Esther 6

Ilonggo (Ang Biblia (1982))

← Chapter 5 Jump to: Chapter 7 →

1Sa sadto nga gab-i indi makatolog ang hari; kag nagsogo sia nga dalhon ang tolon-an sang mga sinulat nga mga maragtas, kag ginbasa sila sa atubangan sang hari.

2Kag nasapwan ini nga nasulat nga si Mardoqueo nakasugid nahanungud kay Bigtan kag kay Teres, duha ka eunuco sang hari, sa mga nagbantay sang atangan, nga nagtinguha sa pagpatay kay Hari Asuero.

3Kag ang hari nagsiling, “Ano bala nga kadungganan kag pagkahalangdon ang nahatag kay Mardoqueo tungud sini?” Ang mga alagad sang hari nga nag-alagad sa iya nagsiling, “Wala gid sing nahimo tungud sa iya.”

4Kag nagsiling ang hari, “Sin-o bala ang yara sa luwang?” Karon si Haman nagsulud sa nagowa nga luwang sang balay sang hari sa pagpamolong sa hari sa pagbitay kay Mardoqueo sa bitayan nga naaman niya tungud sa iya.

5Gani ang mga alagad sang hari nagsiling sa iya, “Si Haman yadto didto, nga nagatindug sa luwang.” Kag ang hari nagsiling, “Pasudla sia.”

6Gani si Haman nagsulud, kag ang hari nagsiling sa iya, “Ano bala ang himoon sa tawo nga nahamut-an sang hari sa pagpadungug?” Karon si Haman nagsiling sa iya tagiposoon, “Sa kay sin-o bala nahamuut ang hari sa pagpadungug labi pa sa akon?”

7Kag si Haman nagsiling sa hari, “Sa tawo nga ang hari nahamuut sa pagpadungug,

8ipakuha ang panapton nga harianon, nga nasuklub sang hari, kag ang kabayo nga nasakyan sang hari, kag ang purungpurung nga harianon nga nahamtang sa iya olo;

9kag ang panapton kag ang kabayo itugyan sa kamut sang isa sang labi gid kadungganon sang mga principe sang hari; agud nga masukluban nila sini ang tawo nga ginakahamut-an sang hari sa pagpadungug, kag pasakyon sia sa kabayo paagi sa dalan sang banwa, kag ibantala sa una niya: ‘Amo ini ang himoon sa tawo nga nahamut-an sang hari sa pagpadungug.’”

10Niyan ang hari nagsiling kay Haman, “Dalidali ka, kag kuhaa ang panapton kag ang kabayo, subong sang nasiling mo, kag himoon ang amo gid kay Mardoqueo nga Judio nga nagalingkod sa gawang sang hari. Wala sing makulang sang tanan nga napamolong mo.”

11Gani ginkuha ni Haman ang panapton kag ang kabayo, kag ginsukluban si Mardoqueo kag ginpasakay sia paagi sa dalan sang banwa, kag ginbantala sa una niya, “Amo ini ang himoon sa tawo nga ginakahamut-an sang hari sa pagpadungug.”

12Niyan si Mardoqueo nagbalik sa gawang sang hari. Apang si Haman nagdalidali sa iya balay, nga nagakalisud kag natabunan ang iya olo.

13Kag si Haman nagsugid kay Zeres nga iya asawa kag sa tanan niya nga abyan sang tagsa ka butang nga nahanabu sa iya. Niyan ang maalam nga mga tawo kag si Zeres nga iya asawa nagsiling sa iya, “Kon si Mardoqueo, nga sa atubangan niya nagsugud ka sa pagkapukan, gikan sa kaliwat sang mga Judio, dili ka makalandas batok sa iya kondi mapukan nga mas-a sa atubangan niya.”

14Samtang nagahambal pa sila sa iya, nag-abut ang mga eunuco sang hari kag nagdalidali sa pagdala kay Haman sa sinalosalo nga naaman ni Ester.

← Chapter 5 Jump to: Chapter 7 →