atennihe? Kaba ihookko. Manchi Beet baaxiilaa'n anganne higaa uwwamoo amman afaakko.

42Ki'llehe! Mallona. Eese higisaa uwwookkok kuno'o afaakko» yukko.

43Yesuus wocukkuuyyim tommiinsii lamiinsii mat hee'u Yihud waarukko. Bisa'aa mugaa amaddo'oo dut mannim ixxenne maqire hee'llo'o. Ixxuwwim qeessa awwonsaaniinsi, Seera losisaaniinsii lommanniinsii asse'anto'oo keen hee'llo'o.

44Higisaa uwwoo Yihudim ixxuwwina «Ki'nnuwwi hassakkam manchi an suunqoommane. Ixxo qoxxissakka'a amaddakka'a massehe» yaa mare'e uwwaa hee'ukko.

45Ixxim ee ammanem Yesuus beyyo maraa «Losisaancho!» yaa suunqukko.

46Oo waatto'i mannim Yesuusa qoxxissa'a amaddo'o.

47Ee ammane Yesuusinne hee'llo'i kee'nnek mat seejjiinsi bisa'a fissaa hundiinsi lob qeessichchina awwaadaancho aphphisaa macce murukko.

48Yesuusim ixxuwwina «Fanga amadakkamisa eese amaddakkeena bisa'aa mugaa amaddakka'a waattakko'onnihe?

49Ballina ballina Keesammi Minennee ki'nnuwwi lambe'ennee ihaa losisummuuyyi amaddakko'oyyo. Ihukkaarem kuk ihukkok Keesammi Kitaabanne kitaabamukkok wo'mmoo'isinatte» yukko.

50Ixxi losaan hundim ixxo utta'a gibbo'o.

51Ee ammane xale'i weyyakka edde'aakkoo mat woraadichchi Yesuusa laseesaa maram hee'ukko.

52Ixxom amaddeena yakito'o. Ihukkaarem weyyakka uraa umba'adam gibukko.

53Ee lasage hundiinsi lob qeessichchi mine Yesuusa massito'o. Eekke'em qeessa awwonsaan, lommannii Seera losisaanii wixxita'a hee'llo'o.

54Pheexiroosim qee'llonnette ihaa hundiinsi lob qeessichchi qash wor afeebe'e laseesukkuuyyi maraa egeraaninne maqirem afuuraa giira iibbixxam hee'ukko.

55Ee ammane qeessi awwonsaanii daannuwwii Yesuusa shisiisseena naqaasha hassam hee'llo'o. Ihukkaarem siiddeena xanto'oyyo.

56Dut keen Yesuusanne qophphaninne naqqassam hee'llo'o. Ihukkaarem hundik woc mat ihukkoyyo.

57Mat mat keenim uullita'a «Ixxi ‹An manni anginne baxamu Keesammi Mine gindaa manni anginne baxamubee'i mulli mine sas ballanne baxoommo› yukkuuyyi macceensaammo» yita'a qophphaninne naqqasso'o.

59Ee'isa naqqasso'aarem kabadem ixxuwwi woc mat ihukkoyyo.

60Hundiinsi lob qeessichchim ixxuwwi lambe'enne uullaa Yesuusa «At maham dabattooyyonnihe? Ku manni keesenne naqqassam luwwi maruchcho?» yaa xa'mmukko.

61Ihukkaarem Yesuus maham dabaroo'n cawwaa urukko. La'mmaaggem hundiinsi lob qeessichchi Yesuusina «Maasse'amaakkoo Waa'i Beet Kiristoos atettennihe?» yaa xa'mmukko.

62Yesuusim ixxena «Eeyya, anette. Manchi Beet hundam xanoo Waa'aannonne makkanne afuuraakkoo moo'llakkamo. Iima'n duubinnem waarukkuuyyi moo'llakkamo» yukko.

63Ee ammanenne hundiinsi lob qeessichchi nadadaa edde'u eddechcha dereeraa «Od mulli naqaash niina maha hasisookko?

64Waa'inne game'llamukkuuyyi macceessakko'ookko. Ki'nnuwwi sawwit maruchcho?» yukko. Hundim mat ikka'a «Ixxi lehona!» yita'a oogatto'o.

65Mat mat keenim ixxonne anja tuhito'o. Ixxi illem katta'a «At hiraagaanchi ikkilas keese aphphisukkok ayyetda'e huno'o, la'e» yitu'uuyyi aphphissam hee'llo'o. Egeraanim oobo'inne aphphissu'uuyyi massito'o.

66Hundiinsi lob qeessichchi qash woronne woroo'n kollinne Pheexiroos hee'ukkisam ee qeessichchi awwaadaaniinsi mate waatto'o.

67Isem Pheexiroos giira iibbixxukkuuyyi qoxxissa'a moo'lla'a «At Naazireexxi Yesuusinne maqire hee'llittoyyonnihe?» yito'o.

68Ihukkaarem Pheexiroos «An la'oommoyyo; at yitoo woshshim iina aagukkoyyo» yaa lagukko. Ee'isa yaa gooc kollonne marukkisam antabaa'i muunukko.

69Odim oo awwaadaancho Pheexiroosa moo'lla'a ee beyyonne uullito'i keenina «Ku manchi ixxuwwi kollane» yita'a kutto'o.

70Ihukkaarem Pheexiroos la'mmaaggem lagukko. Hofqax ammaniinsi lasage ee beyyonne uullito'i keen Pheexiroosa «At Galiiliinsette ikkitti bikkina hanqinam at ixxuwwi kolli mancho» yito'o.

71Ihukkaarem Pheexiroos «Ka ixxi bikkina woccakkam mancho an la'oommoyyo» yaa ixxi gaga duu'mmimmaa hide'immaa asheerukko.

72Ee ammanem antabaa'i la'mmaaggem muunukko. Pheexiroosim «Antabaa'i la'mmaagge muunoo'n sas kore eese laggootto» yaa Yesuus wocukkoka sawwaa lobakata shikkaa wi'llukko.