Ezra 9

Ilonggo (Ang Biblia (1982))

← Chapter 8 Jump to: Chapter 10 →

1Sang nahimo ini nga mga butang, ang mga principe nagpalapit sa akon nga nagasiling, “Ang katawohan sang Israel kag ang mga sacerdote kag ang mga Levinhon, wala magpahain sang ila kaugalingon gikan sa katawohan sang mga duta nga nagahimo sono sa ila mga kangil-aran, gikan sa mga Canaanhon, mga Hethanon, mga Pereznon, mga Jebusnon, mga Amonhon, mga Moabnon, mga Egiptohanon, kag sa mga Amornon.

2Kay nagkuha sila sa ila mga anak nga babayi nga sa ila kaugalingon kag sa ila mga anak nga lalaki; sa bagay nga ang kaliwat nga balaan nagsimpon sa mga katawohan sang mga duta. Kag ang kamut sang mga principe kag mga manugdumala amo ang puno sa sini nga paglapas.”

3Sang pagkabati ko sining butang, ginkusnit ko ang akon panapton kag ang akon bayo nga malaba, kag gin-gan-it ko ang buhok sang akon olo kag ang akon bungut, kag naglingkod nga nalibogan.

4Niyan nagtingub sa akon ang tagsatagsa nga nagkurug sa mga polong sang Dios sang Israel, bangud sang paglapas sang mga kabihagan, kag naglingkod ako nga nalibogan tubtub sa halad sa kahaponon.

5Kag sa paghalad sa kahaponon nagtindug ako gikan sa akon pagpaubus, nga kinusnit ang akon panapton kag ang akon bayo nga malaba, kag nagluhud ako kag naghumlad sang akon kamut sa Ginoo nga akon Dios,

6nga nagasiling: “O Dios ko, nagapalamula ako kag nahuya sa pagbayaw sang akon nawung sa imo, Dios ko, kay ang amon kalautan nagdugang sa ibabaw sang amon olo, kag ang amon pagkamakasasala nagtaas tubtub sa mga langit.

7Kutub sa kaadlawan sang amon mga ginikanan nagmakasasala kami sing lakas tubtub sini nga adlaw; kag tungud sang amon mga kalautan kami, ang amon mga hari, kag ang amon mga sacerdote gintugyan sa kamut sang mga hari sang mga duta, sa espada, sa kabihagan, sa pang-ati, kag sa kahuluy-an, subong sang sa sini nga adlaw.

8Apang karon sa diotay nga tion ang bugay ginpakita gikan sa Ginoo nga amon Dios, sa pagbilin sa amon sing nabilin sa pagpalagyo, kag sa paghatag sa amon sang kalig-on sa iya duug nga balaan, agud nga mapasanag sang amon Dios ang amon mga mata kag mahatagan kami sing diotay nga pagpaumpaw sa amon kahiolipnan.

9Kay mga ulipon kami; apang ang amon Dios wala magbiya sa amon sa kahiolipnan namon, kondi nagtanyag sing malig-on nga paghigugma sa amon sa atubangan sang mga hari sang Persia, sa paghatag sa amon sing pagpaumpaw sa pagpatindug sang balay sang amon Dios, sa pagkaayo sang iya mga kalaglagan, kag sa paghatag sa amon sing kuta sa Juda kag sa Jerusalem.

10“Kag karon, O Dios namon, ano bala ang isiling namon sa tapus sini? Kay ginbayaan namon ang imo mga sogo,

11nga ginsogo mo paagi sa imo mga alagad nga mga manalagna, nga nagasiling, ‘Ang duta nga inyo ginakadtoan, sa pagtag-iya sa iya, dimatinlo nga duta tungud sang pagkadimatinlo sang mga katawohan sang mga duta, tungud sang ila mga kangil-aran nga naghil-ob sini sang ila pagkadimatinlo kutub sa isa ka ukbung tubtub sa isa.

12Busa karon dili pag-ihatag ang inyo mga anak nga babayi sa ila mga anak nga lalaki, kag dili magkuha sang ila mga anak nga babayi nga sa inyo mga anak nga lalaki, ukon maghimulat kamo sang ila paghidait ukon sang ila kauswagan sa gihapon, agud nga magbakud kamo, kag magkaon sang kaayohan sang duta, kag magbilin sini nga panublion sa inyo mga anak sa gihapon.’

13Kag sa tapus sang tanan nga nag-abut sa amon tungud sang amon malaut nga mga buhat kag tungud sang amon daku nga pagpakasala, sa ginatan-aw nga ikaw, nga amon Dios, nagsilot sa amon sing kubus sa nagakaigo sa amon mga kalautan kag naghatag sing subong nga nabilin,

14magalalis bala kami liwat sang imo mga sogo kag magatapik sa mga katawohan nga nagahimo sini nga mga kangil-aran? Indi ka bala maakig sa amon tubtub nga mapapas mo kami, agud nga wala sing mabilin, ukon may makapalagyo?

15O Ginoo nga Dios sang Israel, matarung ka, kay kami ang salin nga nabilin nga nakapalagyo, subong sang sa sini nga adlaw. Yari karon, yari kami sa atubangan nimo sa amon pagkamakasasala, kay wala sing bisan sin-o nga makatindug sa imo atubangan bangud sini.”

← Chapter 8 Jump to: Chapter 10 →