Song of Solomon 7

Ilonggo (Ang Biblia (1982))

← Chapter 6 Jump to: Chapter 8 →

1Daw ano katahum sang imo mga tiil sa mga sandalia, O babayi nga anak sang principe! Ang imo matibunog nga mga paa kaangay sang mga huluyason, ang binuhatan sang mga kamut sang sampaton nga panday.

2Ang imo lawas kaangay sa matipolon nga tagayan nga wala ginakawad-i sing alak nga sinimbog. Ang imo hawak kaangay sa tinumpok nga trigo, nga napalibutan sing mga lirio.

3Ang imo duha ka soso kaangay sang duha ka tinday nga usa, nga kapid sang gasela.

4Ang imo liog kaangay sa torre nga tiposo. Ang imo mga mata subong sang mga ponong sa Hesbon, sa luyo sang gawang sang Bat-rabim. Ang imo ilong kaangay sang torre sang Libano, nga nagalantaw nayon sa Damasco.

5Ang imo olo sa imo kaangay sang Carmelo, kag ang bohok sang imo olo kaangay sang purpura; ang hari nabihag sa iya mga bunghay.

6Daw ano kagayon kag daw ano kaanyag sa imo, O hinigugma, tungud sa mga kalipay!

7Ini nga imo kataas kaangay sa palma, kag ang imo mga soso sa iya mga pinungpung.

8Nagsiling ako nga magasaka ako sa palma kag magakapyot ako sa iya mga paklang. Ang imo mga soso manginsubong sang mga pinungpung sang uvas, kag ang kahumut sang imo ginhawa kaangay sang mga mansanas,

9kag ang imo baba kaangay sang maayo gid nga alak nga nagadulhog sing matanlas sa akon hinigugma, nga nagadanlug sa mga bibig sang mga nagakatolog.

10Ako iya sang akon hinigugma, kag ang iya handum nayon sa akon.

11Kari, hinigugma ko, makadto kita sa latagon, magapabilin kita sa mga minoro;

12magakadto kita sing aga pa sa mga ulubasan, tan-awon naton kon nagpamukol na ang uvas kon nagbukad na ang mga bukol sang uvas kag kon nagpamulak ang mga granada. Didto ihatag ko sa imo ang akon paghigugma.

13Ang mga mandragora nagapangamyon, kag sa aton mga ganhaan yara ang tanan nga bagay sang bilidhon nga mga bunga, bag-o kag daan, nga gintigana ko sa imo, O hinigugma ko.

← Chapter 6 Jump to: Chapter 8 →