Ruth 4

Ilonggo (Maayong Balita nga Biblia (2012))

← Chapter 3 Jump to:

1Si Boaz nagkadto sa lugar nga tilipunan nga nahamtang sa pwerta sang banwa, kag didto nagpungko sia. Dayon ang labing malapit nga pariente ni Elimelec naglabay. Amo ini sia ang ginhinambitan ni Boaz kay Ruth. Gintawag sia ni Boaz, “Pariente, dali anay kag magpungko.” Gani naghapit sia kag nagpungko.

2Sa gilayon nagtipon si Boaz sing napulo ka pangulo sang banwa kag ginpapungko man didto upod sa ila. Sang nakapungko na sila,

3nagsiling sia sa iya pariente, “Karon nga nakabalik na si Noemi halin sa Moab, luyag niya ibaligya ang uma nga iya sang aton pariente nga si Elimelec,

4kag dapat ikaw makahibalo sini. Gani, kon luyag mo, bakla ini sa atubang sining mga tawo nga nagapungko diri. Pero kon wala ka sing luyag sini, magsiling ka, tungod kay ikaw ang may una nga kinamatarong sa pagbakal sini kag ako ang madason.” Ang tawo nagsabat, “Mahimo ko baklon ini.”

5Si Boaz nagsiling, “Karon, kon baklon mo ang uma kay Noemi, dayon dapat mo man pangasaw-on si Ruth ang balo nga Moabnon agod ang uma magpabilin sa pamilya sang napatay.”

6Ang tawo nagsabat, “Kon amo ina, indi ako maggamit sang akon kinamatarong sa pagbakal sang uma tungod kay basi manginkasablagan ini sa akon panublion. Ikaw na lang ang bakal, indi na lang ako.”

7Sadto nga panahon, kon may pagkabutang nga ginabaligya ukon ginabayluhan, kinabatasan sang manugbaligya sa pag-uba sang iya sandalyas kag ginahatag ini sa manugbakal. Amo ini ang ginahimo sang mga Israelinhon sa pagpamatuod nga natapos na ang pagbaklanay ukon pagbayluhanay.

8Gani, sang pagsiling sang tawo kay Boaz, “Ikaw na lang ang bakal,” gin-uba niya ang iya sandalyas kag ginhatag ini kay Boaz.

9Dayon si Boaz nagsiling sa mga pangulo kag sa tanan nga yadto didto, “Tanan kamo saksi karon nga adlaw nga ginbakal ko kay Noemi ang tanan nga mga pagkabutang ni Elimelec, kag sang iya man mga anak nga lalaki nga sanday Quelion kag Mahalon.

10Wala labot sini, si Ruth nga Moabnon, nga balo ni Mahalon, mangin-asawa ko. Tungod sini ang pagkabutang sang napatay magapabilin sa iya pamilya kag magapadayon ang iya ngalan sa iya mga kasimanwa kag sa iya banwa. Kamo ang mga saksi sini karon nga adlaw.”

11Ang mga pangulo kag ang iban nagsiling, “Huo, mga saksi kami. Kabay nga ang Ginoo magahimo sini nga babayi nga magaestar sa imo balay kaangay kay Raquel kag kay Lea nga nagbata sing madamo nga mga anak kay Israel. Kabay nga magmanggaranon ka sa kabarangayan sa Efrata, kag manginbantog ka sa Betlehem.

12Kabay nga ang mga kabataan nga ihatag sa imo sang Ginoo paagi sini nga babayi magahimo sang imo panimalay kaangay sang panimalay ni Perez, ang anak nga lalaki ni Juda kag ni Tamar.”

13Gani gindala ni Boaz si Ruth pauli sa iya balay nga mangin-iya asawa. Ang Ginoo nagbendisyon sa iya, kag nagbusong sia kag nagbata sing lalaki.

14Ang mga babayi sa Betlehem nagsiling kay Noemi, “Dayawon ang Ginoo! Ginhatagan niya ikaw sing apo nga lalaki karon nga adlaw sa pag-atipan sa imo. Kabay nga ang bata manginbantog sa Israel!

15Ang imo umagad nga babayi nagahigugma sa imo, kag ang iya nahimo para sa imo labaw pa sang sa pito ka mga anak nga lalaki. Kag karon ginhatagan niya ikaw sing apo nga lalaki nga magahatag sa imo sing bag-o nga kabuhi kag magasagod sa imo kon tigulang ka na.”

16Ginkuha ni Noemi ang bata, ginkugos kag gin-atipan niya.

17Ang kaingod nga mga kababayin-an naghingalan sa bata kay Obed. Ginsugiran nila ang bisan sin-o, “Natawo kay Noemi ang isa ka apo nga lalaki!” Sang ulihi si Obed amo ang nangin-amay ni Jesse kag si Jesse amo ang amay ni David.

18Amo ini ang mga katigulangan halin kay Perez tubtob kay David: Perez, Hezron, Ram, Aminadab, Naason, Salmon, Boaz, Obed, Jesse, David.

← Chapter 3 Jump to: