Esther 9

Ilonggo (Ang Biblia (1982))

← Chapter 8 Jump to: Chapter 10 →

1Karon sa bulan nga ikapulog duha, nga amo ang bulan nga Adar, sa ikapulog tatlo nga adlaw sang amo, sang naghilapit ang pagpatuman sang sogo sang hari kag sang iya mando, sa adlaw nga ang mga kaaway sang mga Judio naglaum sa paggahum sa ila, apang ini nagsuli nga ang mga Judio naggahum sa mga nagdumut sa ila,

2ang mga Judio nagtingub sa ila mga banwa sa bug-os sang tanan nga puud ni Hari Asuero sa pagdakup sang mga nagtinguha sa paghalit sa ila. Kag wala sing tawo nga sarang makasumpung sa ila, kay ang kahadluk sa ila nag-abut sa tanan nga mga katawohan.

3Ang tanan nga principe sang mga puud kag ang mga satrapa kag ang mga pangolo-puud kag ang mga nagahimo sang hilikuton sang hari nagbulig sa mga Judio, bangud nga ang kahadluk kay Mardoqueo nag-abut sa ila.

4Kay si Mardoqueo daku sa balay sang hari, kag ang iya kabantugan naglapnag sa bug-os sang tanan nga puud; kay ang tawo nga si Mardoqueo nag-amat-amat sa pagkagamhanan.

5Gani ang mga Judio nagpatay sang ila mga kaaway sa labo sang espada, nga nagapamatay, kag nagalaglag sa ila, kag naghimo sang buut nila himoon sa mga nagdumut sa ila.

6Sa Susan nga palacio nagpatay kag naglaglag ang mga Judio sing lima ka gatus ka tawo,

7kag si Parsandata kag si Dalfon kag si Aspata

8kag si Porata kag si Adalia kag si Aridata

9kag si Parmasta kag si Arisai kag si Aridai kag si Vaizata,

10ang napulo ka anak nga lalaki ni Haman nga anak ni Hamedata, ang kaaway sang mga Judio ginpatay nila; apang wala sila maghilabut sa inagaw.

11Sa sadto nga adlaw ang kadamuon sang mga ginpatay sa Susan nga palacio gindala sa atubangan sang hari.

12Kag ang hari nagsiling kay Hara Ester, “Ginpatay kag ginlaglag sang mga Judio ang lima ka gatus ka tawo sa Susan nga palacio kag ang napulo ka lalaki nga mga anak ni Haman. Ano niyan ang ila nahimo sa iban nga mga puud sang hari! Karon ano bala ang imo pakilooy? Itugut ini sa imo. Kag ano bala ang imo pangabay pa? Ini himoon.”

13Niyan nagsiling si Ester, “Kon ini nagapahamuut sa hari, itugut man sa mga Judio nga yara sa Susan sa paghimo buwas sono sa mando sini nga adlaw. Kag ipabitay sa mga bitayan ang napulo ka anak ni Haman.”

14Gani ang hari nagsogo nga himoon ini sing subong; ginpagowa sa Susan ang mando, kag ginbitay nila ang napulo ka anak ni Haman.

15Ang mga Judio nga yara sa Susan nagtipon sila sing tingub sa ikapulo kag apat nga adlaw man sang bulan nga Adar, kag nagpatay sang tatlo ka gatus ka tawo sa Susan; apang wala sila maghilabut sa inagaw.

16Karon ang iban nga mga Judio nga yara sa mga puud sang hari nagtipon sila sing tingub sa pag-apin sang ila kabuhi, kag nakapahuway sa ila mga kaaway, kag nagpatay sa mga nagdumut sa ila sing kapitoan kag lima ka libo; apang wala sila maghilabut sa inagaw.

17Ini nahimo sa ikapulo kag tatlo nga adlaw sang bulan nga Adar, kag nagpahuway sila sa ikapulo kag apat nga adlaw kag naghimo sini nga adlaw sang piesta kag kasadya.

18Apang ang mga Judio nga yara sa Susan nagtipon sing tingub sa ikapulo kag tatlo nga adlaw kag sa ikapulo kag apat, kag nagpahuway sila sa ikapulo kag lima nga adlaw, kag naghimo sini nga adlaw sang piesta kag kasadya.

19Busa ang mga Judio sang mga minoro, kag nga nagapuyo sa mga banwa nga wala sing kuta, nagahimo sang ikapulo kag apat nga adlaw sang bulan nga Adar nga adlaw sang kasadya kag piesta kag maayo nga adlaw, kag pagpadalhanay sing mga pahat.

20Kag si Mardoqueo nagsulat sini nga mga butang, kag nagpadala sing mga sulat sa tanan nga Judio nga yara sa tanan nga puud ni Hari Asuero, malapit kag malayo,

21sa pagsogo sa ila nga magbantay sila tuigtuig sang ikapulo kag apat nga adlaw sang bulan nga Adar kag sang ikapulo kag lima nga adlaw sang amo,

22subong nga mga adlaw diin ang mga Judio nakapahuway sa ila mga kaaway, kag ang bulan nga nabaylo sa ila gikan sa kasubu pa kasadya kag gikan sa paglalaw pakadto sa adlaw nga maayo; agud nga himoon nila sila nga mga adlaw sang piesta kag kasadya, kag pagpadalhanay sing mga pahat kag mga dolot sa mga imol.

23Gani ang mga Judio nagpangako sa paghimo sono sa nasugdan nila, kag sono sa nasulat sa ila ni Mardoqueo.

24Kay si Haman nga Agagnon, lalaking anak ni Hamadata, ang kaaway sang tanan nga Judio, nagpuhon batok sa mga Judio sa paglaglag sa ila, kag nagholog sing Pur, nga amo ang papalad, sa pagpapas sa ila kag sa paglaglag sa ila;

25apang sang nag-abut si Ester sa atubangan sang hari, nagsogo sia paagi sa mga sulat nga ang iya malaut nga padugi nga iya napadugi batok sa mga Judio magpanumbalik sa iya kaugalingon nga olo, kag nga sia kag ang iya mga lalaking anak bitayon sa mga bitayan.

26Busa gintawag nila ini nga mga adlaw nga Purim, sono sa polong nga Pur. Kag busa, bangud sang tanan nga polong sini nga sulat, kag sang ila nakita nahanungud sini nga butang, kag sang nahanabu sa ila,

27ang mga Judio nagpatuk kag nagpangako sa ila kag sa ila mga kaliwatan kag sa tanan nga nagsimpon sa ila, nga indi ini mag-untat nga pagbantayan nila sa tagsa ka tuig ini nga duha ka adlaw sono sa sinulat sini kag sono sa pinat-ud nga tion sini,

28nga ini nga mga adlaw pagdumdumon kag pagbantayan sing bug-os gid sa tagsa ka kaliwatan, sa tagsa ka panimalay, sa tagsa ka puud, kag sa tagsa ka banwa, kag nga ini nga mga adlaw sang Purim indi mag-untat sa mga Judio, ukon mawala ang handumanan nila sa ila mga kaliwatan.

29Niyan si Hara Ester, ang mga anak ni Abihail, kag si Mardoqueo nga Judio nagsulat sa bug-os nga pagbulut-an, sa pagpalig-on sini nga ikaduha nga sulat sang Purim.

30Nagpadala sia sing mga sulat sa tanan nga Judio, sa isa ka gatus kag duha ka pulo kag pito ka puud sang ginharian ni Asuero, sa mga polong sa paghidait kag sa kamatooran,

31sa pagpalig-on sini nga mga adlaw sang Purim sa ila pinat-ud nga mga tion, sono sa nasogo sa ila ni Mardoqueo nga Judio kag ni Hara Ester, kag sono sa napatuk nila nga sa ila kag sa ila mga kaliwatan, nahanungud sa mga pagpuasa kag sa ila paghaya.

32Ang sogo ni Hara Ester nagpalig-on sini nga mga butang sang Purim, kag ginsulat ini sa tolon-an.

← Chapter 8 Jump to: Chapter 10 →