Luke 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Sa sadto nga mga adlaw nagmando si Emperador Augusto nga ang tanan nga ginsakpan sang Ginharian sang Roma magpalista.

2Ining nahauna nga pagpanglista nahanabo sang si Quirinio amo ang gobernador sang Siria.

3Gani ang tagsatagsa nagpauli sa iya kaugalingon nga banwa sa pagpalista.

4Halin sa banwa sang Nazaret sa Galilea, si Jose nagkadto sa Judea, sa banwa nga ginatawag Betlehem, sa diin natawo si Haring David. Nagkadto sia didto tungod kay sia kaliwat ni David.

5Nagpalista sia upod kay Maria nga kalasalon na sa iya. Nagabusong na si Maria,

6kag samtang didto sila sa Betlehem nag-abot ang tion nga inugbata na niya.

7Nagbata sia sang iya panganay nga lalaki. Ginputos niya ini sang lampin kag ginpahigda sa isa ka pasungan kay wala na sing lugar para sa ila sa balay nga dalayunan.

8Sa sadto man nga lugar may mga manugbantay sang mga karnero nga nagapulaw sa latagon sa bilog nga gab-i sa pagbantay sang ila mga panong.

9Ang isa ka anghel sang Ginoo nagpakita sa ila, kag ang masanag nga kapawa sang Ginoo nagsilak sa ila. Hinadlukan gid sila,

10pero ang anghel nagsiling sa ila, “Indi kamo magkahadlok! Kay nag-abot ako sa pagdala sa inyo sing maayong balita nga magahatag sing daku nga kalipay sa tanan nga mga tawo.

11Karon gid nga adlaw natawo sa banwa ni David ang inyo Manluluwas, ang Cristo nga Ginoo!

12Amo ini ang tanda para sa inyo: makita ninyo ang isa ka lapsag nga naputos sang lampin kag nagahigda sa isa ka pasungan.”

13Sa hinali nagpakita ang isa ka daku nga grupo sang mga anghel sang langit kag nagbuylog sa sadto nga anghel kag nagkanta sila sini nga mga pagdayaw sa Dios:

14“Dayawa ang Dios sa kalangitan, kag paghidait sa duta sa mga tawo nga iya nahamut-an!”

15Sang makahalin na ang mga anghel pabalik sa langit, ang mga manugbantay sang mga karnero nagsinilingay, “Dali makadto kita sa Betlehem kag tan-awon ta ining butang nga nahanabo nga ginpahayag sang Ginoo sa aton.”

16Gani, naglakat sila nga nagadalidali kag nakita nila si Maria kag si Jose, subong man ang lapsag nga nagahigda sa isa ka pasungan.

17Sang makita sang mga manugbantay ang lapsag, ginpanugid nila ang ginhambal sa ila sang anghel nahanungod sini nga bata.

18Ang tanan nga nakabati sini natingala gid sang ginpanugid sa ila sang mga manugbantay sang mga karnero.

19Pero gintipigan ni Maria ini nga mga butang kag ginpamalandungan sa iya tagipusoon.

20Ang mga manugbantay sang mga karnero nagbalik nga nagakanta sang mga pagdayaw sa Dios tungod sang tanan nga ila nabatian kag nakit-an, suno gid sa ginhambal sang anghel sa ila.

21Sa ikawalo nga adlaw, sang mag-abot na ang tion nga pagatulion ang lapsag, ginhingalanan sia kay Jesus, ang ngalan nga ginhatag sang anghel sa wala pa sia ginpanamkon sang iya iloy.

22Nag-abot ang tion nga si Jose kag si Maria kinahanglan magtuman sang seremonya sang pagpaninlo suno sa Kasugoan ni Moises. Gani, gindala nila ang bata sa Jerusalem agod ihalad sia sa Ginoo.

23Kay nasulat sa kasugoan sang Ginoo, “Ang tagsa ka panganay nga lalaki ihalad sa Ginoo.”

24Nagdulot man sila sing halad suno sa nasiling sa kasugoan sang Ginoo, “Isa ka pares sang tukmo, ukon duha ka kuyabog nga mga pating.”

25Sa sadto nga tion may tawo nga nagaestar sa Jerusalem nga ang iya ngalan si Simeon. Ini nga tawo matarong kag matinuohon sa Dios, kag nagahulat sang pagluwas sa Israel. Ang Espiritu Santo yara sa iya,

26kag nagpasalig sa iya nga indi sia mapatay sa wala pa niya makita ang ginsaad sang Ginoo nga Cristo.

