Philippians 3

Ilonggo (Ang Biblia (1982))

← Chapter 2 Jump to: Chapter 4 →

1Sa katapusan, mga kauturan, magkalipay sa Ginoo. Ang pagsulat sa inyo sang amo man nga mga butang indi makatalaka sa akon, kag kalig-onan sa inyo.

2Mag-andam sa mga ido, mag-andam sa malaut nga mga manugpangabudlay, mag-andam sa manugkimpol.

3Kay kita amo ang circuncision nga matuud, nga nagasimba sa Dios sa Espiritu, kag nagahimaya kay Cristo Jesus, kag walay pagsalig sa unud.

4Bisan ako akon may katarungan sa pagsalig sa unud. Kon bisan sin-o pa nga tawo nagahunahuna nga may katarungan sia sa pagsalig sa unud, ako may labi pa:

5gincircuncidar sa ikawalong adlaw, sa katawohan sang Israel, sa kabikahan ni Benjamin, Hebreo nga natawo sa mga Hebreo; nahanungud sa kasogoan Fariseo,

6nahanungud sa kakugi manughingabut sang iglesia, nahanungud sa pagkamatarung sa idalum sang kasogoan disalawayon.

7Apang ang bisan ano nga sa akon sadto daug, ginbilang ko nga kadulaan tungud kay Cristo.

8Sa pagkamatuud ginabilang ko ang tanan nga butang subong nga kadulaan bangud sang labaw gid nga kabilyanan sang pagkilala kay Cristo Jesus nga akon Ginoo. Tungud sa iya gin-antus ko ang kadulaan sang tanan nga butang, kag ginabilang sila nga mga sagbut, agud nga maagum ko si Cristo

9kag makita ako sa iya, nga walay akon kaugalingon nga pagkamatarung nga gikan sa kasogoan, kondi ina nga paagi sa pagtoo kay Cristo, ang pagkamatarung nga gikan sa Dios paagi sa pagtoo;

10agud nga makilala ko sia kag ang gahum sang iya pagkabanhaw, kag makaambit sang iya mga pag-antus, nga manginkaangay niya sa iya kamatayon,

11agud nga kon mahimo madangat ko ang pagkabanhaw gikan sa minatay.

12Indi nga naagum ko na ini ukon nahimpit na ako; kondi nagapadayon ako agud ini mangin-akon, bangud nga ako nangin-iya ni Cristo Jesus.

13Mga kauturan, wala ako nagaisip nga ini akon na; apang isa ka butang ang akon ginahimo, sa ginakalimtan ko ang tinalikdan kag nagahimulat ayon sa naunhan,

14nagapadayon ako padolong sa lalambuton tungud sa padya sang mataas nga pagtawag sang Dios nga yara kay Cristo Jesus.

15Ang mga hamtong sa aton maghunahuna sing subong; kag kon sa bisan anong butang tuhay kamo sing panghunahuna, ina man ipahayag sang Dios sa inyo.

16Lamang maggawi kita sa nadangatan ta.

17Mga kauturan, magtingub kamo sa pag-ilog sa akon, kag pat-ini ninyo ang mga nagagawi sing subong sono sa huwaran ninyo sa amon.

18Kay madamu ang nagakabuhi subong nga mga kaaway sang cruz ni Cristo, nga nahanungud sa ila nagsugid ako sa inyo sing masunsun kag karon nagasugid sa inyo nga bisan may mga luha.

19Ang ila katapusan amo ang kalaglagan, ang ila dios amo ang tiyan, kag ang ila himaya yara sa ila kahuluy-an, nga nagatinguha sang mga butang nga dutan-on.

20Apang ang aton pagkabanwahanon yadto sa langit, kag gikan sini ginahulat naton ang Manluluwas, si Ginoong Jesu-Cristo,

21nga magabalhin sang aton kubus nga lawas nga manginsubong sa iya mahimayaon nga lawas, paagi sa gahum nga makapasarang sa iya bisan sa pagpasakup sa iya sang tanan nga butang.

← Chapter 2 Jump to: Chapter 4 →