Song of Solomon 8

Ilonggo (Maayong Balita nga Biblia (2012))

← Chapter 7 Jump to:

1Maayo kuntani kon ikaw utod ko nga lalaki, nga nagtiti sa akon iloy. Dayon, kon masugata ko ikaw sa kalye, halukan ko ikaw kag wala sing may magamalisya.

2Pagadalhon ko ikaw sa balay sang akon iloy, sa diin tudloan mo ako sang gugma. Hatagan ko ikaw sing bino nga mahamot, kag duga nga ilimnon gikan sa bunga sang akon kahoy nga granada.

3Ang imo wala nga kamot ginaunlan ko, kag ang imo tuo nga kamot nagahakos sa akon.

4Magsaad kamo sa akon, mga babayi sang Jerusalem, nga indi ninyo pagtublagon ang amon paghigugma.

5Sin-o bala ini ang nagataklad halin sa desierto, nga nagasipit sang iya kahagugma? Sa idalom sang kahoy nga mansanas ginpukaw ko ikaw, sa lugar diin ikaw natawo.

6Indi ka maghigugma sa iban kundi sa akon lamang, indi ka maghakos sa iban, kundi sa akon lamang. Ang gugma subong ka gamhanan sang kamatayon, ang mainit nga balatyagon makusog subong man sang kamatayon. Nagaibwal subong sang dabdab, kag nagasunog subong sang nagaharahara nga kalayo.

7Wala sing tubig nga makapalong sini, kag wala sing baha nga makaanod sini. Pero kon may magbakal sang gugma paagi sa iya manggad, ang pagtamay lamang ang maagom niya.

8May diutay kami nga utod nga babayi, kag diutay pa ang iya suso. Ano ang amon himuon sa iya kon may pamatan-on nga lalaki nga magpangaluyag sa iya?

9Kon sia isa ka pader, patindugan namon sing tore nga pilak sa pag-apin sa iya. Kon sia isa ka pwerta, himuan namon sia sing sira gikan sa tapi nga sedro.

10Ako isa ka pader kag ang akon mga suso amo ang iya mga tore, ang akon kahagugma nakahibalo gid nga ako may kabulosgan kag kalinong kaupod niya.

11Si Solomon may isa ka talamnan sang ubas sa lugar nga ginatawag Baal-hamon. May mga mangungoma nga nag-alkila sini gikan sa iya, ang kada-isa sa ila nagbayad sang isa ka libo nga pilak.

12May akon ako nga talamnan sang ubas! Ikaw Solomon, imo lang inang imo isa ka libo nga pilak, kag ila sang mga mangungoma ang duha ka gatos nga ila parti.

13Ang akon mga kaupdanan nagapamati sang imo tingog, palangga ko. Pabatia ako sang imo tingog gikan sa hardin.

14Kahagugma ko, palapit ka sa akon subong sang gasela, subong sang torite nga usa sa mga bukid sa diin nagatubo ang mga pahumot.

← Chapter 7 Jump to: