Galatians 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Buangbuang nga mga taga-Galacia! Sin-o bala ang nagganyat sa inyo? Sa atubang ninyo ginpaathag ang pagkapatay ni Jesu-Cristo sa krus!

2Sugiri ninyo ako sining isa lang ka butang: nabaton bala ninyo ang Espiritu sang Dios paagi sa pagtuman sang Kasugoan, ukon paagi sa pagpamati kag pagtuo sang Maayong Balita?

3Daw ano ka buangbuang sa inyo! Nagsugod kamo paagi sa Espiritu sang Dios, karon luyag bala ninyo nga tapuson ini paagi sa inyo kaugalingon nga gahom?

4Nanginwalay pulos bala ang tanan ninyo nga inagihan? Matuod gid nga may pulos ini!

5Ginahatagan bala kamo sang Dios sang Espiritu kag ginahimo bala niya ang mga milagro sa tunga ninyo tungod kay nagatuman kamo sang Kasugoan, ukon tungod sang inyo pagpamati kag pagtuo sa Maayong Balita?

6Nahanungod kay Abraham ang kasulatan nagasiling, “Nagtuo sia sa Dios, kag tungod sang iya pagtuo ginbaton sia sang Dios subong isa ka matarong nga tawo.”

7Gani dapat ninyo talupangdon nga ang mga tawo nga may pagtuo amo ang matuod nga mga kaliwat ni Abraham.

8Ginpahayag na nga daan sa kasulatan nga ang Dios magabaton sa mga Hentil paagi sa pagtuo. Gani ang kasulatan nagpahibalo sang Maayong Balita kay Abraham nga nagasiling: “Paagi sa imo pagabendisyunan sang Dios ang tanan nga mga katawhan.”

9Nagtuo si Abraham kag ginbendisyunan sia sang Dios. Gani ang tanan nga nagatuo ginabendisyunan man kaangay kay Abraham.

10Ang nagasalig sa pagtuman sang Kasugoan yara sa idalom sang pagpakamalaut. Kay ang kasulatan nagasiling, “Ang bisan sin-o nga wala nagapadayon sa pagtuman sang tanan nga nasulat sa libro sang Kasugoan ginpakamalaut!”

11Karon, maathag gid nga wala sing tawo nga ginabaton sang Dios paagi sa pagtuman sang Kasugoan, tungod kay ang kasulatan nagasiling, “Ang ginabaton sang Dios paagi sa pagtuo magakabuhi.”

12Pero ang Kasugoan wala nasandig sa pagtuo, kundi ang kasulatan nagasiling, “Ang bisan sin-o nga nagatuman sang tanan nga ginasiling sang Kasugoan magakabuhi paagi sa Kasugoan.”

13Pero si Cristo nga ginpakamalaut tungod sa aton nagtubos sa aton gikan sa pagpakamalaut sang Kasugoan: kay ang kasulatan nagasiling, “Ginapakamalaut ang bisan sin-o nga ginlansang sa krus.”

14Ginhimo ini ni Cristo agod nga ang bendisyon nga ginsaad sang Dios kay Abraham mahatag man sa mga Hentil paagi kay Cristo Jesus, agod nga kita man paagi sa pagtuo, makabaton sang Espiritu nga ginsaad sang Dios.

15Mga kautoran, hatagan ko kamo sing halimbawa nga makita ninyo adlaw-adlaw: kon ang duha ka tawo maghisugot sa isa ka butang kag magpirma sing isa ka kasugtanan, wala sing may makabuhin ukon makadugang sa sina nga kasugtanan.

16Karon, ang Dios nagsaad sa nagkatuhay nga mga tion kay Abraham kag sa iya kaliwat. Ang kasulatan wala nagasiling, “kag sa iya mga kaliwat,” nga kon sayuron, madamo nga mga tawo, kundi nagasiling ini, “kag sa imo kaliwat,” nga kon sayuron isa lamang ka tawo nga amo si Cristo.

17Amo ini ang luyag ko isiling: ang Dios naghimo sing kasugtanan kay Abraham kag nagsaad sa pagtuman sina nga kasugtanan. Ang Kasugoan nga ginhatag sa tapos ang 430 ka tuig, indi makapanghiwala sina nga kasugtanan kag indi makadula sang saad sang Dios.

18Kay kon ang ginahatag sang Dios nasandig sa Kasugoan, ti wala na ini nasandig sa iya saad. Ugaling, ginhatag ini sang Dios kay Abraham, tungod kay iya ini ginsaad sa iya.

19Karon, ano bala ang tinutuyo sang Kasugoan? Gindugang ini sa pagpakita kon ano bala ang paglapas, kag magapadayon ini tubtob lamang sa pag-abot sang kaliwat ni Abraham, nga ginsaaran sini. Ang Kasugoan ginpaalinton sang mga anghel paagi sa isa ka tawo nga manugpatunga.

20Pero ang manugpatunga indi kinahanglan kon may isa lamang ka partido, kag ang Dios isa lamang.

21Nagakahulogan bala ini nga ang Kasugoan batok sa mga saad sang Dios? Wala gid! Kay kon ang isa ka kasugoan ginhatag sa paghatag sing kabuhi sa mga tawo, ti ang tagsa ka tawo mabaton sang Dios paagi sa pagtuman sini.

22Pero ang kasulatan nagasiling nga ang bug-os nga kalibutan yara sa idalom sang gahom sang sala, agod nga mahatag sa mga nagatuo ang ginsaad sang Dios paagi sa pagtuo kay Jesu-Cristo.

23Pero sang wala pa mag-abot ini nga pagtuo, gingapos kita sang Kasugoan subong mga binilanggo tubtob nga ining palaabuton nga pagtuo mapahayag.

24Gani ang Kasugoan amo ang manug-atipan naton tubtob sa pag-abot ni Cristo, agod mabaton kita sang Dios paagi sa pagtuo.

25Karon kay yari na kita sa panag-on sang pagtuo, wala na kita sa idalom sang pag-atipan sang Kasugoan.

26Kay paagi sa pagtuo kamo tanan nangin-anak sang Dios paagi sa paghiusa kay Cristo Jesus.

27Kay ginbautisohan kamo sa paghiusa kay Cristo, gani ginsuklob ninyo ang kinaugali ni Cristo agod manginkaangay niya.

28Gani wala na sing kinatuhay ang mga Judio kag mga Hentil, ang mga ulipon kag mga hilway, ang mga lalaki kag mga babayi. Tanan kamo nangin-isa sa inyo paghiusa kay Cristo Jesus.

29Kon iya kamo ni Cristo, ti mga kaliwat kamo ni Abraham, kag magabaton kamo sang ginsaad sang Dios.

← Chapter 2 Jump to: Chapter 4 →