Song of Solomon 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Samtang nagakatulog ako sa akon higdaan, sa tagsa ka gab-i, gindamgo ko ang akon ginahigugma, ginpangita ko sia, pero indi ko sia makita.

2Nagbangon ako kag ginlibot ang bug-os nga siudad, sa malapad kag sa makitid nga mga kalye. Ginpangita ko ang akon ginahigugma, pero wala ko sia makita.

3Ang mga ronda nga nagapatrolya sa siudad nakakita sa akon. Nagpamangkot ako sa ila, “Nakita bala ninyo ang akon kahagugma?”

4Halos lamang nakahalin ako sa ila, sang nakita ko ang akon kahagugma. Ginkaptan ko sia kag wala ko ginbuy-an, tubtob nadala ko sia sa balay sang akon iloy, sa kwarto sa diin ako natawo.

5Magsaad kamo sa akon, mga babayi sang Jerusalem, magsumpa kamo paagi sa madasig nga mga usa kag sa mga gasela nga indi ninyo pagtublagon ang amon paghigugma.

6Ano bala ining nagatub-ok gikan sa desierto, kaangay sang haligi nga aso nga mahamot sang mira kag insyenso, kaangay sang tanan nga insyenso nga ginbaligya sang mga negosyante?

7Si Solomon nagapalapit nga ginayayungan sa iya trono. Sesenta ka mga soldado ang nagabantay sini, ang pinili nga mga hangaway sa Israel.

8Tanan sila mga batid sa espada, mga anad sila sa inaway. Ang tagsatagsa sa ila may espada, nga nagabantay batok sa pagsalakay sa kagab-ihon.

9Si Haring Solomon ginayayungan sa iya trono nga nahimo sa labing maayo nga kahoy.

10Ang iya mga haligi nahaklapan sing pilak, sa ibabaw sini may panapton nga nabordahan sing bulawan. Ang iya malum-ok nga mga pulongkuan naputos sa panapton nga granate, mahigugmaon nga ginhabol sang mga kababayin-an sang Jerusalem.

11Mga kababayin-an sang Sion, dali kamo kag magtan-aw kay Haring Solomon. May korona sia nga ginkorona sang iya iloy sa adlaw sang iya kasal, sa adlaw sang iya kasadya kag kalipay.

← Chapter 2 Jump to: Chapter 4 →