Galatians 6

Ilonggo (Maayong Balita nga Biblia (2012))

← Chapter 5 Jump to:

1Mga utod ko, kon may isa sa inyo nga masapwan nga nagahimo sing malain, kamo nga mga espirituhanon dapat magtadlong sa iya, pero dapat himuon ninyo ini sa malulo nga paagi. Magbantay man kamo sa inyo kaugalingon, agod nga indi man kamo masulay.

2Magbinuligay kamo sa pagdala sang mga palas-anon sang tagsatagsa, kag sa sini nga paagi matuman ninyo ang sugo ni Cristo.

3Kon may nagahunahuna nga daw si sin-o gid sia, bisan nga waaywaay gid sia, ginabuang lang niya ang iya kaugalingon.

4Ang tagsatagsa mag-usisa sang iya kaugalingon nga pagginawi. Kon maayo ini, ti may kabangdanan sia sa pagpabugal sang iya nahimo nga wala na niya ginapaanggid ini sa ginahimo sang iban.

5Kay ang tagsatagsa dapat magdala sang iya kaugalingon nga palas-anon.

6Ang tawo nga ginatudloan sang Cristohanon nga pagtulon-an dapat man magpaambit sang tanan nga maayo nga mga butang sa iya manunodlo.

7Indi pagbuanga ang inyo kaugalingon. Wala sing isa nga makabuang sa Dios. Kon ano ang ginasab-og sang tawo amo man ang iya pagaanihon.

8Kon nagasab-og sia sang iya tawhanon nga mga kailigbon, gikan sa sina magaani sia sing kamatayon. Kon nagasab-og sia sang Espiritu, gikan sa Espiritu magaani sia sing kabuhi nga wala sing katapusan.

9Gani, indi kita magkataka sa paghimo sing maayo, kay kon magpadayon kita, magaabot ang tion nga magaani kita.

10Gani, sa tagsa ka tion nga may kahigayunan kita, maghimo kita sing maayo sa tanan nga mga tawo kag labi na gid sa aton mga kautoran sa pagtuo.

11Tan-awa ninyo kon daw ano ka dalagku ang mga letra nga ginasulat ko sa inyo karon paagi sa akon kaugalingon nga kamot!

12Ang mga tawo nga nagapakitakita kag nagapahambog nahanungod sang mga butang nga makita, amo ang nagapilit sa inyo sa pagpatuli. Ginahimo nila ini, agod lamang nga indi sila paghingabuton tungod sang krus ni Cristo.

13Kay bisan sila nga nagapatuli wala nagatuman sang Kasugoan. Luyag nila nga matuli kamo agod makapabugal sila nga kamo nagsunod sa sining lawasnon nga seremonya.

14Pero para sa akon, ang akon lamang mapabugal amo ang krus sang aton Ginoong Jesu-Cristo, kay paagi sa iya krus ang kalibutan patay para sa akon kag ako patay man para sa kalibutan.

15Indi kinahanglanon ang pagkatinuli ukon ang pagkadi-tinuli, kundi ang kinahanglanon amo ang pagkabag-o nga tinuga.

16Nahanungod sa mga nagasunod sini nga pagsulondan sa ila pagkabuhi, kabay nga ang paghidait kag ang kaluoy manginyara sa ila, kag sa tanan nga mga katawhan sang Dios!

17Sa katapusan: indi na ninyo ako paggamuha, tungod kay ang mga pinalian nga yari sa akon lawas nagapakita nga ako ulipon ni Jesus.

18Mga kautoran ko, kabay nga ang pagpakamaayo sang aton Ginoong Jesu-Cristo manginyara sa inyo tanan. Kabay pa.

← Chapter 5 Jump to: