Ruth 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Sang ulihi si Noemi nagsiling kay Ruth, “Kinahanglan pangitaan ko ikaw sing bana, agod may kaugalingon ka nga panimalay.

2Dumdoma nga ining tawo nga si Boaz, nga imo ginaobrahan upod sa iya mga suloguon nga babayi, aton pariente. Pamatii ini anak ko, karon sa gab-i malinas sia sang sebada.

3Gani magpaligos ka kag magpangagwa kag magsuksok ka sang pinakamatahom mo nga bayu. Dayon dulhog ka sa iya linasan, pero indi ka magpakita sa iya tubtob makatapos sia sing kaon kag inom.

4Kon magtulog sia, tan-awa kon diin sia magahigda. Kon matulogan na gani sia, kadto ka kag tukisa ang habol kag maghigda sa iya tiilan. Singganon niya ikaw kon ano ang himuon mo.”

5Si Ruth nagsabat, “Himuon ko ang tanan nga ginasiling mo.”

6Gani si Ruth nagdulhog sa linasan kag ginhimo niya ang tanan nga ginsiling sa iya sang iya ugangan.

7Sang makatapos sing kaon kag inom si Boaz maayo gid ang iya panimuot. Nagkadto sia sa tinumpok nga uyas sang sebada kag naghigda sia sa pagtulog. Sang natulogan na sia si Ruth nagpalapit nga nagatiid, gintukis niya ang habol kag naghigda sa tiilan niya.

8Sang mga tungang gab-i na hinali lang nakamata si Boaz, nagliso sia, kag natingala sia nga may babayi nga nagahigda sa tiilan niya.

9Nagpamangkot sia, “Sin-o ka?” Si Ruth nagsabat, “Si Ruth ako. Tungod kay malapit ikaw nga pariente, may katungdanan ikaw sa pag-atipan sa akon. Gani, kon mahimo pangasaw-a ako.”

10Nagsabat si Boaz, “Ang Ginoo magbendisyon sa imo. Nagapakita ka sing labaw pa nga pag-unong sa imo pamilya sa sining imo ginhimo karon sang sa tanan nga imo nahimo sa imo ugangan. Wala ka magpangita sing isa ka manggaranon ukon imol nga pamatan-on nga lalaki.

11Ruth, sa subong indi ka magpalibog. Ang tagsatagsa sa banwa nakahibalo nga maayo ikaw nga babayi. Himuon ko ang tanan nga pangayuon mo.

12Matuod nga isa ako ka suod nga pariente, kag may katungdanan ako sa imo, pero may isa pa diri ka tawo nga mas malapit pa nga pariente sa imo sang sa akon.

13Diri ka na lang tulog karon nga gab-i, kag pagkaaga usisaon ta kon ini nga tawo mangako sang iya katungdanan sa imo. Kon magsugot sia, maayo man. Kon indi sia, ginasumpa ko sa ngalan sang Dios nga buhi nga batunon ko ang akon katungdanan. Karon maghigda ka kag magpabilin diri tubtob mag-aga.”

14Gani naghigda si Ruth sa tiilan ni Boaz tubtob mag-aga, pero nagbangon si Ruth sang madulomdulom pa agod indi sia makilal-an, kay indi maluyag si Boaz nga may makahibalo nga si Ruth nagkadto didto.

15Si Boaz nagsiling sa iya, “Kuhaa ang imo kunop kag humlada diri.” Gintuman niya ini kag ginbuboan ini ni Boaz sing mga 1/2 sako nga sebada. Ginduhol niya ini kay Ruth kag nagtaklad si Ruth pauli sa banwa.

16Sang pag-abot niya, ginpamangkot sia ni Noemi, “Kamusta ang lakat mo, anak ko?” Ginsugiran sia ni Ruth sang tanan nga ginhimo ni Boaz para sa iya.

17Dayon nagsiling pa gid si Ruth, “Ginsingganan niya ako nga indi ako magbalik sa imo nga wala sing dala, gani ginhatagan niya ako sang amo sini kadamo nga sebada.”

18Si Noemi nagsiling sa iya, “Karon maghulat ka, anak ko, tubtob mahibaluan mo kon ano ang maabutan sini. Si Boaz indi mag-untat tubtob matapos niya ini nga butang karon nga adlaw.”

← Chapter 2 Jump to: Chapter 4 →