27Sa pagtuytoy sang Espiritu, si Simeon nagkadto sa Templo. Sang gindala ang bata nga si Jesus sang iya mga ginikanan sa Templo agod himuon sa iya ang ginasiling sang Kasugoan,

28ginkugos ni Simeon ang bata kag nagpasalamat sia sa Dios nga nagasiling:

29“Karon, O Ginoo, gintuman mo ang imo saad, kag mapataliwan mo na ang imo alagad sa paghidait.

30Kay ang akon mga mata nakakita sang imo kaluwasan,

31nga gin-aman mo sa atubang sang tanan nga mga katawhan:

32Isa ka kapawa nga magapahayag sang imo kabubot-on sa mga Hentil, kag magadala sang kadungganan sa imo mga tawo nga Israelinhon.”

33Ang amay kag iloy sang bata natingala gid sang ginpanghambal ni Simeon nahanungod sa iya.

34Si Simeon nagbendisyon sa ila kag nagsiling kay Maria nga iloy sang bata, “Ini nga bata ginpili sang Dios nga manginkalaglagan kag manginkaluwasan sang madamo sa Israel. Sia mangintanda halin sa Dios nga pagakontrahon sang madamo,

35kag magapahayag sang ila tinago nga mga panghunahuna. Kag ang kalisod, subong sang isa ka matalom nga espada, magatuhog sang imo kaugalingon nga tagipusoon.”

36May propeta nga babayi nga si Ana nga anak ni Fanuel gikan sa tribo ni Aser. Sia isa ka tigulang nga pito ka tuig lang ang ila pagpuyo sang iya bana kag mabalo sia.

37Otsentay kwatro na ka tuig ang iya edad kag wala gid sia maghalin sa Templo. Sa adlaw kag gab-i nagasimba sia sa Dios nga nagapuasa kag nagapangamuyo.

38Sa sadto gid nga takna nag-abot sia kag nagpasalamat sa Dios, kag nagpanugid sia nahanungod sa bata sa tanan nga mga tawo nga nagahulat sang paghilway sang Dios sa Jerusalem.

39Sang matuman na ni Jose kag ni Maria ang tanan suno sa Kasugoan sang Ginoo, nagbalik sila sa Nazaret sa ila ginaestaran nga banwa sa Galilea.

40Ang bata nagtubo kag nagbakod, nga napun-an sang kaalam, kag ang Dios nahamuot sa iya.

41Tuigtuig ang mga ginikanan ni Jesus nagakadto sa Jerusalem sa Piesta sang Pascua.

42Sang dose na ka tuig ang edad ni Jesus nagpamiesta sila subong sang kinaandan nga ginahimo nila.

43Sang tapos na ang piesta nagpauli sila, pero ang bata nga si Jesus nagpabilin sa Jerusalem nga wala matalupangdi sang iya mga ginikanan.

44Naghunahuna sila nga yara man lang sia upod sa ila mga kaupdanan, gani nakapanglakaton na sila sing isa ka adlaw kag dayon ginpangita nila sia sa ila mga pariente kag mga abyan.

45Wala nila sia makita, gani nagbalik sila sa Jerusalem sa pagpangita sa iya.

46Sa ikatlo nga adlaw nakita nila sia sa Templo nga nagapungko upod sa mga manunodlo nga Judio nga nagapamati kag nagapamangkot sa ila.

47Ang tanan nga nakabati sa iya natingala gid sa iya kaalam kag mga sabat.

48Natingala ang iya mga ginikanan sang makita nila sia, kag ginsingganan sia sang iya iloy, “Noy, ngaa man nga ginhimo mo ini sa amon? Tan-awa bala, nalisdan gid kami ni tatay mo sa pagpangita sa imo.”

49Nagsabat sia sa ila, “Ngaa bala nga ginapangita gid ninyo ako? Wala bala kamo makahibalo nga kinahanglan nga yara ako sa balay sang akon Amay?”

50Pero wala sila makahangop sang ginhambal niya sa ila.

51Gani si Jesus nag-upod sa ila pabalik sa Nazaret, sa diin nagmatinumanon sia sa ila. Ang iya iloy nagtipig sini tanan nga mga butang sa iya tagipusoon.

52Si Jesus nagtubo sa panglawason kag sa kaalam kag nahamut-an sang Dios kag sang mga tawo.

← Chapter 1 Jump to: Chapter 3 →