2 Timothy 4

Ilonggo (Ang Biblia (1982))

← Chapter 3 Jump to:

1Ginatulinan ko ikaw sa atubangan sang Dios kag ni Cristo Jesus nga magahukom sa mga buhi kag mga patay, kag bangud sa iya pagpahayag kag sa iya ginharian:

2iwali ang polong, mag-ukud sa panag-on kag sa dipanag-on, magsabdong, magbadlong, kag maglaygay, sa bug-os nga pagbatas kag pagpanudlo.

3Kay nagaabut ang tion nga ang katawohan indi magbatas sang maayong pagtolon-an, kondi sa may nagakalam nga mga dulunggan magatipon sa ila kaugalingon sing mga manunudlo sono sa ila kaugalingon nga mga kaluyag,

4kag magapahilayo sang ila mga dulunggan sa kamatooran kag magaliso sa patopato nga mga sugilanon.

5Apang magmalig-on ka sa walay langan, batasa ang pag-antus, himoa ang buluhaton sang evangelista, tumana ang imo pagpang-alagad.

6Kay ako ginahalad na; ang tion sang akon pagtaliwan nag-abut na.

7Nakapakig-away ako sang maayong pag-away, natapus ko ang dalaganon, natipigan ko ang pagtoo.

8Kutub karon natigana sa akon ang purungpurung sang pagkamatarung, nga sa sadtong Adlaw ihatag sa akon sang Ginoo, ang hukom nga matarung, kag indi sa akon lamang kondi man sa tanan nga nagahigugma sang iya pagpahayag.

9Magtinguha ka gid sa pagkari sing madali sa akon.

10Kay si Demas nagbiya sa akon, nga nagahigugma sining kalibutan karon, kag nagkadto sa Tesalonica; si Crescente nagkadto sa Galacia, si Tito sa Dalmacia.

11Si Lucas lamang ang kaupud nakon. Kuhaa si Marcos kag dalha sia kaupud nimu; kay mapuslanon gid sia sa pag-alagad sa akon.

12Si Tiquico ginpadala ko sa Efeso.

13Dalha kon magkari ka ang kunup nga akon ginbilin sa Troas kay Carpo, kag ang mga tolon-an, labi na gid ang mga pergamino.

14Si Alejandro nga manugsalsal sang saway naghimo sa akon sing daku nga kasamaran; ang Ginoo magatumbas sa iya sono sa iya mga buhat.

15Sa iya mag-andam ka, kay ginsumpung niya sing tama ang amon mga polong.

16Sa akon nahaunang pangapin walay bisan sin-o nga nagtabang sa akon; ginbayaan ako sang tanan. Kabay nga indi pag-isipon ini batok sa ila!

17Apang ang Ginoo nagtupad sa akon kag nagpabakud sa akon sa pagbantala sing bug-os sang polong, agud nga magpamati sini ang tanan nga Gentil. Gani ginluwas ako sa baba sang leon.

18Ang Ginoo magatabang sa akon sa tagsa ka malaut kag magaluwas sa akon tungud sa iya ginharian nga langitnon. Sa iya ang himaya sa katuigan kag katuigan. Kabay pa.

19Abiabiha si Prisca kag si Aquila, kag ang panimalay ni Onesiforo.

20Si Erasto nagpabilin sa Corinto; si Trofimo nga nagamasakit ginbayaan ko sa Mileto.

21Magtinguha ka gid sa pagkari sa wala pa ang tigtulugnaw. Nagaabiabi sa imo si Eubulo, kag si Pudente kag si Lino kag si Claudia kag ang tanan nga kauturan.

22Ang Ginoo manginkaupud sa imo espiritu. Ang bugay manginsa inyo.

← Chapter 3 Jump to: