Philippians 4

Ilonggo (Ang Biblia (1982))

← Chapter 3 Jump to:

1Busa, mga kauturan ko, nga hinigugma kag nahidlawan, akon kalipay kag purungpurung, magpakalig-on kamo sing amo sa Ginoo, mga hinigugma.

2Nagapangabay ako kay Eudias kag nagapangabay ako kay Sintique nga maghisugut sila sa Ginoo.

3Kag ginapakilooy ko sa imo man, totoo nga masigkamanugpangabudlay, buligi ining mga babayi, kay nagpangabudlay sila upud sa akon sa maayong balita upud si Clemente kag ang iban nga mga masigkamanugpangabudlay nakon, nga ang ila mga ngalan yara sa tolon-an sang kabuhi.

4Magkalipay sa gihapon sa Ginoo; sa liwat magasiling ako, Magkalipay.

5Ang inyo kalolo ipakilala sa tanan nga tawo. Ang Ginoo malapit na.

6Dili kamo maghimud-os sa bisan ano, kondi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay.

7Kag ang paghidait sang Dios, nga nagalabaw sa tanan nga paghangup, magatipig sang inyo mga tagiposoon kag inyo mga painoino sa kay Cristo Jesus.

8Sa katapusan, mga kauturan, ang bisan anong matuud, ang bisan anong halangdon, ang bisan anong matarung, ang bisan anong putli, ang bisan anong hiligugmaon, ang bisan anong dungganon, kon may diosnon nga gahum, kon may takus dayawon, painoinoha ining mga butang.

9Ang inyo naton-an kag nabaton kag nabatian kag nakita sa akon, ini buhata; kag ang Dios sang paghidait manginkaupud ninyo.

10Nagakalipay ako sing daku sa Ginoo nga karon sa tapus ang malawig nga tion nagbag-o ang inyo pagdumdum sa akon; matuud nagpanumdum kamo sa akon, apang kamo walay kahigayonan.

11Indi nga nagayamo ako nahanungud sa kinawad-on; kay naton-an ko ang pagkacontento sa bisan ano nga kahimtangan ako.

12Makahibalo ako magpakakubus, kag makahibalo man ako magpakabugana; sa bisan ano kag sa tanan nga kahimtangan naton-an ko ang tinago sang pagkabusug kag pagkagutum, sang kabuganaan kag kinawad-on.

13Makahimo ako sang tanan nga butang sa iya nga nagapabakud sa akon.

14Walay sapayan maloloy-on kamo sa pagpakigbahin sa akon kapiotan.

15Kag kamo gid nga taga-Filipos nakahibalo nga sa pagpamuno sang maayong balita, sang nagtaliwan ako sa Macedonia, walay iglesia nga nagpakigbahin sa akon sa paghatag kag pagbaton kondi kamo lamang;

16kay bisan sa Tesalonica ginpadalhan ninyo ako sing bulig sing labi pa sa makaisa.

17Indi nga nagapangita ako sing dolot; kondi nagapangita ako sang bunga nga nagadugang sa inyo kaayohan.

18Ako nakabaton sang bug-os nga bayad, kag labi pa; puno ako, nga nakabaton kay Epafrodito sang mga dolot nga gikan sa inyo, maamyon nga dolot, halad nga kalahamut-an kag nahamut-an sang Dios.

19Kag ang akon Dios magahimuno sang tagsa ka kinahanglan ninyo sono sa iya kamanggaran sa himaya kay Cristo Jesus.

20Sa aton Dios kag Amay ang himaya sa katuigan kag sa katuigan. Kabay pa.

21Abiabiha ninyo ang tagsa ka balaan kay Cristo Jesus. Ang mga kauturan nga kaupud nakon nagaabiabi sa inyo.

22Ang tanan nga balaan nagaabiabi sa inyo, labi na gid ang sa panimalay ni Cesar.

23Ang bugay sang aton Ginoong Jesu-Cristo manginkaupud sa inyo espiritu.

← Chapter 3 Jump to: