Esther 5

Ilonggo (Ang Biblia (1982))

← Chapter 4 Jump to: Chapter 6 →

1Sa ikatlo nga adlaw si Ester nagsuklub sang iya panapton nga harianon kag nagtindug sa nasulud nga luwang sang balay sang hari, sa atubang sang balay sang hari. Ang hari naglingkod sa iya trono sa balay nga harianon sa atubang sa salamputan sang balay;

2kag sang nakita sang hari si Hara Ester nga nagatindug sa luwang, nakapahamuut sia sa iya itololok kag gin-untay sang hari kay Ester ang cetro nga bulawan nga yara sa iya kamut. Gani si Ester nagpalapit kag nagtandug sang ukbung sang cetro.

3Niyan ang hari nagsiling sa iya, “Ano bala ang buut mo, Hara Ester? Ano bala ang imo pangabay? Ihatag ini sa imo, bisan sa katunga sang ginharian.”

4Kag si Ester nagsiling, “Kon maayo sa hari, ang hari kag si Haman magkadto sa sini nga adlaw sa sinalosalo nga naaman ko sa iya.”

5Niyan ang hari nagsiling, “Padalia si Haman, agud nga mahimo sono sa ginsiling ni Ester.” Gani ang hari kag si Haman nag-abut sa sinalosalo nga naaman ni Ester.

6Kag sang nagainum sila sang alak, ang hari nagsiling kay Ester, “Ano bala ang imo pakilooy? Itugut ini sa imo. Bisan pa sa katunga sang ginharian, himoon ini.”

7Niyan nagsabat si Ester, “Ang akon pakilooy kag ang akon pangayo amo ini:

8Kon nakapahamuut ako sa itololok sang hari, kag kon nahamut-an sang hari ang pagtugut sang akon pakilooy kag paghimo sang akon pangabay, ang hari kag si Haman magkadto sa sinalosalo nga amanon ko sa ila, kag himoon ko buwas sono sa nasiling sang hari.”

9Niyan naggowa si Haman sadto nga adlaw nga malipayon kag masadya sa tagiposoon. Apang sang nakita ni Haman si Mardoqueo sa gawang sang hari, nga wala sia magtindug ukon maggiho tungud sa iya, napuno sia sing kasingkal batok kay Mardoqueo.

10Wala sing sapayan si Haman nagpugung sang iya kaugalingon, kag nagpauli; kag ginpasogoan niya kag ginpakari ang iya mga abyan kag si Zeres nga iya asawa.

11Kag ginsugid ni Haman sa ila ang himaya sang iya mga manggad, ang kadamuon sang iya mga anak, ang tanan nga butang diin napauswag sia sang hari, kag kon paano nga ginpasaka sia niya labaw sa mga principe kag mga alagad sang hari.

12Labut pa si Haman nagsiling, “Bisan si Hara Ester wala sing tawo nga ginpaupud sa hari sa sinalosalo nga iya naaman kondi ako. Kag buwas man gin-agda ako niya upud sa hari.

13Apang ini tanan wala sing pulus sa akon, sa gihapon nga makita ko si Mardoqueo nga Judio nga nagalingkod sa gawang sang hari.”

14Niyan si Zeres nga iya asawa kag ang tanan niya nga abyan nagsiling sa iya, “Magpahimo ka sing bitayan nga kalim-an ka maniko ang kataas, kag sa pagkaaga magpamolong ka sa hari nga bitayon dira si Mardoqueo; niyan sulud ka sing malipayon upud sa hari sa sinalosalo.” Kag ang butang nagpahamuut kay Haman, kag nagpahimo sia sing bitayan.

← Chapter 4 Jump to: Chapter 6 →