Mark 1

Ilonggo (Maayong Balita nga Biblia (2012))

Jump to: Chapter 2 →

1Ini ang Maayong Balita nahanungod kay Jesu-Cristo, ang Anak sang Dios.

2Nagsugod ini subong sang ginsiling sang Dios sa libro nga ginsulat ni Isaias nga propeta: “Yari ang akon manugbalita, ipadala ko sia sing una sa imo sa pag-aman sang imo alagyan.

3May nagawali sing mabaskog sa desierto: ‘Amana ninyo ang alagyan para sa Ginoo, maghimo sing tadlong nga dalan nga iya pagaagyan.’”

4Gani, si Juan nga manugbautiso nagpakita sa desierto, nga nagabautiso kag nagawali sini nga mensahe nga nagasiling sa mga tawo: “Untati ninyo ang pagpakasala kag magpabautiso kag ang Dios magapatawad sang inyo mga sala.”

5Madamo sang mga taga-Judea kag mga taga-Jerusalem ang nagkadto sa pagpamati sa iya. Gintuad nila ang ila mga sala kag ginbautisohan niya sila sa Suba sang Jordan.

6Ang bayu ni Juan nahimo sa bulbol sang kamelyo, ang iya paha panit, kag ang iya pagkaon apan kag dugos halin sa talon.

7Ang iya ginpahibalo sa mga tawo amo ini: “Ang magaabot nga ulihi lang sa akon mas gamhanan pa sang sa akon, sa bagay nga indi gani ako takos magduko sa paghubad sang higot sang iya sandalyas.

8Ako nagabautiso sa inyo sang tubig, pero sia magabautiso sa inyo sang Espiritu Santo.”

9Sa wala lamang madugay, nag-abot si Jesus gikan sa Nazaret nga sakop sang Galilea, kag ginbautisohan sia ni Juan sa Jordan.

10Sang pagtakas gid ni Jesus sa tubig nakita niya nga nag-abri ang langit kag nagkunsad ang Espiritu Santo sa iya kaangay sang isa ka pating.

11Kag may tingog nga nabatian gikan sa langit: “Ikaw ang akon hinigugma nga Anak. Nalipay gid ako sa imo.”

12Sa gilayon ginpakadto sia sang Espiritu Santo sa desierto sa diin

13nagtener sia didto sing kwarenta ka adlaw kag ginsulay sia ni Satanas. May mga sapat man nga talunon didto, pero nag-abot ang mga anghel kag nagbulig sa iya.

14Sang nabilanggo na si Juan, si Jesus nagkadto sa Galilea kag nagwali sang Maayong Balita gikan sa Dios.

15Nagsiling sia, “Nag-abot na ang nagakaigo nga tion, kag ang paghari sang Dios malapit na! Untati ninyo ang pagpakasala, kag magpati sa Maayong Balita!”

16Sang nagalakat si Jesus sa higad sang Linaw sang Galilea, nakita niya ang duha ka mga mangingisda, si Simon kag ang iya utod nga si Andres, nga nagapamukot sa linaw.

17Si Jesus nagsiling sa ila, “Upod kamo sa akon kay tudloan ko kamo sa pagpangisda sang mga tawo.”

18Sa gilayon ginbayaan nila ang ila mga pukot kag nag-upod sa iya.

19Nagpadayon si Jesus sa paglakat kag sa ulounhan nakita niya ang duha pa gid ka mag-utod nga amo sanday Santiago kag Juan, nga mga anak ni Zebedeo. Didto sila sa ila sakayan nga nagaaman sang ila mga pukot.

20Sang pagkakita ni Jesus sa ila sa gilayon gintawag niya sila. Ginbayaan nila ang ila amay nga si Zebedeo sa sakayan upod sang mga sinuholan nga mga tawo kag nag-upod sila kay Jesus.

21Nag-abot sila sa banwa sang Capernaum, kag sa masunod nga Adlaw nga Inugpahuway nagsulod si Jesus sa sinagoga kag nagpanudlo.

22Ang mga tawo nga nakabati sa iya natingala sang iya pagpanudlo kay nagpanudlo sia nga may awtoridad kag indi sia pareho sang mga manunodlo sang Kasugoan.

