Philippians 1

Ilonggo (Ang Biblia (1982))

Jump to: Chapter 2 →

1Si Pablo kag si Timoteo, mga ulipon ni Cristo Jesus, Sa tanan nga balaan sa kay Cristo Jesus nga yara sa Filipos, upud ang mga manugtatap kag mga diacono:

2Ang bugay sa inyo kag ang paghidait gikan sa Dios nga aton Amay kag kay Ginoong Jesu-Cristo.

3Nagapasalamat ako sa akon Dios sa tanan ko nga pagpanumdum sa inyo,

4sa gihapon sa tagsa ka pangamuyo nakon tungud sa inyo tanan ginahimo ko ang pangamuyo nga may kalipay,

5nga nagapasalamat tungud sang pagpakig-ambit ninyo sa pagpauswag sang maayong balita kutub sang nahaunang adlaw tubtub karon.

6Kag nagasalig ako nga sia nga nagsugud sing maayong buhat sa inyo magahimpit sini sa adlaw ni Jesu-Cristo.

7Matarung sa akon ang pagbatiag sing amo tungud sa inyo tanan, bangud nga yari kamo sa akon tagiposoon, kay sa akon mga gapus kag sa pag-apin kag pagpalig-on sang maayong balita, kamo tanan kaambit nakon sang bugay.

8Kay ang Dios amo ang akon saksi, kon daw ano ang paghandum ko sa inyo tanan sa paghigugma ni Cristo Jesus.

9Kag ginapangamuyo ko nga ang inyo gugma magbugana sing labi kag labi pa gid, sa ihibalo kag sa bug-os nga pagtalupangud,

10agud nga mapinig ninyo ang labing maayo, kag magputli kamo kag walay kasawayan nga sa adlaw ni Cristo,

11nga napun-an sang mga bunga sang pagkamatarung nga paagi kay Jesu-Cristo, sa kahimayaan kag kadayawan sang Dios.

12Buut ko nga mahibaloan ninyo, mga kauturan, nga ang nahanabu sa akon hinonoo nanginsa kauswagan sang maayong balita,

13sa bagay nga ang pagbilanggo sa akon nahibaloan sa bug-os nga palacio kag sa tanan nga iban nga tungud ini kay Cristo;

14kag ang kalabanan sang mga kauturan ginapaisug sa Ginoo bangud sa pagbilanggo sa akon, kag nagamasidla sing labi pa sa paghambal sang polong sang Dios sa walay kahadluk.

15Ang iban matuud nagawali sang Cristo gikan sa kahisa kag sa kaawayon, apang ang iban gikan sa maayong kabubut-on.

16Ining naolihi nagahimo sini gikan sa gugma, nga nakahibalo nga nabutang ako diri sa pag-apin sang maayong balita;

17ang nahauna sa pagbahinbahin nagabantala sang Cristo, indi sa kahanuut kondi nagahunahuna sa pagdugang sing kasakit sa pagkabinilanggo nakon.

18Ano niyan? Lamang nga sa tanan nga bagay, kon sa pagkasalimpapaw ukon sa kamatooran, ginabantala si Cristo; kag sa sini nagakalipay ako.

19Hoo, kag magakalipay ako. Kay ako nakahibalo nga ini manginsa kahilwayan ko paagi sa inyo mga pangamuyo kag pagbulig sang Espiritu ni Jesu-Cristo,

20sono sa akon hanuut nga pagpaabut kag paglaum nga indi ako mahuy-an sa bisan ano, kondi sa bug-os nga kasidla subong sa gihapon karon man pakadakuon si Cristo sa akon lawas, bisan sa kabuhi ukon sa kamatayon.

21Kay sa akon ang pagkabuhi amo si Cristo, kag ang pagkapatay amo ang pagdaug.

22Kon ini manginpagkabuhi sa unud, ina nagakahologan nga mabungahon nga pagpangabudlay sa akon. Apang kon ano ang akon pilion indi ako makahibalo.

23Ako naipit gid sa tunga sang duha. Ang akon handum amo ang pagtaliwan kag pagpakig-upud kay Cristo, kay ina labing maayo pa.

24Apang ang pagpabilin sa unud kinahanglanon pa tungud sa inyo.

25Sa sining pagsalig, ako nakahibalo nga magapabilin ako kag magapadayon kaupud ninyo tanan, nga sa inyo kauswagan kag kalipay sa pagtoo,

26agud sa akon ang inyo paghimaya magabugana sa kay Cristo Jesus, bangud sang akon pagpakig-upud sa inyo liwat.

27Lamang maggawi kamo sing takus sa maayong balita ni Cristo, agud nga bisan magkara ako kag magpakigkita sa inyo ukon sa wala ako, makabati ako nahanungud sa inyo nga nagatindug kamo sing malig-on sa isa ka espiritu, sa isa ka painoino nga nagapanikasug sing tingub tungud sa pagtoo sang maayong balita,

28kag wala mahadluk sa bisan ano bangud sang mga kasumpung. Sa ila ini amo ang tanda nga maathag sang ila kalaglagan, apang sang inyo kaluwasan, kag ina gikan sa Dios.

29Kay sa inyo natugut ini nga tungud kay Cristo kamo indi lamang magtoo sa iya kondi man mag-antus tungud sa iya,

30nga may amo man kamo nga pagpakig-away nga inyo nakita kag karon ginapamatian nga yari sa akon.

Jump to: Chapter 2 →