Luke 11 — Ilonggo (Maayong Balita nga Biblia (2012))

1Isa sadto ka tion si Jesus nagapangamuyo sa isa ka lugar. Sang pagkatapos niya, ang isa sang iya mga gintuton-an nagsiling sa iya, “Ginoo, tudloi kami sa pagpangamuyo, subong nga si Juan nagtudlo sang iya mga gintuton-an.”

5Kag si Jesus nagsiling sa iya mga gintuton-an, “Abi may isa sa inyo nga magkadto sa balay sang iya abyan sa tungang gab-i kag magsiling sa iya, ‘Abyan, pahulama ako sing tatlo ka bilog nga tinapay,

6kay may abyan ako nga nagapanglakaton nga nag-abot sa akon balay kag wala gid ako sing ipakaon sa iya!’

7Kag abi, ang imo abyan magsabat didto sa sulod sang iya balay, ‘Indi ako pagdisturboha! Sirado na ang pwertahan kag nagahigda na ako kag ang akon mga kabataan. Indi ako magbangon sa paghatag sa imo sing bisan ano.’

8Ti ano karon? Nagasiling ako sa inyo, bisan nga indi sia magbangon sa paghatag sa imo sing tinapay tungod sang inyo pag-abyanay, pero tungod sang imo pagpamilit nga wala gid huyahuya magabangon sia kag magahatag sa imo sang imo tanan nga kinahanglanon.

9Gani nagasiling ako sa inyo: Pangayo kamo, kag kamo magabaton, pangita kamo kag kamo makakita, panuktok kamo kag ang pwertahan pagabuksan sa inyo.

10Kay ang tagsatagsa nga nagapangayo magabaton, kag ang nagapangita makakita, kag ang pwertahan pagabuksan sa iya nga nagapanuktok.

11Kamo nga mga amay, may isa bala sa inyo nga magahatag sa iya bata sing man-og kon ang iya ginapangayo isda?

12Ukon hatagan mo bala sia sing iwiiwi kon ang iya ginapangayo itlog?

13Kon kamo nga mga malaut makahibalo kon paano maghatag sing maayo nga mga butang sa inyo mga kabataan, daw ano pa gid ang inyo Amay nga langitnon. Magahatag sia sang Espiritu Santo sa mga nagapangayo sa iya!”

14Gintabog ni Jesus ang demonyo nga nagpaapa sa isa ka tawo. Sang makagwa ang demonyo sa tawo, ang tawo naghambal. Natingala gid ang mga tawo,

15ugaling ang iban sa ila nagsiling, “Si Beelzebul nga hari sang mga demonyo amo ang naghatag sa iya sing gahom sa pagtabog sa ila.”

16Ang iban luyag magdakupdakop sa iya, gani nagpangayo sila nga maghimo sia sing gamhanan nga buhat sa pagpamatuod nga ang Dios nahamuot sa iya.

17Pero si Jesus nga nakahibalo sang ila mga panghunahuna nagsiling sa ila, “Kon ang mga pumoluyo sang isa ka pungsod nagabinahinbahin kag nagailinaway, ina nga pungsod malaglag. Ang panimalay nga nagabinahinbahin magabuloblag.

18Gani, kon ang ginharian ni Satanas may mga grupo nga nagailinaway, paano bala ini makapadayon? Nagasiling kamo nga nagatabog ako sang mga demonyo tungod sang gahom nga ginhatag sa akon ni Beelzebul.

19Kon nagatabog ako sang mga demonyo paagi kay Beelzebul, sa ano bala nga paagi ang inyo mga sumolunod nagatabog sang mga demonyo? Gani, ang inyo mga sumolunod nagapamatuod nga sayop gid kamo!

20Kay paagi sa gahom sang Dios nagatabog ako sang mga demonyo, kag ini nagapamatuod nga ang paghari sang Dios nakaabot na sa inyo.

