2 Timothy 1

Ilonggo (Ang Biblia (1982))

Jump to: Chapter 2 →

1Si Pablo, nga pinadala ni Cristo Jesus bangud sa kabubut-on sang Dios sono sa saad sang kabuhi nga yara kay Cristo Jesus,

2Kay Timoteo, nga hinigugma kong anak: Ang bugay, kalooy, kag paghidait gikan sa Dios nga Amay kag kay Cristo Jesus nga aton Ginoo.

3Nagapasalamat ako sa Dios nga ginaalagad ko sa putli nga kaisipan, subong sang ginhimo sang akon mga ginikanan, sa ginadumdum ko ikaw sa walay langan sa akon mga pangamuyo.

4Sa ginapanumdum ko ang imo mga luha, ginahidlaw ako sa adlaw kag gab-i sa pagpakigkita sa imo, agud nga mapun-an ako sing kalipay.

5Ginapahanumdum ako sang imo pagtoo nga walay kabutigan, nga yara anay sa imo lola nga si Loida kag sa imo iloy nga si Eunice kag karon, nagasalig ako, yara sa imo.

6Sa sining kabangdanan ginapahanumdum ko ikaw nga padabdabon mo ang hiyas sang Dios nga yara sa imo paagi sa pagtakdung sang akon mga kamut;

7kay ang Dios wala maghatag sa aton sang espiritu sang katalaw kondi sang gahum kag gugma kag kabut-anan.

8Niyan dili mo ikahuya ang pagpamatuud nahanungud sa aton Ginoo, ukon sa akon nga iya binilanggo, kondi mag-ambit ka sang imo bahin sang pag-antus tungud sa maayong balita sa gahum sang Dios,

9nga nagluwas sa aton kag nagtawag sa aton sa balaan nga pagtawag, indi sono sa aton nga mga buhat kondi sono sa iya kaugalingon nga tinutuyo kag bugay nga ginhatag sa aton kay Cristo Jesus sa wala pa ang mga katuigan nga nagligad,

10kag karon napakita na paagi sa pagpahayag sang aton Manluluwas nga si Cristo Jesus, nga nagwala sang kamatayon kag nagdala sang kabuhi kag pagkadimamalatyon sa kapawa paagi sa maayong balita.

11Nga sa sini gintangdoan ako nga manugbantala kag pinadala kag manunudlo,

12kag gani nagaantus man ako sing subong. Apang wala ako mahuya, kay nakilala ko ang akon natuuhan kag ginasaligan ko nga sarang sia makabantay sang akon gintugyan sa iya tubtub sadtong Adlaw.

13Sonda ang huwaran sang maayong mga polong nga nabatian mo sa akon, sa pagtoo kag paghigugma nga yara kay Cristo Jesus;

14bantayi ang kamatooran nga gintugyan sa imo paagi sa Espiritu Santo nga nagapuyo sa aton.

15Nahibaloan mo nga ang tanan nga yara sa Asia nagbulag sa akon, kag sa ila amo si Figelo kag si Hermogenes.

16Pagkalooyan sang Ginoo ang panimalay ni Onesiforo, kay sa masunsun ginapaumpawan niya ako; wala sia mahuya sang akon mga talikala,

17kondi sang sia nag-abut sa Roma ginpangita niya ako sing mapisanon kag iya ako nakita—

18kabay nga tugutan sia sang Ginoo sa pagdangat sang kalooy sang Ginoo sadtong Adlaw—kag nakahibalo ka sing maayo sang tanan nga pag-alagad nga nahimo niya sa Efeso.

Jump to: Chapter 2 →