Ephesians 1

Ilonggo (Maayong Balita nga Biblia (2012))

Jump to: Chapter 2 →

1Ako, si Pablo, isa ka apostol ni Cristo Jesus suno sa kabubot-on sang Dios, nagasulat sa mga tumoluo nga yara sa Efeso nga mga matutom sa ila pagkabuhi sa paghiusa kay Cristo Jesus:

2Kabay nga ang Dios nga aton Amay kag ang aton Ginoong Jesu-Cristo magahatag sa inyo sing pagpakamaayo kag paghidait.

3Magpasalamat kita sa Dios kag Amay sang aton Ginoong Jesu-Cristo! Kay iya kita ginabugayan sa aton paghiusa kay Cristo, paagi sa paghatag sa aton sang tagsa ka sahi sang espirituhanon nga pagpakamaayo halin sa kalangitan.

4Sa wala pa matuga ang kalibutan, ginpili na kita sang Dios nga mangin-iya paagi sa aton paghiusa kay Cristo, agod manginbalaan kita kag wala sing kasawayan sa iya panulok. Tungod sang iya gugma,

5ang Dios nagpat-od na nga daan nga paagi kay Jesu-Cristo, kita mangin-iya mga anak. Amo ini ang iya nahamut-an kag kabubot-on.

6Dayawon naton ang Dios tungod sang makatilingala nga paagi sa pagpakita niya sang iya kaayo, nga iya ginhatag sa aton sing bugana paagi sa iya hinigugma nga Anak!

7Kay paagi sa dugo ni Cristo ginluwas kita, sa bagay nga ginpatawad ang aton mga sala. Daw ano kadako ang kaayo sang Dios,

8nga iya ginhatag sa aton sing bugana! Sa bug-os niya nga kaalam kag ihibalo

9ginhimo sang Dios ang iya tinutuyo, kag ginpahayag sa aton ang iya sekrito nga plano, nga iya na nga daan ginpat-od nga himpiton paagi kay Cristo.

10Ang plano sang Dios nga iya pagahimpiton sa nagakaigo nga tinion, amo ang pagtingob sang tanan nga mga gintuga, sa langit kag sa duta, sa idalom sang pagpangulo ni Cristo.

11Ang tanan nga mga butang natuman suno sa ginplano kag ginpat-od sang Dios. Ginpili kita sang Dios nga mangin-iya mga tawo sa paghiusa kay Cristo tungod sang iya kaugalingon nga tinutuyo, suno sa iya na nga daan ginpat-od halin sa ginsugoran.

12Gani, kita nga amo ang nahauna nga naglaom kay Cristo, magdayaw kag magpasidungog sa Dios!

13Kag kamo man nanginkatawhan sang Dios sang nabatian ninyo ang matuod nga pulong sang kamatuoran, ang Maayong Balita nga nagdala sa inyo sing kaluwasan. Nagtuo kamo kay Cristo, kag ginpat-inan kamo sang Dios nga mangin-iya paagi sa paghatag sa inyo sang Espiritu Santo nga iya ginsaad.

14Ang Espiritu amo ang kalig-unan nga mabaton naton ang ginsaad sang Dios sa iya mga katawhan, kag nagapasalig ini sa aton nga ang Dios magahatag sang bug-os nga kahilwayan sa tanan nga nangin-iya. Dayawon ta kag pasidunggan sia!

15Sa sini nga kabangdanan, halin sang pagkabati ko nahanungod sang inyo pagtuo kay Ginoong Jesus kag sang inyo gugma sa tanan nga mga tumoluo,

16wala ako mag-untat sa pagpasalamat sa Dios tungod sa inyo. Ginadumdom ko kamo sa akon mga pangamuyo,

17kag nagapangayo ako sa Dios sang aton Ginoong Jesu-Cristo, ang makatilingala nga Amay, nga iya ihatag sa inyo ang Espiritu nga amo ang magahatag sa inyo sing kaalam kag magapahayag sa inyo sang Dios, agod nga makilala ninyo sia.

18Nagapangayo ako nga ang inyo mga hunahuna mabuksan kag makita ninyo ang iya kapawa, agod inyo mahibaluan kon ano ang paglaom sang iya pagtawag sa inyo, kon daw ano ka bugana ang makatilingala nga mga panublion nga iya ginasaad sa iya mga tumoluo,

19kag kon daw ano ka daku sang iya gahom nga nagapanghikot sa aton nga nagatuo sa iya. Ini nga gahom nga nagapanghikot sa aton amo man ang daku nga gahom,

20nga iya gingamit sang pagbanhaw niya kay Cristo gikan sa minatay, kag ginpapungko sia sa iya tuo sa kalangitan.

21Didto si Cristo nagagahom sa tanan nga langitnon nga mga pangulo, mga awtoridad, mga gahom, kag mga ginoo. Sia labaw gid sa tanan nga mga ngalan nga gamhanan sa sini nga panag-on kag bisan pa sa palaabuton.

22Ginbutang sang Dios ang tanan nga mga butang sa idalom sang awtoridad ni Cristo, kag ginhatag sia sa iglesia subong pangulo sa tanan nga mga butang.

23Ang iglesia amo ang lawas ni Cristo, ang kabug-osan niya. Sia mismo ang nagahimpit sang tanan nga mga butang sa bisan diin.

Jump to: Chapter 2 →