21“Kon ang isa ka makusog nga tawo nga sangkap sa hinganiban nagabantay sang iya kaugalingon nga balay, indi maano ang tanan niya nga mga pagkabutang.

22Pero kon gubaton sia sang mas makusog nga tawo sang sa iya kag madaog sia, maagaw sang mas makusog nga tawo ang tanan niya nga mga hinganiban nga iya ginasaligan, kag pamartidahon niya ang iya mga inagaw.

23“Ang bisan sin-o nga wala nagaupod sa akon batok sa akon, kag ang bisan sin-o nga wala nagabulig sa akon sa pagpanipon nagapaaplaag.

24“Kon ang malaut nga espiritu maggwa sa isa ka tawo, nagapanglugayawan sia sa mamala nga mga lugar sa pagpangita sing palahuwayan. Kon wala sia sing may makita, nagasiling sia sa iya kaugalingon, ‘Mabalik ako sa akon balay nga akon ginhalinan.’

25Sa pagbalik niya, iya makita nga ang balay matinlo kag nahimos na.

26Dayon magalakat sia kag manghagad sang pito ka iban nga espiritu nga mas malaut pa sang sa iya. Magasulod sila kag magaestar didto. Gani, sa ulihi ini nga tawo mas magamalaut pa gid sang sa una niya nga kahimtangan.”

27Sang makahambal si Jesus sini, may isa ka babayi sa tunga sang mga tawo nga nagsinggit kag nagasiling sa iya, “Daw ano ka malipayon ang babayi nga nagbusong kag nagbatiti sa imo!”

28Pero si Jesus nagsabat, “Matuod ina, pero daw ano pa gid ka malipayon ang mga nagapamati sang pulong sang Dios kag nagatuman sini!”

29Sang nagatilipon ang mga tawo sa palibot ni Jesus, nagsiling sia, “Daw ano kalaut sang mga tawo sa sini nga mga inadlaw! Nagapangayo sila sing isa ka gamhanan nga buhat, pero wala sing may ihatag sa ila, luas sa palatandaan nga ginhatag ni Jonas.

30Subong nga si Jonas nangintanda para sa mga tawo sa Ninive, amo man ang Anak sang Tawo mangintanda para sa mga tawo sa sini nga mga inadlaw.

31Sa Adlaw sang Paghukom ang Rayna sang Seba magatindog kag magasumbong sang mga tawo sa sini nga mga inadlaw, tungod kay nag-abot sia gikan sa malayo nga lugar sa pagpamati sang kaalam ni Solomon, kag karon nagasiling ako sa inyo, may yari diri nga mas daku pa sang sa kay Solomon.

32Sa Adlaw sang Paghukom ang mga tawo sang Ninive magatindog kag magasumbong sa inyo, tungod kay nag-untat sila sa ila pagpakasala sang pagkabati nila kay Jonas nga nagwali. Karon nagasiling ako sa inyo, may yari diri nga mas daku pa sang sa kay Jonas!”

33“Wala sing tawo nga nagasindi sang suga kag iya ginatago ukon ginatakluban ini sang sulokban, kundi ginabutang niya ini sa tulongtungan, agod nga ang mga nagasulod makakita sang kapawa.

34Ang suga sang imo lawas amo ang imo mga mata. Kon ang imo mga mata maayo, ang bug-os mo nga lawas puno sang kapawa, pero kon ang imo mga mata indi maayo, ang bug-os mo nga lawas puno sang kadudulman.

35Gani maghalong ka basi kon ang kapawa sa imo manginkadudulman.

36Gani, kon ang imo bug-os nga lawas puno sing kapawa, kag wala sing bahin sini nga yara sa kadudulman, ti, ang bug-os mo nga lawas masanag, subong nga ang suga nagaiwag sa imo sang iya kasanag.”

37Sa tapos makahambal si Jesus, may isa ka Fariseo nga nag-agda sa iya sa pagkaon upod sa iya. Gani nagsulod sia sa balay kag nagpungko sa pagkaon.

