Song of Solomon 1

Ilonggo (Ang Biblia (1982))

Jump to: Chapter 2 →

1Ang Ambahanon sang mga Ambahanon, nga iya ni Salomon.

2Pahaluka sia sa akon sang mga haluk sang iya baba! Kay ang imo gugma maayo pa sa alak,

3ang imo mga lana may kaamyon nga maayo, ang imo ngalan subong sang lana nga ginbobo; busa ginahigugma ka sang mga ulay.

4Buyoka ako, magalagas kami sa olihi nimo. Ang hari nagdala sa akon sa iya mga hulut. Magakasadya kami kag magakalipay sa imo; magasambit kami sang imo gugma labi pa sang alak; ginahigugma ka nila sing matarung.

5Maitum ako, apang maayoayo, O kamo nga babayi nga mga anak sang Jerusalem, subong sang mga layanglayang sang Cedar, subong sang mga kumbung ni Salomon.

6Dili magtolok sa akon bangud nga maitum ako, bangud nga ginbatok ako sang adlaw. Ang lalaki nga mga anak sang akon iloy nasingkal sa akon, ginhimo nila ako nga manugbantay sang mga ulubasan; apang, ang akon kaugalingon nga ulubasan wala ko mabantayi!

7Sugiri ako, O ikaw nga ginahigugma sang akon kalag, kon diin ka nagapahalab sang imo panong, kon diin ka nagapapahuway sini sa kaodtohon; kay ngaa bala manginsubong ako sa isa nga nagadalangdalang sa luyo sang mga panong sang imo mga kaupud?

8Kon wala ka makahibalo, O ikaw nga magayon gid sa mga babayi, lakat ka sa mga agi sang panong, kag pahalba ang imo mga tinday nga kanding sa luyo sang mga layanglayang sang mga manugpahalab sang carnero.

9Ginpaanggid ko ikaw, O hinigugma ko, sa kabayo sa mga kangga ni Faraon.

10Ang imo mga pisngi maayoayo nga may mga sinalapid nga bohok, ang imo liog may mga kolintas nga mga huluyason.

11Himoan ka namon sing mga salapid nga bulawan, nga may mga tampok nga pilak.

12Samtang nagalingkod ang hari sa iya latok, ang akon nardo nagapangamyon.

13Ang akon hinigugma subong sang isa ka binugkos nga mira sa akon, nga nahamtang sa tunga sang akon mga dughan.

14Ang akon hinigugma pinungpung nga mga bulak nga alhenya sa akon sa mga ulubasan sang En-gedi.

15Yari karon, magayon ka, hinigugma ko; yari karon, magayon ka; ang imo mga mata subong sang iya sang mga alimokon.

16Yari karon, magayon ka, hinigugma ko, sa pagkamatuud maanyag. Ang aton higdaan verde;

17ang mga balayan sang aton balay mga cedro, ang aton mga pagbo mga cipres.

Jump to: Chapter 2 →