2 Corinthians 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Nagakahulogan naman bala ini nga nagapabugal kami sang amon kaugalingon? Pareho sang ginahimo sang iban, nagakinahanglan bala kami sing rekomendasyon paagi sa mga sulat agod ipakilala kami sa inyo? Ukon mga sulat halin sa inyo agod ipakilala kami sa iban?

2Kamo mismo amo ang amon sulat, nga nasulat sa amon mga tagipusoon, agod makilal-an kag mabasahan sang tanan nga mga tawo.

3Maathag gid nga si Cristo mismo amo ang nagsulat sini kag nagpadala sini paagi sa amon. Wala ini masulat sang tinta sa lapida nga mga bato, kundi ginsulat ini sang Espiritu sang Dios nga buhi, sa tagipusoon sang mga tawo.

4Ginasiling namon ini tungod kay may pagsalig kami sa Dios paagi kay Cristo.

5Kay kon sa amon lang wala kami sing kaugalingon nga ikasarang sa paghimo sini nga bulohaton. Ang amon ikasarang nagahalin sa Dios,

6kay sia amo ang nagahatag sa amon sing ikasarang sa pag-alagad sa bag-o nga kasugtanan, nga wala nasandig sa nasulat nga kasugoan, kundi sa Espiritu. Ang nasulat nga kasugoan nagadala sing kamatayon, pero ang Espiritu nagahatag sing kabuhi.

7Ang mga letra sang Kasugoan ginsilsil sa lapida nga mga bato, kag ang makasililaw nga kapawa sang Dios nagpahayag sang paghatag sini. Bisan ang kasilaw sa guya ni Moises nagaamat-amat kadula, pero tama ini kasanag, sa bagay nga ang mga tawo sang Israel indi makaagwanta sa pagtulok sa iya. Kon ang Kasugoan nga ang iya pagpanghikot nagadala sing kamatayon nag-abot nga may daku nga kasanag,

8daw ano pa gid kadako ang kasanag sang pagpanghikot sang Espiritu!

9Kay kon ang pagpanghikot nga nagadala sing silot makatilingala, daw ano pa gid ka makatilingala ang pagpanghikot nga nagadala sang kaluwasan.

10Makasiling kita nga ang tama kasanag nga himaya sang una naalimunaw, tungod sang mas masanag nga himaya karon.

11Kay kon may himaya gani sa sadtong umalagi lang, daw ano pa gid ang himaya sa sining nagapadayon sa wala sing katapusan!

12Tungod kay amo ini ang amon paglaom, nagawali kami nga may kaisog.

13Indi kami pareho kay Moises, nga nagtabon sang iya guya, agod nga ang mga Israelinhon indi makakita sang kasanag nga nagaamat-amat kadula sa iya guya.

14Sa pagkamatuod, ang ila mga panghunahuna natakpan, kag tubtob karon gid nga adlaw ang ila mga panghunahuna natabunan sang amo man gihapon nga tabon, samtang nagabasa sila sang mga libro sang daan nga kasugtanan. Ang tabon makuha lang kon ang tawo nahiusa kay Cristo.

15Tubtob karon, sa ila pagbasa sang Kasugoan ni Moises, ang ila mga panghunahuna ginatabunan pa gihapon.

16Pero ginakuha ini, subong sang ginasiling sang kasulatan: “Ang tabon sa guya ni Moises nakuha sang pagliso niya sa Ginoo.”

17Karon, “ang Ginoo” sa sini nga bahin sang kasulatan amo ang Espiritu, kag kon diin ang Espiritu sang Ginoo, dira may kahilwayan.

18Gani, kita tanan nagapakita sang himaya sang Ginoo sa aton mga guya nga wala sing tabon, kag ina nga himaya nga nagahalin sa Ginoo nga amo ang Espiritu, nagabalhin sa aton nga manginkaangay niya, sa isa ka mas daku pa nga himaya.

← Chapter 2 Jump to: Chapter 4 →