Mark 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Sa liwat si Jesus nagpanudlo sa higad sang Linaw sang Galilea. Tama gid kadamo ang mga tawo nga nagtilipon sa palibot niya sa bagay nga nagsakay sia sa isa ka sakayan nga nagalutaw sa tubig kag nagpungko sia sa sini samtang ang madamo nga mga tawo nagpabilin sa bibi sang linaw.

2Si Jesus naggamit sang mga palaanggiran sa pagtudlo sa ila sang madamo nga mga butang, kag sa iya pagpanudlo nagsiling sia sa ila:

3“Magpamati kamo! May isa ka tawo nga naglakat sa pagsab-og.

4Sang pagsab-og niya sang binhi, ang iban nagtupa sa dalan, kag nagdapo ang mga pispis kag nagtuka sini.

5Ang iban nagtupa sa batuhon nga lugar, sa diin hapaw lamang ang duta. Sa wala lang madugay nagtubo ang binhi tungod kay manabaw ang duta.

6Sang udtong adlaw na, nalayong ang bag-ong tubo nga mga tanom, kag bangod kay indi gid madalom ang gamot sini, ang tanom madali nga nalaya.

7Ang iban nga binhi nagtupa sa duta nga may mga talungon. Nagtubo ang mga talungon kag naglumos sang tanom kag wala ini magpamunga.

8Pero ang iban nga binhi nagtupa sa maayo nga duta, namuhi, nagtubo kag nagpamunga: ang iban sini nagpatubas sing traynta ka pilo, ang iban sini sesenta ka pilo, kag ang iban sini 100 ka pilo.”

9Kag si Jesus nagsiling, “Gani, magpamati kamo, kon may mga dulonggan kamo!”

10Sang nagaisahanon na lang si Jesus, ang iban nga nakabati sa iya nagpalapit upod sa dose ka mga apostoles kag nagpangabay nga ipaathag niya ang mga palaanggiran.

11Si Jesus nagsabat sa ila, “Sa inyo nahatag ang tinago nahanungod sang paghari sang Dios, pero ang iban nga indi katapo sini magapamati sini tanan paagi sa mga palaanggiran,

12agod nga, ‘Magatulok nga magatulok sila, pero indi makakita, magapamati nga magapamati sila, pero indi makahangop, kay kon makahangop sila basi magliso sila sa Dios kag patawaron niya sila.’”

13Dayon si Jesus nagpamangkot sa ila, “Indi bala kamo makahangop sini nga palaanggiran? Karon, paano abi ang pagkahangop ninyo sang bisan ano nga palaanggiran?

14Ang manugsab-og nagsab-og sang pulong sang Dios.

15Ang iban nga mga tawo kaangay sang binhi nga nagtupa sa dalan: sang pagkabati nila sang pulong sang Dios, sa gilayon nagaabot si Satanas kag nagaagaw sang pulong nga ginsab-og sa ila.

16Ang iban nga mga tawo kaangay sang binhi nga nagtupa sa batuhon nga duta. Sang pagkabati nila sang pulong sang Dios, sa gilayon ginbaton nila ini sang malipayon.

17Pero wala ini nagatudok sa ila tagipusoon, kag wala nagapabilin sing madugay. Gani sa gilayon wala na sila nagapadayon kon mag-abot ang mga pag-antos ukon mga paghingabot tungod sang pulong sang Dios.

18Ang iban nga mga tawo kaangay sang binhi nga ginsab-og sa duta nga may mga talungon. Ini sila amo ang nakabati sa pulong sang Dios,

19pero ang palaligban sang pangabuhi, ang paghigugma sa manggad, kag ang paghandom sa iban nga mga butang nagaginutok sa ila mga tagipusoon kag nagalumos sang pulong sang Dios, kag wala ini nagapamunga.

20Pero ang iban nga mga tawo kaangay sang binhi nga ginsab-og sa maayo nga duta. Nagapamati sila sa pulong sang Dios, ginabaton nila ini, kag nagapamunga: ang iban traynta ka pilo, ang iban sesenta ka pilo kag ang iban 100 ka pilo.”

