Mark 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Kag nagpadayon sia sa pagsiling, “Dumdoma ninyo ini! May mga yari diri nga indi mapatay tubtob nga makita nila ang pag-abot sang paghari sang Dios nga may gahom.”

2Sang makaligad ang anom ka adlaw, gindala ni Jesus si Pedro, si Santiago, kag si Juan upod sa iya sa pagtaklad sa isa ka mataas nga bukid nga silahanon lang. Samtang nagatan-aw sila, nagbalhin ang dagway ni Jesus,

3kag ang iya bayu nanginmakasililaw sa kaputi. Wala sing bisan sin-o sa kalibutan nga makapaputi sang bayu kaangay sini.

4Dayon nakita sang tatlo ka gintuton-an si Elias kag si Moises nga nagapakighambal kay Jesus.

5Si Pedro naghambal kag nagsiling kay Jesus, “Manunodlo, maayo gid nga yari kita diri! Mahimo kami sing tatlo ka tolda, isa para sa imo, isa para kay Moises, kag ang isa para kay Elias.”

6Si Pedro wala makahibalo kon ano ang iya isiling tungod kay sia kag ang iya mga kaupdanan kinulbaan gid.

7Dayon nag-abot ang panganod kag ginlikupan sila, kag gikan diri may tingog sila nga nabatian, “Ini amo ang akon gid hinigugma nga Anak. Pamatii ninyo sia!”

8Maabtik sila nga nanghulonghulong, pero wala sila sing iban nga nakita luas lamang kay Jesus.

9Sang nagadulhog sila sa bukid, si Jesus nagmando sa ila, “Indi kamo magpanugid bisan kay sin-o sang inyo nakit-an, tubtob nga mabanhaw ang Anak sang Tawo.”

10Gintuman nila ang ginmando ni Jesus, pero sang silahanon lang nagpinamangkutanay sila, “Ano ang kahulogan sining ‘mabanhaw sia’?”

11Kag ginpamangkot nila si Jesus, “Ngaa bala nagasiling ang mga manunodlo sang Kasugoan nga kinahanglan mag-abot anay sing una si Elias?”

12Nagsabat sia, “Si Elias kinahanglan mag-abot anay sing una sa pag-aman sang tanan. Pero ngaa bala ang mga Kasulatan nagasiling nga ang Anak sang Tawo magaantos sing tuman kag pagasikwayon?

13Pero nagasiling ako sa inyo nga si Elias nakaabot na, kag ginhimo sang mga tawo sa iya ang tanan nga luyag nila, suno sa ginasiling sang mga Kasulatan nahanungod sa iya.”

14Sang nakabalik na sila sa iban nga mga gintuton-an, nakita nila nga may madamo gid nga mga tawo nga nagapalibot didto. May mga manunodlo sang Kasugoan nga nagapakigbais sa iban nga mga gintuton-an.

15Sang pagkakita sang mga tawo sa kay Jesus, natingala gid sila kag nagdalagan sila pakadto sa iya, kag gintamyaw sia.

16Si Jesus nagpamangkot sa iya mga gintuton-an, “Ano bala ang ginabaisan ninyo sang mga manunodlo sang kasugoan?”

17May isa ka tawo sa mga nagtilipon nga nagsabat, “Manunodlo, gindala ko sa imo ining akon anak nga lalaki tungod kay ginagamhan sia sang malaut nga espiritu kag indi sia makahambal.

18Kon ginasakit sia sang malaut nga espiritu, ginalampos sia sa duta kag nagabura ang iya baba, nagabagrot ang iya mga ngipon, kag nagatiskog ang bug-os niya nga lawas. Ginpangabay ko ang imo mga gintuton-an sa pagtabog sini nga espiritu, pero indi sila makasarang.”

19Si Jesus nagsiling sa ila, “Ay, mga tawo nga wala sing pagtuo! Tubtob san-o pa bala ako dapat magpakig-upod sa inyo? Tubtob san-o pa bala ang akon pagbatas sa inyo? Dal-a diri sa akon ang bata!”

20Kag gindala nila ang bata kay Jesus. Sang pagkakita sang malaut nga espiritu sa kay Jesus, ginpakurog niya ang bata sa bagay nga natumba sia sa duta kag nagligid nga nagabura ang baba.

21Ginpamangkot ni Jesus ang amay sang bata, “Kasan-o pa nga nagsubong sia sini?” Ang amay nagsabat, “Halin sang diutay pa sia.

22Makapila na gintinguhaan sang malaut nga espiritu nga patyon sia paagi sa paghaboy sa iya sa kalayo kag sa pagtagbong sa iya sa tubig. Kaluoyi kag buligi kami, kon makasarang ka!”

23Si Jesus nagsabat, “Ngaa nagasiling ka, Kon makasarang ka? Ang tanan mahimo sa tawo nga nagatuo.”

24Ang amay sa gilayon nagsinggit, “Nagatuo ako, pero kulang pa. Dugangi ang akon pagtuo!”

