Zephaniah 3

Ilonggo (Maayong Balita nga Biblia (2012))

← Chapter 2 Jump to:

1Ang Jerusalem tapos na, inang garok, mabinatuon nga siudad nga nagapigos sa iya kaugalingon nga mga tawo.

2Wala sia magpamati sa Ginoo ukon nagbaton sang iya pagdisiplina. Wala sia nagsalig sa Ginoo ukon nagpangayo sang iya bulig.

3Ang iya mga opisyales kaangay sang nagangurob nga mga leon, ang iya mga hukom kaangay sang gutom nga mga lobo, tama ka dalok, nga indi magbiya sang tul-an tubtob mag-aga.

4Ang mga propeta indi masaligan kag madaya, ang mga pari nagadagta sang balaan nga mga butang kag ginalubag ang kasugoan sang Dios para sa ila kaugalingon nga kaayuhan.

5Pero ang Ginoo yara gihapon sa siudad, ginahimo niya ang matarong kag indi ang sayop. Tagsa ka aga wala sia nagauntat sa paghimo sang matarong sa iya mga tawo. Wala sapayan, ang indi matarong nga mga tawo didto nagapadayon sa paghimo sing sayop kag wala nagakahuya.

6Ang Ginoo nagasiling, “Ginpapas ko ang tanan nga mga kapungsoran, ginlaglag ko ang ila mga siudad kag ginbayaan ang ila mga pader kag mga tore nga guba. Ang mga siudad ginbayaan, ang mga dalan wala sing tawo, wala sing isa nga nabilin.

7Naghunahuna ako nga ang akon mga tawo magakahadlok sa akon kag magabaton sang akon pagdisiplina, nga indi gid nila pagkalimtan ang leksyon nga akon gintudlo sa ila. Pero sa wala madugay naghimo sila sang kalautan pareho sang ginhimo nila sang una.”

8Ang Ginoo nagasiling, “Hulata ang adlaw nga isumbong ko ang mga kapungsoran. Nagpamat-od ako nga tipunon ko ang mga kapungsoran kag mga ginharian agod mabatyagan nila ang kasingkal sang akon kaakig. Ang bug-os nga duta malaglag paagi sa kasingkal sang akon kaakig.

9“Dayon palisuon ko ang mga tawo sang mga kapungsoran kag magapangamuyo sila sa akon lamang, kag indi sa iban nga mga dios. Magatuman sila tanan sa akon.

10Bisan sa malayo nga duta sang Etiopia, ang akon mga tawo nga nag-alaplaag magadala sa akon sang mga halad.

11Mga tawo ko, sa sadto nga tion, indi na kamo magakahuya nga nagbato kamo sa akon. Pagakuhaon ko ang tagsatagsa nga bugalon kag hambog, kag indi na gid kamo magbato sa akon sa balaan nga bukid sa Jerusalem.

12Magabilin ako didto sang mapainuboson kag mabuot nga mga tawo, nga magapalapit sa akon sa pagpangayo sing bulig.

13Ang mga tawo sang Israel nga nabilin nga buhi indi na maghimo sang sayop sa bisan kay sin-o, indi magsugid sang butig, ukon magtinguha sa pagpatalang. Magauswag sila kag may kalinong nga wala sing ginakahadlukan.”

14Mag-amba kag magsinggit sa kalipay, mga tawo sang Israel! Maghugyaw, Jerusalem, sa bug-os mo nga tagipusoon!

15Ang Ginoo nag-untat sang imo silot, ginkuha niya ang tanan nga nagakontra sa inyo. Ang Ginoo, ang Hari sang Israel, nagaupod sa inyo, wala sing kabangdanan karon nga kamo magakahadlok.

16Ang tion magaabot nga sila magasiling sa Jerusalem, “Indi magkahadlok, siudad sang Sion! Indi pagtugoti nga maghuyhoy ang inyo mga kamot!

17Ang Ginoo nga inyo Dios nagaupod sa inyo, ang iya gahom nagahatag sa inyo sing pagdaog. Ang Ginoo magakalipay sa inyo kag sa iya gugma magahatag sa inyo sing bag-o nga kabuhi. Magakanta sia kag magakalipay sa inyo,

18subong ka malipayon sang mga tawo sa piesta.” Ang Ginoo nagasiling, “Gin-untatan ko ang pagpamahog sa paglaglag kag ginkuha ang inyo kahuloy-an.

19Ang tion magaabot! Silutan ko ang mga nagapigos sa inyo, luwason ko ang tanan nga mga piang kag dalhon pauli ang mga bihag. Pagabayluhan ko ang ila kahuloy-an sing kadungganan, kag ang bug-os nga duta magadayaw sa ila.

20Ang tion magaabot! Dalhon ko pauli ang inyo mga tawo nga nag-alaplaag, himuon ko nga manginbantog kamo sa bug-os nga kalibutan, kag pauswagon ko kamo liwat.” Ang Ginoo naghambal sini.

← Chapter 2 Jump to: