James 2

Ilonggo (Ang Biblia (1982))

← Chapter 1 Jump to: Chapter 3 →

1Mga kauturan ko, dili kamo magpasulabi sing mga tawo sa nagahimulat kamo sa paghuput sing pagtoo sa aton Ginoong Jesu-Cristo, ang Ginoo sang himaya.

2Kay kon magsulud sa inyo sinagoga ang isa ka tawo nga may mga singsing nga bulawan kag may maidlap nga panapton, kag magsulud man ang isa ka imol nga tawo sa panapton nga mahigko,

3kag may pagtahud kamo sa iya nga nagapanaput sing panapton nga maidlap kag nagasiling, “Lingkod ka diri sa maayong lingkoran,” apang nagasiling kamo sa imol nga tawo, “Tindug ka dira,” ukon, “Lingkod ka sa akon tiilan,”

4wala bala kamo sing may ginapasulabi sa inyo kaugalingon, kag manginhukom nga may malaut nga mga hunahuna?

5Pamati kamo, hinigugma kong mga kauturan. Wala bala pagpili-a sang Dios ang mga imol sining kalibutan nga magmanggaranon sa pagtoo kag mga manunubli sang ginharian nga ginsaad niya sa mga nagahigugma sa iya?

6Apang ginapakahuy-an ninyo ang imol nga tawo. Wala bala ang mga manggaranon nagapigus sa inyo, kag sila gid nagaguyud sa inyo sa corte?

7Wala bala nila ginapasipalahi ang dungganon nga ngalan nga sa sini ginatawag kamo?

8Kon nagatuman kamo sang harianon nga kasogoan, sono sa kasulatan, “Higugmaon mo ang imo isigkatawo subong sa imo kaugalingon,” nagahimo kamo sing maayo.

9Apang kon nagapasulabi kamo sing mga tawo, nagapakasala kamo, kag ginatagudilian sang kasogoan subong nga mga malinapason.

10Kay ang bisan sin-o nga magabantay sang bug-os nga kasogoan apang makasayup sa isa ka bahin manginmalinapason sia sini tanan.

11Kay ang nagsiling, “Dili magpanglahi,” nagsiling man, “Dili magpatay.” Kon wala ka magpanglahi kondi nagapatay, nanginmalinapason ka sang kasogoan.

12Gani maghambal kamo kag magbuhat subong nga mga tawo nga hukman sang kasogoan sang kahilwayan.

13Kay ang paghukom walay kalooy sa wala magpakita sing kalooy; walay sapayan ang kalooy nagadaug sa paghukom.

14Ano bala ang kapuslanan, mga kauturan ko, kon ang tawo nagasiling nga may pagtoo sia kag walay mga buhat? Makaluwas bala ina nga pagtoo sa iya?

15Kon ang utud nga lalaki ukon babayi hubo kag nakulangan sing kalan-on adlawadlaw,

16kag ang isa sa inyo nagasiling sa ila, “Lakat kamo sa paghidait, magpainitinit kag magkalabusug,” nga wala ninyo sila paghatagi sang mga butang nga kinahanglan sa lawas, ano bala ang kapuslanan sini?

17Amo man ang pagtoo, kon walay binuhatan, patay sa iya kaugalingon.

18Apang ang tawo magasiling, “Ikaw may pagtoo kag ako may mga binuhatan.” Ipakita sa akon ang imo pagtoo nga walay mga binuhatan, kag ako bangud sang akon mga binuhatan magapakita sa imo sang akon pagtoo.

19Ikaw nagatoo nga ang Dios isa; nagahimo ka sing maayo. Bisan ang mga yawa nagatoo—kag nagakurug.

20Buut ka bala nga makahibalo, O tawo nga buangbuang, nga ang pagtoo nga walay mga binuhatan patay?

21Wala bala si Abraham nga aton amay pagpakamatarunga paagi sa mga binuhatan, sang ginhalad niya ang iya anak nga si Isaac sa halaran?

22Imo nakita nga ang pagtoo nagahikot kaupud sang iya mga binuhatan, kag bangud sang mga binuhatan ang pagtoo ginhimpit,

23kag natuman ang kasulatan nga nagasiling, “Si Abraham nagtoo sa Dios, kag ginkabig ini sa iya nga sa pagkamatarung”; kag gintawag sia nga abyan sang Dios.

24Nakita ninyo nga ang tawo ginapakamatarung bangud sang mga binuhatan kag indi lamang bangud sang pagtoo.

25Kag sa among bagay si Rahab nga makihilawason wala bala man pagpakamatarunga bangud sang mga binuhatan sang iya pagbaton sang mga manugbalita kag ginpalakat niya sila sa liwan nga dalan?

26Kay subong nga ang lawas patay kon walay espiritu, amo man ang pagtoo patay kon walay mga binuhatan.

← Chapter 1 Jump to: Chapter 3 →