25Sang makita ni Jesus nga nagadinaguso ang mga tawo pakadto sa ila, nagmando sia sa malaut nga espiritu, “Bungol kag apa nga espiritu, ginamanduan ko ikaw, gwa ka sa bata kag indi ka na gid magbalik sa iya liwat!”

26Nagsinggit ang malaut nga espiritu, iya ginpakurog sing tuman ang bata kag naggwa. Daw bangkay tan-awon ang bata, gani ang kalabanan sang mga tawo didto nagsiling, “Patay na sia!”

27Pero gin-uyatan ni Jesus sa kamot ang bata kag ginpabangon, kag nagtindog ang bata.

28Sang nakasulod na si Jesus sa balay, nagpamangkot ang mga gintuton-an sa iya sing tago, “Ngaa bala nga indi kami amon makatabog sining malaut nga espiritu?”

29Nagsabat si Jesus, “Indi kamo makatabog sini nga sahi sang malaut nga espiritu kon indi kamo magpangamuyo.”

30Naghalin si Jesus kag ang iya mga gintuton-an sa sadto nga lugar kag nagpadayon sa paglakat nga nagaagi sa Galilea. Indi luyag ni Jesus nga mahibaluan sang iban kon diin sia,

31tungod kay nagapanudlo sia sa iya mga gintuton-an nga nagasiling, “Ang Anak sang Tawo igatugyan sa mga tawo nga magapatay sa iya, pero sa tapos ang tatlo ka adlaw, mabanhaw sia.”

32Wala sila makahangop kon ano ang kahulogan sang iya ginasiling, pero nahadlok sila sa pagpamangkot sa iya.

33Nag-abot sila sa Capernaum, kag sang nakasulod na si Jesus sa balay, nagpamangkot sia sa iya mga gintuton-an, “Ano bala ang ginbaisan ninyo sa dalanon?”

34Pero wala sila magsabat sa iya kay man ang ila ginbaisan sa dalanon amo nga kon sin-o sa ila ang labing daku.

35Nagpungko si Jesus kag gintawag niya ang dose ka mga apostoles kag nagsiling sa ila, “Ang bisan sin-o nga luyag mangin-una sa tanan, dapat magpaulihi sa tanan kag manginsuloguon sang tanan.”

36Dayon nagkuha sia sing isa ka bata kag ginpatindog sa atubang nila. Ginkugos niya ini kag nagsiling sa ila,

37“Ang bisan sin-o nga nagabaton sang isa sining mga bata sa akon ngalan, nagabaton sa akon, kag ang bisan sin-o nga nagabaton sa akon, wala lamang nagabaton sa akon, kundi nagabaton man sang nagpadala sa akon.”

38Si Juan nagsiling sa iya, “Manunodlo, nakakita kami sang isa ka tawo nga nagatabog sang mga demonyo sa imo ngalan, kag gintapna namon sia tungod kay indi sia kaupod naton.”

39Si Jesus nagsiling, “Pabay-i lang ninyo sia tungod kay wala sing may nagahimo sing milagro paagi sa akon ngalan kag makahambal dayon sing malaut batok sa akon.

40Kay ang bisan sin-o nga indi batok sa aton kaapin naton.

41Dumdoma ninyo ini! Ang bisan sin-o nga nagapainom sa inyo sing tubig, tungod kay iya kamo ni Cristo magabaton gid sing balos.

42“Ang bisan sin-o nga manginkabangdanan sang pagbiya sa pagtuo sa akon sang isa sining mga katawhan nga nagasalig sa akon kaangay sang mga kabataan, mas maayo pa sa sina nga tawo nga ihigot ang galingan nga bato sa iya liog kag itagbong sia sa dagat.

43Gani, kon ang imo kamot manginkabangdanan sang imo pagbiya sa imo pagtuo, utda ini! Mas maayo pa nga magsulod ka sa langit nga wala na ang isa mo ka kamot sang sa duha ang imo kamot kag itagbong ka sa impierno, sa kalayo nga wala nagakapalong.

44Kag kon ang isa mo ka tiil manginkabangdanan sang imo pagbiya sa imo pagtuo, utda ini! Mas maayo pa nga magsulod ka sa langit nga isa lang ang imo tiil sang sa duha ang imo tiil kag itagbong ka sa impierno.

45Kag kon ang imo mata manginkabangdanan sang imo pagbiya sa imo pagtuo, lukata ini! Mas maayo pa nga magsulod ka sa Ginharian sang Dios nga isa lang ang imo mata sang sa duha ang imo mata kag itagbong ka sa impierno.

46Didto ‘ang mga ulod nga nagaut-ot sa ila kalawasan wala nagakapatay kag ang kalayo nga nagasunog sa ila wala nagakapalong.’

47“Ang tagsatagsa pagaputli-on sa kalayo subong sang halad nga ginaputli sang asin.

48“Ang asin maayo, pero kon madula ang iya kaarat paano ini mapaasin liwat? “Mag-angkon sang asin sang pag-abyanay sa inyo mga kaugalingon, kag magpakighidait kamo sa isa kag isa.”

← Chapter 8 Jump to: Chapter 10 →