Ephesians 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Sa sini nga kabangdanan, ako, si Pablo, ang binilanggo tungod kay Cristo Jesus nga nagapangabudlay tungod sa inyo nga mga Hentil, nagapangamuyo sa Dios.

2Inyo gid nabatian nga ang Dios sa iya kaayo, naghatag sa akon sining hilikuton para sa inyo kaayuhan.

3Ginpahayag sang Dios kag ginpakilala sa akon ang iya tinago nga plano. (Akon na ginsulat ini sa malip-ot nga mga pulong,

4kag kon inyo basahon ang akon ginsulat mahibal-an ninyo ang akon paghangop sang sekrito ni Cristo.)

5Sadto anay wala ini nga sekrito ginpahayag sa mga tawo, pero karon ginpahayag ini sang Dios paagi sa Espiritu nga amo ang nagpahayag sini sa iya balaan nga mga apostoles kag mga propeta.

6Amo ini ang sekrito: paagi sa Maayong Balita ang mga Hentil makaambit upod sa mga Judio sang mga pagpakamaayo sang Dios. Sila mga katapo sang amo man nga lawas, kag umalambit sang saad nga ginhimo sang Dios paagi kay Cristo Jesus.

7Ginhimo ako nga alagad sang Maayong Balita paagi sa pinasahi nga dulot sang Dios, nga ginhatag niya sa akon paagi sa pagpanghikot sang iya gahom.

8Ako mas kubos pa sang sa labing kubos sang tanan nga mga tumoluo, wala sapayan ginhatagan ako sang Dios sining pinasahi nga prebilihiyo sa pagdala sa mga Hentil sang Maayong Balita nahanungod sa indi matungkad nga mga manggad ni Cristo,

9kag sa pagpakita sa tanan nga mga tawo kon paano mahanabo ang sekrito nga plano sang Dios. Ang Dios nga Manunuga sang tanan nga mga butang, nagtago sang iya sekrito sa nagliligad nga mga panag-on,

10agod nga sa sini nga panag-on, paagi sa iglesia, ang tanan nga mga pangulo kag mga kagamhanan sa kalangitan makahibalo sang tanan nga sahi sang kaalam sang Dios.

11Ginhimo ini sang Dios suno sa iya tinutuyo halin pa sa ginsugoran tubtob sa walay katapusan kag iya ini gintuman paagi kay Cristo Jesus nga aton Ginoo.

12Sa aton paghiusa kay Cristo kag paagi sa aton pagtuo sa iya, may kasidla kita kag pagsalig nga ang Dios magapamati sa aton kon kita magpalapit sa iya.

13Gani, ginapangabay ko nga indi kamo magpakaluya tungod kay nagaantos ako tungod sa inyo. Ini tanan para sa inyo kaayuhan.

14Sa sini nga kabangdanan, nagaluhod ako sa presensya sang aton Amay,

15nga gikan sa iya ang tagsa ka panimalay sa langit kag sa duta nagakuha sang ila matuod nga ngalan.

16Ang Dios makatilingala kag dalayawon. Nagapangayo ako nga ang iya Espiritu magahimo sa inyo nga mabakod nga mga sumolunod,

17kag si Cristo magaestar sa inyo mga tagipusoon paagi sa pagtuo. Nagapangamuyo ako nga makapanggamot kag mapasad kamo sa gugma,

18agod nga kamo, upod sa tanan nga mga tumoluo, makaangkon sang gahom sa paghangop kon daw ano ang kasangkaron kag ang kalabaon kag ang kataason kag ang kadalumon sang gugma ni Cristo.

19Kabay nga makilala ninyo ang iya gugma, bisan nga indi gid ini mahangpan sing lubos, kag mapun-an kamo sang kabug-osan sang Dios.

20Sa iya nga sarang makahimo sing mas labaw pa sang sa aton sarang mapangayo, ukon mapanghunahuna, paagi sa gahom nga nagapanghikot sa aton:

21dayawon ang Dios sa iglesia kag sa kay Cristo Jesus, sa tanan nga panag-on, kag sa walay katubtoban! Kabay pa.

← Chapter 2 Jump to: Chapter 4 →