2 Peter 3

Ilonggo (Ang Biblia (1982))

← Chapter 2 Jump to:

1Mga hinigugma, ini karon amo ang ikaduhang sulat nga ginasulat ko sa inyo, kag sa ila nga duha ginapukaw ko ang inyo bunayag nga hunahuna sa pagpahanumdum sa inyo;

2agud nga dumdumon ninyo ang mga tagna nga ginhambal anay sang balaan nga mga manalagna kag ang sogo sang Ginoo kag Manluluwas paagi sa inyo mga pinadala.

3Una sa tanan kinahanglan hangpon ninyo ini, nga sa katapusan nga mga adlaw ang mga mayubiton magaabut nga may pagyubit, nga nagasonod sang ila kaugalingon nga mga kailigbon

4kag nagasiling, “Diin bala ang saad sang iya pag-abut? Kay kutub sang pagtolog sang mga ginikanan, ang tanan nagapadayon subong nga amo sila kutub sa ginsuguran sang pagtuga.”

5Wala nila ginsapak sing hungud ining kamatooran, nga bangud sang polong sang Dios may mga langit kutub sa dumaan, kag may duta nga ginhuman gikan sa tubig kag bangud sang tubig,

6nga paagi sini ang kalibutan nga sadto anay ginlapawan sang tubig kag nawala.

7Apang sa amo nga polong ang mga langit kag ang duta nga amo karon gintigana sa kalayo, nga ginatipigan nga sa adlaw sang paghukom kag kalaglagan sang mga tawo nga didiosnon.

8Apang, mga hinigugma, dili pagkalimtan ining kamatooran, nga ang isa ka adlaw sa Ginoo subong sang isa ka libo ka tuig, kag ang isa ka libo ka tuig subong sang isa ka adlaw.

9Ang Ginoo wala nagapalantang nahanungud sa iya saad sono sa pagbanta sang iban sang pagpalantang, kondi mabinatason ayon sa inyo, nga wala nagahandum nga mawala ang bisan sin-o, kondi nga ang tanan makadangat sang paghinulsul.

10Apang ang adlaw sang Ginoo magaabut subong sang makawat, kag niyan ang mga langit magataliwan sa dakung kagahud, kag ang mga kasangkapan matunaw sa kalayo, kag masonog ang duta kag ang mga binuhat nga yara sa sini.

11Sanglit ini tanan nga butang tunawon sa among bagay, ano bala nga sari sang mga tawo dapat mangin-amo kamo sa balaan kag diosnon nga mga kabuhi,

12nga nagahulat kag nagapadali sang pag-abut sang adlaw sang Dios, nga bangud sini ang mga langit magahingalayo kag matunaw, kag ang mga kasangkapan matunaw sa kalayo!

13Apang sono sa iya saad nagahulat kita sing bag-ong mga langit kag bag-ong duta diin nagapuyo ang pagkamatarung.

14Busa, mga hinigugma, sanglit nagahulat kamo sini, magmakugihon agud nga masapwan niya kamo nga walay dagta ukon kasawayan, kag sa paghidait.

15Kag kabiga ninyo nga ang pagbatas sang aton Ginoo kaluwasan. Gani man ang aton hinigugma nga utud nga si Pablo nagsulat sa inyo sono sa kaalam nga ginhatag sa iya,

16nga nagahambal sini subong sang ginahimo niya sa tanan niya nga sulat. May iban nga mga butang sa ila nga maiwat hangpon, nga ginapatiko sang mga dimaalam kag mga mahuyang sa ila kaugalingon nga kalaglagan, subong sang ginahimo man nila sa iban nga mga kasulatan.

17Busa kamo, mga hinigugma, nga nakahibalo nga daan sini, mag-andam kamo basi kon dalhon kamo sang sayup sang mga malauton kag madula ang inyo kaugalingon nga pagkalig-on.

18Apang magtubo kamo sa bugay kag sa pagkilala sang aton Ginoo kag Manluluwas nga si Jesu-Cristo. Sa iya ang himaya karon kag tubtub sa gihapon. Kabay pa.

← Chapter 2 Jump to: