Galatians 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Sang makaligad ang katorse ka tuig, nagbalik ako sa Jerusalem upod kay Bernabe. Gindala ko man si Tito upod sa akon.

2Nagkadto ako didto tungod kay ang Dios nagpahayag sa akon nga kinahanglan magkadto ako. Nagpakighinun-anon ako sa mga pangulo lang sang iglesia, kag ginsaysay ko sa ila ang Maayong Balita nga ginawali ko sa mga Hentil. Indi ako luyag nga ang pagpangabudlay ko sang una ukon karon, manginwalay pulos.

3Si Tito nga upod ko, bisan sia Griego, wala sia ginpilit nga magpatuli,

4bisan pa may mga tawo nga nagpamilit nga tulion sia. Ini nga mga tawo nga nagapakunokuno nga mga utod nagbuylog sa amon grupo sa pagpanilag lang, agod mahibal-an nila ang aton kahilwayan sa aton paghiusa kay Cristo Jesus. Luyag nila kami uliponon.

5Wala gid kami magpasugot sa ila bisan kaisa lang, agod lamang nga matipigan namon ang kamatuoran sang Maayong Balita para sa inyo.

6Pero ang ginkabig nga mga pangulo sang iglesia wala man sang may gindugang sa Maayong Balita nga akon ginawali. Nagsiling ako nga “ginkabig nga mga pangulo sang iglesia” tungod kay wala man sing kinalain sa akon kon sin-o sila, kay ang Dios wala nagahukom suno sa makita sa gwa.

7Sa baylo, nakita nila nga ang Dios naghatag sa akon sing bulohaton sa pagwali sang Maayong Balita sa mga Hentil, kaangay sang paghatag niya kay Pedro sing bulohaton sa pagwali sang Maayong Balita sa mga Judio.

8Kay sa gahom sang Dios ginhimo ako nga isa ka apostol sa mga Hentil subong nga si Pedro ginhimo nga apostol sa mga Judio.

9Si Santiago, si Pedro, kag si Juan, nga ginkabig nga mga pangulo, nagkilala nga ang Dios naghatag sa akon sining pinasahi nga bulohaton. Gani, ginkamusta nila ako kag si Bernabe subong tanda nga kami kaupod sa palangabudlayan. Kag naghilisugot kami tanan nga ako kag si Bernabe magapangabudlay sa mga Hentil kag sila ila sa mga Judio.

10Ang ila lamang ginapangayo amo nga dumdomon namon ang mga imol sa ila grupo, nga amo gid man ang ginatinguhaan ko nga himuon.

11Sang pag-abot ni Pedro sa Antioquia, nagpamatok ako sa iya sa atubang sang mga tumoluo tungod kay maathag gid nga sayop sia.

12Kay sang wala pa makaabot ang mga tawo nga ginpadala ni Santiago didto, nagkaon si Pedro upod sa Hentil nga mga kautoran. Pero sang nakaabot na sila, naghalin sia kag indi na gid sia magkaon upod sa ila tungod kay nahadlok sia sa mga nagasiling nga kinahanglan ang mga Hentil tulion.

13Ang iban nga mga kautoran nga Judio nahadlok man kaangay kay Pedro, kag bisan pa gani si Bernabe nadala man sa ila katalaw.

14Sang makita ko nga wala sila nagaginawi sing nagakaigo suno sa kamatuoran sang Maayong Balita, ginsilingan ko si Pedro sa atubang nila tanan, “Ikaw isa ka Judio, pero nagakabuhi ka subong isa ka Hentil, kag indi subong isa ka Judio. Paano karon ang pagpilit mo sa mga Hentil sa pagkabuhi subong mga Judio?”

15Matuod gid nga natawo kita nga mga Judio, kag indi Hentil nga mga makasasala.

16Pero nakahibalo kita nga ang tawo ginabaton sang Dios paagi sa pagtuo lamang kay Jesu-Cristo, kag indi paagi sa pagtuman sang ginasiling sang Kasugoan. Kita man nagtuo kay Cristo Jesus, agod nga mabaton kita sang Dios paagi sa pagtuo kay Cristo, kag indi paagi sa pagtuman sang ginasiling sang Kasugoan. Kay wala sing tawo nga ginabaton sang Dios paagi sa iya pagtuman sang Kasugoan.

17Karon, kon kita nagahimulat nga pagabatunon sang Dios paagi sa aton paghiusa kay Cristo, masapwan kita nga mga makasasala subong sa mga Hentil. Nagakahulogan bala ini nga si Cristo amo ang nagapaluntad sang sala? Indi ina mahimo!

18Kon akon liwat patindugon ang mga butang nga akon anay ginguba, ina magapamatuod nga ginalapas ko ang Kasugoan.

19Pero kon nahanungod sa Kasugoan, kaangay nga patay ako kag gani wala na ginagamhan sang Kasugoan agod magkabuhi ako para sa Dios. Ginlansang ako sa krus upod kay Cristo,

20gani nga indi na ako ang nagakabuhi, kundi si Cristo amo ang nagakabuhi sa akon. Ini nga kabuhi nga akon ginakabuhi karon, ginakabuhi ko paagi sa pagtuo sa Anak sang Dios nga naghigugma sa akon kag naghatag sang iya kabuhi para sa akon.

21Wala ko ginasikway ang kaayo sang Dios. Kon may isa ka tawo nga ginabaton sang Dios paagi sa Kasugoan, nagakahulogan ini nga ang pagkapatay ni Cristo wala sing pulos!

← Chapter 1 Jump to: Chapter 3 →