2 Peter 2

Ilonggo (Ang Biblia (1982))

← Chapter 1 Jump to: Chapter 3 →

1Apang may dimatuud nga mga manalagna man nga naglutaw sa katawohan, subong nga sa inyo man magalutaw ang dimatuud nga mga manunudlo, nga sa tago magapasulud sing malaglagon nga mga herejia, nga nagapanghiwala bisan sang Agalon nga nagbakal sa ila, nga nagadala sa ila kaugalingon sing madagmit nga kalaglagan.

2Kag madamu ang magasonod sa ila mga pagkaulag, kag bangud sa ila ang dalanon sang kamatooran himalauton.

3Kag sa ila pagkamahamkonon paagi sa pinahitohito nga mga polong himuslan kamo nila; ang pagtagudili sa ila kutub sa dumaan wala nagapalantang, kag ang ila kalaglagan wala nagatolog.

4Kay kon ang Dios wala magpaiway sang mga manugtunda sang nakasala sila, kondi ginholog sila sa infierno kag gintugyan sila sa mga kadadalman sang kadudulman nga itigana sa paghukom;

5kon wala niya pagpaiwaya ang daan nga kalibutan, apang gintipigan si Noe, nga manugbantala sang pagkamatarung, kaupud sang iban nga pito, sang gin-anaw niya ang kalibutan sang mga didiosnon;

6kon sang gin-abo niya ang mga banwa sang Sodoma kag sang Gomorra gintagudilian sila sa kalaglagan kag ginhimo sila nga huwaran sa mga buut magkabuhi sing didiosnon;

7kag kon iya ginluwas ang matarung nga si Lot, nga ginsakit sing lakas sang maulagon nga paggawi sang mga malauton

8(kay yadtong tawo nga matarung nga nagapuyo sa tunga nila, sa pagtan-aw kag sa pagpamati, ginsakit ang iya matarung nga kalag adlawadlaw sang ila mga binuhatan nga malinapason),

9niyan ang Ginoo makahibalo magluwas sang mga diosnon sa mga pagsulay, kag magtigana sang mga dimatarung sa idalum sang silot tubtub sa adlaw sang paghukom,

10kag labi na gid ang mga nagasonod sa unud sa kailigbon sang kadagtaan kag nagatamay sang pagbulut-an. Mga makahas kag mabuutbuuton, wala sila nagakurug sa pagpasipala sa mga halangdon,

11sa bagay nga ang mga manugtunda, makusug pa kag gamhanan, wala magdala sing mapasipalahon nga paghukom batok sa ila sa atubangan sang Ginoo.

12Apang ini sila, subong sang mga sapat nga walay buut, mga tinuga sang kinaugali, natawo nga dakpon kag patyon, nga nagapasipala sa mga butang nga wala nila mahibaloi, laglagon sa amo man nga panglaglag kaupud nila,

13nga nagaantus sang kalainan subong nga balus sang ila kalain. Sila nagakabig nga kalipay sang adlawon nga pagpatuyang. Sila mga dagta kag mga kasawayan, nga nagapatuyang sa ila limbong, samtang sila nagasinalosalo upud sa inyo.

14Sila may mga mata nga napun-an sang pagpanglahi, nga indi mabusug sa sala. Sila nagahaylo sang mga kalag nga mahuyang. May mga tagiposoon sila nga nasagad sa paghamkon. Mga anak nga pinakamalaut!

15Sa ila pagbiya sang matarung nga dalanon nagtalang sila; nagsonod sila sang dalanon ni Balaam, mga anak ni Beor, nga naghigugma sang sohol sang malain nga buhat,

16apang ginbadlong sia bangud sang iya paglapas; ang asno nga apa naghambal sa tingug sang tawo kag nagpugung sang kabuangon sang manalagna.

17Ini sila mga tuburan nga walay tubig kag mga alupoop nga ginapalid sang unus; sa ila natigana ang kangitongito sang kadudulman.

18Kay, sa nagamitlang sing mabaskug nga mga pagpabugal sang kabuangon, ginahaylo nila paagi sa maulagon nga mga kailigbon sang unud ang mga halus lamang makapalagyo sa mga nagakabuhi sa sayup.

19Sila nagatug-an sa ila sing kahilwayan, apang sila ila mga ulipon sang kaduluntan; kay ang tawo ulipon sang bisan ano nga nagadaug sa iya.

20Kay kon, sa tapus nga nakapalagyo sila sang mga kadagtaan sang kalibutan paagi sa pagkilala sang aton Ginoo kag Manluluwas nga si Jesu-Cristo, masaw-id sila liwat sa ila kag madaug, ang ila naolihing kahimtangan manginmalain pa sang sa nahauna.

21Kay maayo pa sa ila kuntani nga wala makahibalo sang dalanon sang pagkamatarung sang sa tapus nga nakakilala sini magtalikod sa balaan nga sogo nga gintugyan sa ila.

22Nahanabu sa ila sono sa matuud nga hulubaton, Ang ido nagabalik sa iya kaugalingon nga suka, kag ang nayon nahugasan lamang sa pagtubug sa lunang.

← Chapter 1 Jump to: Chapter 3 →