Ruth 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Si Noemi may isa ka pariente nga ginahingalanan kay Boaz. Isa sia ka manggaranon kag kinilala nga tawo nga katapo sang panimalay sang bana ni Noemi nga si Elimelec.

2Isa ka adlaw si Ruth nga taga-Moab nagsiling kay Noemi, “Tugoti ako sa pagkadto sa uma sa pagpanaghaw. Mangita ako sing tawo nga magatugot sa akon sa pagpanaghaw sang biya niya.” Si Noemi nagsabat, “Sigi, maglakat ka, anak ko.”

3Gani si Ruth nagkadto sa uma kag nagsunod sa agi sang mga mangangani. Ginpanaghaw niya ang mga uhay nga nabiyaan nila. Natabuan nga nakakadto sia sa uma nga ginapanag-iyahan ni Boaz nga pariente ni Elimelec.

4Sang ulihi, si Boaz mismo nag-abot halin sa Betlehem kag gintamyaw niya ang mga mangangani, “Ang Ginoo magaupod sa inyo!” Nagsabat sila, “Ang Ginoo magbendisyon sa imo!”

5Dayon si Boaz nagpamangkot sa iya alagad nga iya ginpadumala sa mga mangangani, “Sin-o inang pamatan-on nga babayi?”

6Ang iya alagad nagsabat, “Sia ang dumoluong nga babayi nga nag-upod kay Noemi halin sa Moab.

7Naglisensya sia sa akon, ‘Mahimo bala ako makasunod sa mga mangangani sa pagpanaghaw.’ Aga pa sia nagsugod sa pagpanaghaw kag karon lang sia nag-untat sa pagpahuway sa palasilungan.”

8Dayon si Boaz nagsiling kay Ruth, “Pamatii ang isiling ko sa imo, indi ka na magpanaghaw sa iban nga uma, kundi diri lang. Mag-obra ka diri upod sa mga babayi.

9Bantayi ang mga mangangani kag tan-awa kon diin sila magaani kag mag-upod ka sa mga suloguon nga babayi. Ginsingganan ko ang akon mga tinawo nga indi ka nila pag-anhon. Kon uhawon ka, kadto ka lang kag mag-inom sa mga banga nga ila ginasudlan sing tubig.”

10Si Ruth naghapa sa duta, kag nagsiling kay Boaz, “Ngaa bala nga ginakabalak-an mo gid ako? Ngaa bala nga ginaayuhan mo gid ang isa ka dumoluong?”

11Si Boaz nagsabat, “Ginsugiran ako sang tanan nga imo ginhimo sa imo ugangan nga babayi halin pa sang pagkapatay sang imo bana. Nakahibalo ako nga ginbayaan mo ang imo amay kag iloy kag ang imo pungsod kag mag-estar upod sa mga tawo nga wala gid nimo makilala sang una.

12Kabay ang Ginoo magbalos sa imo tungod sang imo ginhimo. Kabay nga makabaton ka sing bug-os nga balos gikan sa Ginoo nga Dios sang Israel nga imo gindangpan!”

13Si Ruth nagsabat, “Kaayo gid sa imo sir. Ginhatagan mo ako sing kaisog paagi sa imo paghambal sa akon sing malulo, bisan nga indi gani ako makatupong sa imo mga suloguon.”

14Sang tion na sa pagkaon, si Boaz nagsiling kay Ruth, “Dali ka kag magkuha sing isa ka bilog nga tinapay, kag itusmaw ini sa sawsawan nga bino.” Gani nagpungko sia upod sa mga mangangani, kag ginduholan sia ni Boaz sang sinanlag nga trigo. Nagkaon si Ruth tubtob nabusog sia, kag may nabilin pa sang iya pagkaon.

15Sang nakalakat na sia sa pagpanaghaw, si Boaz nagsiling sa mga mangangani, “Pabay-i ninyo sia nga magpanaghaw bisan sa mga tinumpi kag indi ninyo sia pag-akigi.

16Bugnota man ninyo ang iban nga mga uhay sa inupong kag ibilin ini agod nga pamuloton niya. Kag indi ninyo sia pagsawaya.

17Gani nagpanaghaw si Ruth sa uma tubtob sa hapon, kag sang malinas niya ini, mga 1/4 sako ang nasupot niya.

18Gindala niya ang iya uyas, nagbalik sa banwa kag ginpakita niya sa iya ugangan ang kadamuon sang iya natipon. Ginhatag man niya kay Noemi ang nabilin nga pagkaon.

19Si Noemi nagpamangkot sa iya, “Diin ka magpanaghaw kaina? Kay sin-o uma ikaw nagpanaghaw? Kabay nga ang Dios magbendisyon sang tawo nga nagkabalaka sa imo!” Gani si Ruth nagsugid kay Noemi, “Didto ako nagpanaghaw sa uma sang tawo nga ginahingalanan kay Boaz.

20Si Noemi nagsiling sa iya, “Kabay nga ang Ginoo nga nagatuman gid sang iya mga saad sa mga buhi kag mga minatay, magbendisyon sa iya.” Kag nagsiling pa gid sia, “Si Boaz suod naton nga pariente, kag may katungdanan sia sa pag-atipan sa aton.”

21Dayon si Ruth nagsiling, “Labaw sa tanan, ginsingganan niya ako nga sigihon ko lang ang pagpanaghaw upod sa iya mga mangangani tubtob maubos nila ang alanyon.”

22Si Noemi nagsiling kay Ruth, “Huo, anak ko, basi himuan ka pa sing malain kon magkadto ka sa uma sang iban. Maayo pa nga mag-obra ka upod sa mga babayi sa uma ni Boaz.”

23Gani si Ruth nagpadayon sa pagpanaghaw upod sa ila tubtob natapos ang pag-ani sang trigo kag sebada. Kag nagpadayon sia sa pagpangabuhi upod sa iya ugangan.

← Chapter 1 Jump to: Chapter 3 →