23Sa amo gid nga tion nagsulod sa sinagoga ang isa ka tawo nga may malaut nga espiritu kag nagsinggit,

24“Ano ang labot mo sa amon, Jesus nga taga-Nazaret? Nag-abot ka bala sa paglaglag sa amon? Nahibal-an ko kon sin-o ka. Ikaw ang Balaan nga ginpadala sang Dios!”

25Ginmanduan ni Jesus ang espiritu: “Maghipos ka kag maggwa sa tawo.”

26Ginpakurog sang malaut nga espiritu ang tawo, ginpasinggit sing tudo kag naggwa sa tawo.

27Ang tanan nga mga tawo natingala gid, sa bagay nga nagpinamangkutanay sila, “Ano ini? Bag-o bala ini nga pagtulon-an? Ini nga tawo may awtoridad bisan pa sa pagsugo sang malaut nga mga espiritu, kag nagatuman sila sa iya.”

28Gani, ang balita nahanungod kay Jesus naglapnag sing madasig sa bug-os nga probinsya sang Galilea.

29Naggwa si Jesus kag ang iya mga gintuton-an sa sinagoga nga upod si Santiago kag si Juan kag nagkadto dayon sa balay ni Simon kag ni Andres.

30Ang ugangan nga babayi ni Simon nagahigda nga may hilanat, kag sang pag-abot gid ni Jesus ginsugiran sia nahanungod sa iya.

31Ginpalapitan sia ni Jesus, gin-uyatan sa kamot kag ginpabangon. Nag-ayo sia kag nag-amuma sa ila.

32Sang sirom na, sa tapos nagtunod ang adlaw, ang mga tawo nagdala kay Jesus sang tanan nga mga masakiton kag sang mga ginagamhan sang mga demonyo.

33Ang tanan nga mga pumoluyo sang banwa nagtilipon sa atubangan sang balay.

34Si Jesus nagpang-ayo sing madamo nga mga tawo nga may mga nagakalainlain nga mga balatian kag nagtabog man sia sang madamo nga mga demonyo. Wala niya pagtugoti nga maghambal ang mga demonyo, tungod kay nahibal-an nila kon sin-o sia.

35Madulomdulom pa sang masunod nga aga, si Jesus nagbangon kag naggwa pakadto sa naligwin nga lugar sa diin sia nagpangamuyo.

36Pero si Simon kag ang iya mga kaupdanan nagpinangita sa iya.

37Sang makita nila sia nagsiling sila, “Ginapangita ka sang tanan.”

38Pero nagsabat si Jesus: “Kinahanglan kita magkadto sa kaingod nga mga banwa. Kinahanglan magwali man ako didto tungod kay amo ini ang kabangdanan sang akon pag-abot.”

39Gani ginlibot ni Jesus ang bug-os nga Galilea kag nagwali sa ila mga sinagoga kag nagtabog sang mga demonyo.

40May isa ka aruon nga nagpalapit kay Jesus, nagluhod sa iya atubang kag nagpangayo sing bulig. Nagsiling sia: “Kon gusto mo, sarang mo ako maayo.”

41Si Jesus nagbatyag sing daku nga kaluoy, nag-untay sang iya kamot, kag gintandog sia. Nagsabat sia sa iya, “Gusto ko gid. Mag-ayo ka!”

42Sa gilayon nadula ang iya aro kag nag-ayo sia.

43Dayon ginpaandaman gid sia ni Jesus kag ginpalakat gilayon,

44sa tapos sia mahambalan sini: ‘Tandai, indi mo ini pag-isugid bisan kay sin-o kundi magkadto ka sa pari kag magpatan-aw sang imo kaugalingon sa iya. Magdulot ka dayon sing halad suno sa sugo ni Moises, sa pagpamatuod sa tanan nga ikaw nag-ayo na.”

45Pero naglakat ang tawo kag ginpanugid niya ang pag-ayo sa iya ni Jesus bisan diin sia magkadto. Madamo gid ang iya ginsugiran, sa bagay nga si Jesus indi na makasulod sing hayag sa banwa. Gani nagtener sia sa baw-ing nga mga lugar, pero padayon gihapon ang pagkadto sang mga tawo sa iya halin sa nagakalainlain nga mga lugar.

Jump to: Chapter 2 →