Zephaniah 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Wala sing huya nga mga pumoluyo, magpanghunahuna kamo

2sa wala pa kamo madala palayo kaangay sang upa nga ginapalid sang hangin, sa wala pa mag-abot sa inyo ang masingkal nga kaakig sang Ginoo, sa wala pa ang adlaw nga magapakita sia sang iya kaakig.

3Balik kamo sa Ginoo, tanan kamo nga mapainuboson nga mga tawo sa duta, nga nagatuman sang iya mga sugo. Himua ninyo ang matarong kag magpaubos sang inyo kaugalingon sa atubang sang Ginoo. Ayhan makapalagyo kamo sa silot sa adlaw nga ang Ginoo magapahayag sang iya kaakig.

4Wala sing isa nga mabilin sa siudad sang Gaza. Ang Askelon pagabayaan. Ang mga pumoluyo sang Asdod pagatabugon paggwa sa udtong adlaw, kag ang mga pumoluyo sang Ekron pagatabugon gikan sa ila siudad.

5Kamo nga mga Filistinhon tapos gid, kamo nga mga tawo nga nagaestar sa baybayon. Ang Ginoo naghukom sa inyo. Laglagon niya kamo kag wala sing isa nga mabilin sa inyo.

6Ang inyo duta sa higad sang dagat manginwayang sa diin yara ang mga payagpayag sang mga manugbantay kag mga toril sang mga karnero.

7Ang mga pumoluyo sang Juda nga mabilin nga buhi magaestar sa inyo duta. Magapahalab sila sang ila panong didto kag magatulog sa mga kabalayan sang Askelon. Ang Ginoo nga ila Dios magaupod sa ila kag magapauswag sa ila liwat.

8“Nabatian ko ang mga pumoluyo sang Moab kag sang Amon nga nagapakahuya kag nagayaguta sa akon mga tawo, kag nagapahambog sila nga agawon nila ang duta sang akon mga tawo.

9Sa nagakabuhi ako, ang Ginoo sang mga hangaway, ang Dios sang Israel, nagasumpa ako nga ang Moab kag ang Amon malaglag kaangay sang Sodoma kag Gomorra. Manginkaangay sila sang isa ka lugar nga tinumpukan sang asin kag ginub-an sa walay katapusan, nga natabunan sang mga hilamon. Ang nagkalabilin nga buhi sang akon mga tawo magakuha sang ila mga pagkabutang kag magaagaw sang ila duta.”

10Amo ina ang pagsilot sa mga pumoluyo sang Moab kag Amon tungod sang ila bugal kag kahambog, kag sang ila pagpakahuya sa mga tawo sang Ginoo sang mga hangaway.

11Ang Ginoo magapahadlok sa ila. Himuon niya ang mga dios sang duta nga manginwalay pulos, kag dayon ang tagsa ka pungsod magasimba sa iya, ang tagsatagsa sa iya kaugalingon nga duta.

12Ang Ginoo magapamatay man sang mga taga-Etiopia.

13Ang Ginoo magagamit sang iya gahom sa paglaglag sang Asiria. Himuon niya ang siudad sang Ninive nga mamingaw nga ginub-an kag mamala nga desierto.

14Manginlugar ini sa diin ang mga karnero, ang mga baka, kag ang tanan nga mga sapat magaluko. Ang mga bukaw magaestar sa iya ginub-an kag magahuni gikan sa iya mga bintana. Ang mga uwak magahuni sa mga halintang. Ang kahoy nga sedro nga yara sa iya mga balay pagakuhaon.

15Amo ini ang matabo sa siudad nga nagapabugal sang iya gahom kag nagahunahuna nga indi sia maano. Ang iya mga tawo nagahunahuna nga ang ila siudad amo ang pinakagamhanan sa bug-os nga kalibutan. Manginmamingaw ini nga lugar, isa ka lugar sa diin ang talunon nga mga sapat magapahuway! Ang tagsatagsa nga nagaagi magapalangupos sa kahadlok.

← Chapter 1 Jump to: Chapter 3 →