Ezra 1

Ilonggo (Ang Biblia (1982))

Jump to: Chapter 2 →

1Sa nahaunang tuig ni Ciro nga hari sang Persia, agud nga matuman ang polong sang Ginoo paagi sa baba ni Jeremias, ginpukaw sang Ginoo ang espiritu ni Ciro nga hari sang Persia sa bagay nga nagpabantala sia sa bug-os niya nga ginharian kag ginsulat man ini:

2“Amo ini ang ginasiling ni Ciro nga hari sang Persia: Ang Ginoo, nga Dios sang langit, naghatag sa akon sang tanan nga ginharian sang duta, kag gintulinan niya ako sa pagpatindug sa iya sing balay sa Jerusalem, nga yara sa Juda.

3Ang bisan sin-o nga yara sa inyo sang bug-os niya nga katawohan, ang iya Dios manginkaupud niya, kag magtaklad sia sa Jerusalem, nga yara sa Juda, kag magpatindug sang balay sang Ginoo, ang Dios sang Israel—sia amo ang Dios nga yara sa Jerusalem;

4kag ang bisan sin-o nga mabilin, sa bisan ano nga duug nga iya ginapanlugayawan, buligan sia sang mga tawo sang iya duug sing pilak kag bulawan, kag mga pagkabutang kag mga kasapatan, luwas sang mga halad-nga-kinabubut-on nga sa balay sang Dios nga yara sa Jerusalem.”

5Niyan nagtindug ang mga pangolo sang mga kabaranggayan sang Juda kag Benjamin, kag ang mga sacerdote kag ang mga Levinhon, bisan ang tanan nga ang ila espiritu ginpukaw sang Dios sa pagtaklad sa pagpatindug sang balay sang Ginoo nga yara sa Jerusalem;

6kag ang tanan nga yara sa palibut nila nagpalig-on sa ila mga kamut sang mga gamit nga pilak, sang bulawan, sang mga pagkabutang, sang mga kasapatan, kag sang mga butang nga bilidhon, luwas sang tanan nga ginhalad sing kinabubut-on.

7Ginpagowa man ni Ciro ang mga gamit sang balay sang Ginoo nga gindala ni Nabucodonosor gikan sa Jerusalem kag ginbutang sa balay sang iya mga dios.

8Bisan yadto sila ginpadala ni Ciro nga hari sang Persia sa kamut ni Mitridates nga manugtipig sang bahandi, kag gin-isip sila kay Sesbasar nga principe sang Juda.

9Kag ini amo ang kadamuon nila: katloan ka tazon nga bulawan, isa ka libo ka tazon nga pilak, duha ka pulo kag siam ka sundang,

10katloan ka yahong nga bulawan, apat ka gatus kag napulo ka yahong nga pilak nga ikaduha nga sari, kag isa ka libo sang iban nga mga gamit;

11ang tanan nga gamit nga bulawan kag pilak lima ka libo kag apat ka gatus. Sila tanan gindala ni Sesbasar, sang ginpataklad ang mga sa kabihagan gikan sa Babilonia pa Jerusalem.

Jump to: Chapter 2 →