21Si Jesus nagpadayon: “May nagadala bala sing suga kag nagabutang sini sa idalom sang isa ka sulodlan, ukon sa idalom sang katre? Wala bala niya ini ginabutang sa tulongtungan?

22Ang bisan ano nga ginatago, igapahayag kag ang bisan ano nga ginatabunan, pagabuksan.

23Gani, kon sin-o ang luyag magpamati, magpamati sia!”

24Kag si Jesus nagsiling pa gid sa ila, “Talupangda gid ang inyo ginapamatian! Ang talaksan nga inyo ginagamit sa paghukom sa iban amo man ang pagagamiton sang Dios sa paghukom sa inyo, kag sobra pa sini ang pagahimuon sa inyo.

25Ang tawo nga may iya na pagahatagan pa gid, kag ang tawo nga wala sing iya, bisan ang diutay nga yara sa iya pagakuhaon pa.”

26Nagsiling pa gid si Jesus, “Ang paghari sang Dios kaangay sang tawo nga nagsab-og sang binhi sa iya uma.

27Nagatulog sia kon gab-i, kag kon adlaw nagaobra sia, samtang ang tanom sa binhi nagaulhot kag nagatubo, pero wala sia kahibalo kon paano ang pagkahimo sini.

28Ang duta mismo nagapatubo kag nagapabunga sang mga tanom, nahauna ang dahon, madason ang uhay, kag sa ulihi ang matinggas nga bunga.

29Kon ang bunga gulang na, nagapadala sia sing manuggarab, tungod kay ang tig-alani nag-abot na.”

30Si Jesus nagpamangkot, “Sa ano bala mapaanggid ang paghari sang Dios? Ano nga palaanggiran ang aton gamiton sa pagpaathag sini?

31Kaangay ini sang isa ka binhi sang mustasa, ang labing diutay nga binhi sa kalibutan, kag ginatanom ini sa duta.

32Dayon nagatubo ini kag nagadaku sing labaw sa mga kahuykahoy. Ang iya mga sanga nagadalagku sa bagay nga ang mga pispis nagahapon kag nagapugad sa iya mga sanga nga mahandong.”

33Paagi sa mga palaanggiran nga kasubong sini, nagwali si Jesus sa mga tawo sang pulong sang Dios. Naghambal sia sa ila suno sa ila mahangpan.

34Wala sia naghambal sa ila kon indi paagi sa mga palaanggiran. Pero kon silahanon lang sang iya mga gintuton-an, ginasaysay niya ang tanan sa ila.

35Sang sirom na sang amo nga adlaw, nagsiling si Jesus sa iya mga gintuton-an, “Dali, matabok kita sa pihak sang linaw.”

36Gani ginbayaan nila ang madamo nga mga tawo. Ang mga gintuton-an nagsakay sa sakayan nga ginasakyan na ni Jesus, kag gindala nila sia upod sa ila. May iban man nga mga sakayan didto.

37Sa hinali nagmadlos ang hangin kag ang mga balod nagsulod sa sakayan sa bagay nga madali na lang ini makapan.

38Pero si Jesus didto sa pangulihi nga bahin sang sakayan nga nagaulon sa ulonan kag nagakatulog. Ginpukaw sia sang mga gintuton-an, kag nagsiling sila sa iya, “Manunodlo, wala ka bala nagakabalaka nga daw malunod na kita?”

39Nagbangon si Jesus kag ginmanduan niya ang hangin, “Maglinong ka!” kag nagsiling sia sa mga balod, “Maglinaw ka!” Dayon naglinong kag naglinaw.

40Dayon si Jesus nagsiling sa ila, “Ngaa bala nahadlok gid kamo? Ano, wala pa bala kamo sing pagtuo?”

41Pero tama gid ang ila kahadlok, kag nagpinamangkutanay sila: “Sin-o bala ini nga tawo? Bisan pa ang hangin kag ang mga balod nagatuman sa iya!”

← Chapter 3 Jump to: Chapter 5 →