Hosea 7

Ilonggo (Ang Biblia (1982))

← Chapter 6 Jump to: Chapter 8 →

1kon buut ko ayohon ang Israel, nabuksan ang kalautan sang Efraim, kag ang pagkamalaut sang Samaria; kay nagabutig sila, nagasulud ang makawat, kag ang kabon sang mga buyong nagapangati sa gowa.

2Apang wala sila nagapatugsiling sa ila mga tagiposoon nga akon ginadumdum ang tanan nilang pagkamalaut. Karon ginalibutan sila sang ila mga hinimoan, yara sila sa atubangan sang akon nawung.

3Ginapasadya nila ang hari sa ila pagkamalaut, kag ang mga principe sa ila kabutigan.

4Sila tanan makilahion, subong sila sang pogon nga ginpainit, sang manugtinapay nga nagauntat sa pagpadabdab sang kalayo, kutub sa paglamas sang linamas tubtub nga nagkumbo ini.

5Sa adlaw sang aton hari ang mga principe nagmasakit sa kasingkal sang alak; nag-untay sia sang iya kamut upud sa mga mayubiton.

6Kay gin-aman nila ang ila tagiposoon kaangay sang pogon samtang nagapuut sila; ang ila manugtinapay nagakatolog sa bug-os nga gab-i; sa aga nagadabdab subong sang kalayo nga nagadabadaba.

7Sila tanan mainit subong sang pogon, kag nagahalunhon sang ila mga hukom. Ang tanan nilang hari napukan; wala gid sa ila sing nagapanawag sa akon.

8Si Efraim nagasimpon sia sa mga katawohan; si Efraim kalan-onon nga wala mabaliskad.

9Ginhalunhon sang mga dumoloong ang iya kusug, kag sia wala makahibalo sini; ang mga uban yari diri kag didto sa iya, kag wala sia makahibalo sini.

10Ang bugal ni Israel nagapamatuud sa iya nawung; apang wala sila magbalik sa Ginoo nga ila Dios, ukon nagpangita sa iya, sa sini tanan.

11Si Efraim kaangay sang tukmo, nga kulangkulang kag walay paghangup, nga nagapanawag sa Egipto, nga nagakadto sa Asiria.

12Kon maglakat sila, ihumlad ko sa ibabaw nila ang akon sapyud; dalhon ko sila sa idalum subong sang kapispisan sang mga langit; silotan ko sila sono sa nabatian sang ila katilingban.

13Kailo sila, kay nagpalagyo sila sa akon! Kalaglagan sa ila, kay naglapas sila batok sa akon! Tubson ko sila, apang sila nagpamolong sing kabutigan batok sa akon.

14Wala sila magtuaw sa akon sa ila tagiposoon, kondi nag-owang sila sa ila mga higdaan; nagtilipon sila tungud sa uyas kag sa bag-ong alak, nagbato sila sa akon.

15Bisan gintudloan ko kag ginpabakud ang ila mga butkon, apang nagapadugi sila sing malain batok sa akon.

16Nagaliso sila apang indi sa yara sa hitaas; kaangay sila sang pana nga malimbongon, mapukan sa espada ang ila mga principe tungud sa kasingkal sang ila dila. Ini mangin-ila uligyat sa duta sang Egipto.

← Chapter 6 Jump to: Chapter 8 →