Song of Solomon 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Labing matahom sa mga babayi, diin bala nagkadto ang imo kahagugma? Sugiri kami kon diin bala nagpadulong ang imo kahagugma, agod makabulig kami sa imo sa pagpangita sa iya.

2Ang akon kahagugma nagkadto sa iya hardin, sa diin ang mga kahoy nga pahumot nagatubo. Nagapahalab sia sang iya mga panong sa hardin kag nagatipon sang mga lirio.

3Ang akon kahagugma akon, kag iya ako, nagapahalab sia sang iya mga panong sa tunga sang mga lirio.

4Palangga ko, matahom ikaw subong sang Jerusalem, subong katahom sang siudad sang Tirsa, makahalawhaw subong sini nga mga siudad.

5Indi ako pagtuloka, kay ginabihag mo ako. Ang imo buhok nagasaot subong sang panong sang mga kanding nga nagalumpatlumpat sa kabakuloran sang Galaad.

6Ang imo mga ngipon subong kaputi sang panong sang mga karnero nga bag-o lang mapaligusan. Wala sing isa sa ila nga nadula, tanan sila may nagakabagay nga mga pares.

7Ang imo mga pisngi manayanaya nga ginatabunan sang imo belo.

8May sesenta ka mga rayna, kag otsenta ka mga babayi, kag mga kadalagahan nga indi maisip!

9Pero isa lamang ang akon ginahigugma, kag sia matahom subong sang alimokon. Sia bugtong nga anak nga babayi sang iya iloy, pinalangga nga anak sang iya iloy. Ang tanan nga mga kadalagahan nagatulok kag nagadayaw sa iya, Ang mga rayna kag mga babayi nagaamba sa pagdayaw sa iya.

10Sin-o bala ini nga kon tan-awon subong sang kabugwason? Subong sia kasanag kag kasilaw sang adlaw ukon sang bulan.

11Nagdulhog ako sa mga katamnan sang mga kahoy nga almendro, sa pagtan-aw sang bag-o nga mga tanom sa kapatagan, sa pagtan-aw sang ugbos sang mga ubas kag sang mga bulak sang mga granada nga nagapamukadkad.

12Nagapalangurog ako, ginpukaw mo ang akon balatyagon sa paghigugma subong sang soldado nga nagasakay sa karwahi padulong sa inaway.

13Saot, saot ka, O Sulamnon nga babayi. Saot, saot ka, kag patan-awa kami sa imo. Ngaa bala luyag kamo magtan-aw sa akon samtang nagasaot ako sa tunga sang nagaraya nga mga tumalan-aw?

← Chapter 5 Jump to: Chapter 7 →