Hosea 4

Ilonggo (Ang Biblia (1982))

← Chapter 3 Jump to: Chapter 5 →

1Pamati sang polong sang Ginoo, kamo nga katawohan sang Israel; kay ang Ginoo may kasuayon sa mga pamuluyo sang duta. Bangud nga wala sing kamatooran ukon kaayohan, ukon pagkilala sang Dios sa duta;

2wala na gid kondi pagsumpa, pagbungkag sang pagtoo, pagpatay, pagpangawat, kag pagpanglahi; nagpamuyong sila kag ang dugo nagatandug sang dugo.

3Busa magalalaw ang duta, kag ang tagsatagsa nga nagapuyo sa iya magakag-as, pati ang kasapatan sang latagon, kag ang kapispisan sang mga langit; kag ang kaisdaan sang dagat man makuha.

4Apang wala sing tawo nga magsuay, ukon bisan sin-o nga tawo nga magsabdong, kay ang imo katawohan subong sang mga nagasuay sa sacerdote.

5Magakasandad ka sa adlaw, ang manalagna man magakasandad upud sa imo sa kagab-ihon; kag laglagon ko ang imo iloy.

6Ang akon katawohan ginalaglag tungud sa kakulang sing ihibalo; bangud nga ginsikway mo ang ihibalo, sikwayon ko man ikaw agud nga indi ka na manginsacerdote nakon. Sa ginatan-aw nga ginkalimtan mo ang kasogoan sang imo Dios, ako man magakalipat sang imo mga anak.

7Subong nga nagbuad sila, sa amo nagpakasala sila batok sa akon; baylohon ko ang ila himaya sa kahuluy-an.

8Nagapangabuhi sila sa sala sang akon katawohan; ginatuhoy nila ang ila tagiposoon sa ila kalautan.

9Kag kon ano ang katawohan, amo man ang sacerdote; silotan ko sila tungud sang ila mga dalanon, kag ibalus sa ila mga hinimoan.

10Magakaon sila, kag indi mabusug; magamakihilawason sila, kag indi magdamu; bangud nga nag-untat sila sa pagsapak sa Ginoo.

11Ang pagkamakihilawason kag ang alak kag ang bag-o nga alak nagakuha sang paghangup.

12Ang akon katawohan nagapangayo sing laygay sa ila tuud, kag ang ila sungkud nagasaysay sa ila. Kay ang espiritu sang pagkamakihilawason nagapasayup sa ila, kag nagmakihilawason sila nga nagabulag sa ila Dios.

13Nagahalad sila sa mga putokputokan sang mga bukid, kag nagasonog sing incienso sa ibabaw sang mga bakolod, sa idalum sang mga roble, mga alamo kag mga terebinto, bangud nga maayo ang ila landong. Busa ang inyo mga anak nga babayi nagamakihilawason, kag ang inyo mga umagad nga babayi nagapanglahi.

14Indi ako magsilot sang inyo mga anak nga babayi kon nagamakihilawason sila, ukon sang inyo mga umagad nga babayi kon nagapanglahi sila; kay ang mga lalaki nagapakig-upud sa mga makihilawason, kag nagahalad sila upud sa mga babayi nga makihilawason, kag ang katawohan nga wala nakahangup malaglag.

15Bisan ikaw, Israel, magmakihilawason, apang ang Juda dili pagpasandara. Dili kamo magkadto sa Gilgal, ukon magtaklad kamo sa Bet-aven, ukon magsumpa, “Sa nagakabuhi ang Ginoo.”

16Kay ang Israel nagtingkuyan, subong sang tingkuyan nga baka nga babayi nga tinday; karon pahalbon bala sila sang Ginoo subong sang cordero sa duug nga malapad?

17Si Efraim natapik sa mga diosdios, pabayai sia.

18Ang ila ilimnon nagsingkal, nagamakihilawason sila sing dalayon; ang ila mga manugdumala nagapalangga sang kahuluy-an.

19Ang hangin nagputus sa iya sa mga pakpak niya, kag mahuy-an sila bangud sang ila mga halad.

← Chapter 3 Jump to: Chapter 5 →