2 Corinthians 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Kinahanglan ako magpabugal, bisan nga wala ini sing kapuslanan. Pero karon magahambal ako nahanungod sang mga palanan-awon kag sang mga ginpahayag sa akon sang Ginoo.

2May nakilala ako nga isa ka Cristohanon nga sang katorse na ka tuig nga nagligad ginsabnit pakadto sa pinakamataas nga langit. Wala ako makahibalo kon nadala ang iya lawas ukon ang iya lang espiritu—ang Dios lang ang nakahibalo.

3Nakahibalo ako nga ini nga tawo gindala sa Paraiso, kag sa liwat nagasiling ako nga wala ako makahibalo kon nadala ang iya lawas ukon ang iya espiritu—ang Dios lang ang nakahibalo.

4Didto nabatian niya ang mga pulong nga indi mahambal kag ang mga butang nga indi tugot sa tawo ang pagmitlang.

5Gani ipabugal ko ini nga tawo, pero indi ako magpabugal sang akon kaugalingon, luas lang sang mga butang nga nagapakita kon daw ano ako kaluya.

6Kon luyag ako magpabugal, indi ako manginbuangbuang, tungod kay kamatuoran ang ginasugid ko. Pero indi ako magapabugal, tungod kay indi ako luyag nga ang bisan sin-o nga tawo maghunahuna sing sobra sang sa iya nakita nga ginahimo ko kag nabatian niya nga akon ginahambal.

7Pero agod indi ako magpabugal sing sobra tungod sang makatilingala nga mga butang nga akon nakita, ginpadalhan ako sing masakit nga balatian sa lawas sang mensahero ni Satanas sa pagpaantos sa akon agod indi ako magpabugal.

8Katatlo gid ako magpangamuyo sa Ginoo nga kuhaon niya ini nga pag-antos.

9Pero nagsabat sia: “Ang akon gugma amo ang kinahanglan mo, kay ang akon gahom mabatyagan mo sing labi kon ikaw maluya.” Gani labi ako ka malipayon sa pagpabugal sang akon mga kaluyahon, agod nga akon mabatyagan ang pagtipig sang gahom ni Cristo nga yari sa akon.

10Gani nagakalipay ako sa mga kaluyahon, sa mga pasipala, sa mga kabudlayan, sa mga paghingabot, sa mga kapiutan tungod kay Cristo. Kay kon maluya ako, dayon mabakod ako.

11Daw sa nagabinuang ako, pero kamo ang nagpilit sa akon agod himuon ko ini. Kamo kuntani ang dapat maghambal sing maayo nahanungod sa akon. Kay bisan nga wala ako sing pulos, indi man ako maulihi sa inyo pinasahi nga mga “apostoles”.

12Ang akon pagkaapostol napamatud-an sa tunga ninyo nga may pagpailob gid paagi sa nahimo nga mga tanda kag katingalahan nga mga buhat kag mga milagro.

13Sa ano bala nga bagay nga ginkabig ko kamo nga mas kubos sang sa iban nga mga iglesia, luas nga ako wala nagpangayo sa inyo sing bulig? Kon mahimo patawara ninyo ako kay wala ko kamo ginkabig pareho sang iban nga mga iglesia!

14Ikatlo na ini nga tion nga handa ako sa pagbisita sa inyo, kag indi ako magpabudlay sa inyo. Kamo ang akon kinahanglan kag indi ang inyo kwarta. Kay kon hambalon na gid man, ang mga kabataan indi amo ang dapat magsakdag sang ila mga ginikanan, kundi ang ginikanan amo ang dapat magsakdag sang ila mga kabataan.

15Magakalipay ako sa paghalad sang tanan ko, kag bisan pa sang akon kaugalingon agod sa pagbulig sa inyo. Higugmaon bala ninyo ako sing kubos bisan pa nga daku ang akon paghigugma sa inyo?

16Karon kamo gid magakumpormi nga ako wala magpabudlay sa inyo. Pero may iban nga magasiling nga madaya ako kag natuntohan ko kamo paagi sa akon pagbinutig.

17Sa ano bala nga paagi? Nagpamintaha bala ako sa inyo paagi sa mga tawo nga ginpadala ko dira sa inyo?

18Ginpangabay ko gid si Tito sa pagkadto dira, kag ginpaupod ko sa iya ang isa ka utod kay Cristo. Makasiling bala kamo nga si Tito namintaha sa inyo? Indi bala pareho ang amon pagginawi kag tinutuyo ni Tito?

19Ayhan nagahunahuna kamo nga nagaapin kami sang amon kaugalingon sa atubang ninyo. Mga hinigugma, ang Dios nakahibalo nga wala kami nagaapin sang amon kaugalingon, kundi nagahambal kami suno sa ginapahambal sa amon ni Cristo sa panulok sang Dios, kag ini tanan ginahimo namon sa pagbulig sa inyo.

20Nahadlok ako nga kon mag-abot ako dira makit-an ko kamo nga lain sang sa ginapaabot ko sa inyo, kag ako makit-an ninyo nga lain sang sa ginapaabot ninyo. Nahadlok ako nga may makita nga mga inaway kag kahisa dira, pagpainitay kag pagkamaiyaiyahon, mga pagpasipala kag pagkutsokutso, pagpabugal kag kagamo.

21Nahadlok ako nga sa akon pagkadto liwat sa inyo pakahuy-an ako sang akon Dios sa atubang ninyo, kag magapangasubo ako tungod sa madamo nga nagpakasala sang una anay kag wala sila makahinulsol sang ila nahimo nga malaw-ay nga mga buhat— pagpanghilawas kag iban nga sahi sang makahuloya nga mga buhat.

← Chapter 11 Jump to: Chapter 13 →