38Ang Fariseo natingala sang matalupangdan niya nga si Jesus wala magpanghinaw sa wala pa sia magkaon.

39Gani ang Ginoo nagsiling sa iya, “Karon kamo nga mga Fariseo nagahugas sang sa gwa lang sang tasa kag pinggan, pero sa sulod ninyo puno kamo sang kahakog kag kalautan.

40Mga buangbuang! Indi bala nga ang Dios nga naghimo sang sa gwa naghimo man sang sa sulod?

41Pero ihatag sa mga imol ang yara sa sulod sang inyo mga tasa kag pinggan, kag ang tanan manginmatinlo para sa inyo.

42“Makaluluoy man kamo, mga Fariseo! Nagahatag kamo sa Dios sang ikapulo nga bahin sang mga panakot subong sang tanglad, luy-a kag sang tanan nga sahi sang kahuykahoy, pero ginapatumbayaan ninyo ang katarungan kag ang paghigugma sa Dios. Amo ini kuntani ang dapat ninyo himuon, nga wala nagapatumbaya sang iban.

43“Makaluluoy man kamo, mga Fariseo! Naluyagan gid ninyo ang pinasulabi nga mga pulongkuan sa mga sinagoga, kag maluyag man kamo nga tamyawon nga may pagtahod sa mga tiendahan.

44Makaluluoy man kamo, kay kasubong kamo sang mga lulobngan nga wala sing lapida nga ginatapakan sang mga tawo nga wala nila mahibaloi.”

45Ang isa sang mga manunodlo sang Kasugoan nagsiling kay Jesus, “Manunodlo, sa imo pagsiling sini ginainsultohan mo man kami!”

46Si Jesus nagsabat, “Makaluluoy man kamo nga mga manunodlo sang Kasugoan! Ginahatagan nila ang mga tawo sang madamo nga mga katungdanan nga mabudlay tumanon, pero wala man gani sila mismo nagahimo sang bisan diutay lang nga butang sa pagbulig, agod tumanon ini nga mga katungdanan.

47Makaluluoy man kamo! Nagahimo kamo sing matahom nga mga lulobngan para sa mga propeta—ang mga propeta nga ginpamatay sang inyo mga katigulangan.

48Kon amo nagakilala kamo kag nagapasugot sang mga ginbuhat sang inyo mga katigulangan. Kay sila nagpamatay sang mga propeta kag kamo nagahimo sang ila mga lulobngan.

49Gani nasulat sa libro sang Kaalam sang Dios nga nagasiling, ‘Magapadala ako sa ila sing mga propeta kag mga apostoles. Ang iban sini ila pamatyon, kag ang iban ila hingabuton.’

50Gani ang mga tawo sa sini nga mga inadlaw pagasilutan tungod sang kamatayon sang tanan nga mga propeta nga ginpamatay halin pa sang pagtuga sang kalibutan,

51halin sa pagpatay kay Abel tubtob sa pagpatay kay Zacarias nga ginpatay sa gintung-an sang altar kag sang Balaan nga Duog. Huo, nagasiling ako sa inyo, ang mga tawo sini nga panag-on pagasilutan tungod sini tanan!

52“Makaluluoy man kamo nga mga manunodlo sang Kasugoan! Kay gintago ninyo ang yabi nga nagabukas sang pwertahan sang balay sang kinaalam. Kamo inyo indi magsulod kag ginabalabagan ninyo ang nagatinguha sa pagsulod!”

53Sang paghalin ni Jesus sa sadto nga lugar ang mga manunodlo sang Kasugoan kag ang mga Fariseo nagsugod sa pagpakalain sa iya kag sa pagpamangkot sa iya nahanungod sang madamo nga mga butang.

54Nagabantay sila sa iya agod sa pagdakop sa sayop nga iya mahimo mahambal.