James 4

Ilonggo (Ang Biblia (1982))

← Chapter 3 Jump to: Chapter 5 →

1Diin bala magikan ang mga pag-inaway kag ang mga pagsinuay sa tunga ninyo? Wala bala ini magikan sa inyo mga lakas nga balatyagon nga nagainaway sa inyo mga bahin?

2Nagahamkon kamo kag wala ninyo maagum; gani nagapamatay kamo. Kag nagakahisa kag indi kamo makatigayon; gani nagasinuay kag nagainaway kamo. Wala kamo sing inyo, kay wala kamo nagapangayo.

3Nagapangayo kamo kag wala makabaton, bangud nga malaut ang inyo pagpangayo, agud nga mahinguyang ninyo sa inyo mga lakas nga balatyagon.

4Dimatutum nga mga tinuga! Wala bala kamo makahibalo nga ang pagpakig-abyan sa kalibutan pagpakig-away sa Dios? Busa ang bisan sin-o nga magpakig-abyan sang kalibutan nagahimo sang iya kaugalingon nga kaaway sang Dios.

5Ukon nagahunahuna bala kamo nga ang kasulatan nagahambal sa walay kapuslanan, “Nagahandum bala sia nga may kaimon sa espiritu nga ginpapuyo niya sa aton”?

6Apang nagahatag sia sing labi pa nga bugay; busa ginasiling, “Ginasumpung sang Dios ang mga bugalon, apang ginabugayan niya ang mga mapainubuson.”

7Busa magpasakup kamo sa Dios. Sumpunga ang yawa kag magapalagyo sia sa inyo.

8Magpalapit sa Dios kag sia magapalapit sa inyo. Tinloi ang inyo mga kamut, kamo nga mga makasasala, kag putli-a ang inyo mga tagiposoon, kamo nga mga duha sing hunahuna.

9Magkalisud kag maglalaw kag maghaya. Baylohi ang inyo kinadlaw sa paglalaw kag ang inyo kalipay sa kasubu.

10Paubsa ang inyo kaugalingon sa atubangan sang Ginoo kag bayawon niya kamo.

11Mga kauturan, dili kamo maghambal sing malaut batok sa isa kag isa. Ang nagahambal sing malaut batok sa iya utud ukon nagahukom sa iya utud, nagahambal sing malaut batok sa kasogoan kag nagahukom sang kasogoan. Apang kon nagahukom ka sang kasogoan, indi ka manugtuman sang kasogoan kondi hukom.

12Isa lamang ang manughatag sang kasogoan kag sia hukom, nga sarang makaluwas kag makalaglag. Apang sin-o ikaw bala nga nagahukom sang imo isigkatawo?

13Kari karon, kamo nga nagasiling, “Karon nga adlaw ukon buwas makadto kita sa sining banwa kag magpabilin didto sing isa ka tuig kag magpatikang kita kag mag-agum sing daug”;

14sing ugai wala ninyo mahibaloi kon ano ang sa buwas. Ano bala ang inyo kabuhi? Kay usbung kamo nga nagapahayag sa diotay nga tion kag niyan nagakawala.

15Sa baylo sina dapat kamo magsiling, “Kon buut sang Ginoo, magkabuhi kita kag maghimo sini ukon sina.”

16Subong nga amo, nagapabugal kamo sa inyo pagkamatinaastaason. Tanan inang pagpabugal malaut.

17Ang bisan sin-o nga makahibalo sang maayo buhaton kag wala nagabuhat sini, sa iya ini sala.

← Chapter 3 Jump to: Chapter 5 →