2 Peter 1

Ilonggo (Ang Biblia (1982))

Jump to: Chapter 2 →

1Si Simon Pedro, ulipon kag pinadala ni Jesu-Cristo, Sa mga nakaagum sing kaangay kahamili nga pagtoo upud sa amon sa pagkamatarung sang aton Dios kag Manluluwas nga si Jesu-Cristo:

2Ang bugay sa inyo kag ang paghidait pagpaukaron sa pagkilala sa Dios kag kay Jesus nga aton Ginoo.

3Ang iya diosnon nga gahum naghatag sa aton sang tanan nga butang nga nahanungud sa kabuhi kag pagkadiosnon, bangud sa pagkilala sa iya nga nagtawag sa aton paagi sa iya kaugalingon nga himaya kag pagkahalangdon,

4nga bangud sini gintugut niya sa aton ang iya hamili kag tama kadaku nga mga saad, agud nga paagi sini sa ila mangin-umalambit kamo sang kinaugali nga diosnon, kag makalikaw sa kaduluntan nga yara sa kalibutan bangud sang kailigbon.

5Tungud sini gid nga kabangdanan magtinguha sa pagdugang sa inyo pagtoo sang pagkahalangdon, kag sa pagkahalangdon idugang ang ihibalo,

6kag sa ihibalo ang pagpugung sang kaugalingon, kag sa pagpugung sang kaugalingon ang pagkalig-on, kag sa pagkalig-on ang pagkadiosnon,

7kag sa pagkadiosnon ang paghiliutud nga malolo, kag sa paghiliutud nga malolo ang gugma.

8Kay kon ining mga butang inyo kag nagabugana, ginahimo nila kamo nga mapuslanon ukon mabungahon sa pagkilala sa aton Ginoong Jesu-Cristo.

9Kay ang nakulangan sining mga butang bulag kag nagatan-aw lamang sang yara sa malapit kag nalimot nga gintinloan sia gikan sa iya daan nga mga sala.

10Busa, mga kauturan, himulati pa gid ninyo sa paglig-on sang pagkatinawag kag pagkapinili ninyo, kay kon maghimo kamo sini indi gid kamo mapukan;

11sa amo ihatag sa inyo sing bugana ang pagsulud sa ginharian nga dayon sang aton Ginoo kag Manluluwas nga si Jesu-Cristo.

12Busa ginatuyo ko sa gihapon ang pagpahanumdum sa inyo sining mga butang, bisan nahibaloan ninyo sila kag ginpalig-on kamo sa kamatooran nga yara sa inyo.

13Ginapakamatarung ko, tubtub nga yari ako sa sining lawas, ang pagpukaw sa inyo paagi sa pagpahanumdum sa inyo,

14sanglit nakahibalo ako nga ang pagbiya sang akon lawas maga-abut sing madali, sono sa ginpahayag sa akon sang aton Ginoong Jesu-Cristo.

15Kag himulatan ko nga sa tagsa ka tion sa tapus ang akon pagtaliwan makadumdum kamo sining mga butang.

16Kay wala kami magsonod sang mga sugilanon nga pinatopato sing malalangon sang pagpakilala namon sa inyo sang gahum kag pag-abut sang aton Ginoong Jesu-Cristo, kondi mga saksi kami nga nakakita sang iya pagkaharianon.

17Kay sang nakabaton sia gikan sa Dios nga Amay sing dungug kag himaya kag nag-abut sa iya ang amo nga tingug gikan sa Harianon nga Himaya, “Ini hinigugma ko nga Anak, nga sa iya nahamuut ako,”

18nabatian namon ining tingug gikan sa langit, kay kami upud sa iya sa bukid nga balaan.

19Kag napalig-on pa sa amon ang polong sang tagna. Maayo sa inyo nga magtalupangud kamo sini subong sang sa suga nga nagasiga sa duug nga madulum, tubtub sa pamanagbanag kag ang kabugwason magsubang sa inyo mga tagiposoon.

20Dapat ninyo hangpon ini sing una sa tanan, nga walay tagna sang kasulatan nga maggikan sa kaugalingon nga pagpatpat,

21kay wala gid sing tagna nga nag-abut bangud sa kabubut-on sang tawo, kondi ang mga tawo nga gintandug sang Espiritu Santo nagpamolong gikan sa Dios.

Jump to: Chapter 2 →