Ephesians 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Sang una anay mga patay kamo sa espirituhanon nga kabuhi tungod sang inyo mga paglapas kag mga sala.

2Sa sadto nga tion ginsunod ninyo ang malaut nga pagginawi sini nga kalibutan; gintuman ninyo ang pangulo sang espirituhanon nga mga gumalahom sa kahawaan, ang espiritu nga karon nagagahom sa mga tawo nga wala nagatuman sa Dios.

3Kon sa bagay, kita tanan kaangay sa ila sadto anay, kag nagkabuhi kita suno sa aton tawhanon nga mga kailigbon, kag ginhimo naton ang mga naluyagan sang aton kaugalingon nga mga lawas kag mga hunahuna. Sa aton makasasala nga kahimtangan kita man dapat silutan tungod sang kaakig sang Dios, subong sa ila tanan.

4Pero bugana kaayo ang kaluoy sang Dios, kag daku gid ang iya gugma sa aton,

5nga bisan mga patay kita sa espirituhanon nga kabuhi tungod sang aton mga paglapas, iya kita ginbuhi upod kay Cristo. Paagi sa kaayo sang Dios naluwas kamo.

6Sa aton paghiusa kay Cristo Jesus ginbanhaw niya kita upod sa iya sa paggahom upod man sa iya sa kalangitan.

7Ginhimo niya ini agod mapakita sa tanan nga palaabuton nga panag-on ang bugana nga mga manggad sang iya kaayo, sa gugma nga iya ginpakita sa aton kay Cristo Jesus.

8Tungod sa daku nga kaayo sang Dios naluwas kamo paagi sa pagtuo. Indi ini paagi sa inyo nahimo, kundi bugay ini sang Dios.

9Wala sa inyo sang may magpabugal sini, kay indi ini bunga sang inyo kaugalingon nga mga pagpaninguha.

10Ang Dios ang naghimo sa aton nga nangin-amo kita karon, kag sa aton paghiusa kay Cristo Jesus gintuga niya kita sa pagkabuhi agod maghimo sing maayo nga mga buhat, nga iya na nga daan gin-aman agod himuon naton.

11Dumdoma ninyo nga kamo anay natawo nga mga Hentil. Ang mga Judio nagtawag sa inyo nga di-tinuli, kag ini sila nagatawag sang ila kaugalingon nga mga tinuli tungod sang ginahimo sang mga tawo sa ila mga lawas.

12Sadto anay nahamulag kamo kay Cristo. Mga dumoluong kamo sadto, kag wala kamo masakop sa pinili nga mga tawo sang Dios. Wala kamo masakop sa mga kasugtanan, nga ginpasad sa mga saad sang Dios sa iya mga katawhan. Nagkabuhi kamo sa sini nga kalibutan nga wala sing paglaom kag wala sing Dios.

13Pero karon, sa inyo paghiusa kay Cristo Jesus, kamo nga sadto anay nahilayo ginpapalapit na paagi sa dugo ni Cristo.

14Kay si Cristo mismo ang naghatag sa aton sing paghidait, paagi sa pag-isa niya sang mga Judio kag mga Hentil. Paagi sa pagkamatay niya sa krus ginrumpag niya ang dumot nga kaangay sang pader nga nagaseparar kag nagapaaway sa ila.

15Ginwala niya ang Kasugoan sang mga Judio, lakip ang mga sugo kag mga pagsulondan sini, agod nga matuga niya gikan sa mga Judio kag mga Hentil ang isa ka bag-o nga katawhan nga nahiusa sa iya kaugalingon, kag sa sini nga paagi natigayon ang paghidait.

16Paagi sa pagkamatay ni Cristo sa krus ginkuha niya ang mga pagdinumtanay. Paagi sa krus gintingob niya sa isa ka lawas ang mga Judio kag mga Hentil, kag gindala niya sila pabalik sa Dios.

17Gani si Cristo nag-abot kag nagwali sang Maayong Balita sang paghidait sa tanan: sa inyo nga mga Hentil, nga sadto anay malayo sa Dios, kag sa mga Judio, nga malapit sa iya.

18Paagi kay Cristo kita tanan, mga Judio kag mga Hentil, sarang makapalapit sa Amay sa isa ka Espiritu.

19Gani karon, kamo nga mga Hentil indi na mga dumoluong ukon mga sumalayo lang, kundi mga kasimanwa sang mga tumoluo, kag mga katapo na kamo sang panimalay sang Dios.

20Kamo man ginpatindog sa sadsaran nga ginpasad sang mga apostoles kag mga propeta, kag si Cristo Jesus gid mismo amo ang pamusod nga bato.

21Sia ang nagapaangot sang bug-os nga balay kag iya ini ginapatubo nga manginbalaan nga templo nga nahalad sa Ginoo.

22Sa inyo paghiusa sa iya, ginpatindog man kamo sing tingob upod sa iban nga mangin-isa ka puloy-an sa diin ang Dios nagakabuhi paagi sa iya Espiritu.

← Chapter 1 Jump to: Chapter 3 →