Song of Solomon 4

Ilonggo (Ang Biblia (1982))

← Chapter 3 Jump to: Chapter 5 →

1Yari karon, magayon ka, hinigugma ko, yari karon, magayon ka! Ang imo mata subong sang iya sang alimokon sa lipud sang imo takurung. Ang imo bohok subong sang panong sang mga kanding, nga nagaluko sa kilid sang bukid nga Galaad.

2Ang imo mga ngipon kaangay sang panong sang mga oveja nga bag-o maalotan nga nagataklad gikan sa pagpanghugas, nga ang tagsatagsa may kapid, kag wala gid sing napatyan sa ila.

3Ang imo mga bibig kaangay sang nahut nga escarlata, kag ang imo baba maayoayo. Ang imo mga pisngi kaangay sang isa ka bilog nga granada sa lipud sang imo takurung.

4Ang imo liog kaangay sang torre ni David, nga ginpatindug nga talagoan sang mga hinganiban, diin nasab-it ang isa ka libo ka kalasag, ang tanan taming sang gamhanan nga mga tawo.

5Ang imo duha ka soso kaangay sa duha ka tinday nga usa, nga kapid sang gasela, nga nagahalab sa mga lirio.

6Tubtub nga magbugnaw ang adlaw kag magtaliwan ang mga landong, magakadto ako sa bukid sang mira kag sa bakolod sang incienso.

7Magayon ka sing bug-os, hinigugma ko; wala sing dagta sa imo.

8Upud ka sa akon gikan sa Libano, kinasal ko; upud sa akon gikan sa Libano. Maglantaw kutub sa putokputokan sang Amana, kutub sa putokputokan sang Senir kag Hermon, kutub sa mga palanagoan sang mga leon, kutub sa kabukiran sang mga leopardo.

9Ginbihag mo ang akon tagiposoon, utud ko, kinasal ko, ginbihag mo ang akon tagiposoon sang isa sang imo mga mata, sang isa ka kolintas sang imo liog.

10Daw ano kagayon sang imo gugma, utud ko, kinasal ko! Daw ano kaayo pa sang imo gugma sang sa alak, kag ang kaamyon sang imo mga lana sang sa tanan nga bagay sang mga pahumut!

11Ang imo mga bibig, O kinasal ko, nagatolo subong sang uludlan sang dugus; dugus kag gatas yara sa idalum sang imo dila; ang baho sang imo mga panapton kaangay sang baho sang Libano.

12Katamnan nga nalikupan amo ang akon utud, kinasal ko, tuburan nga natakpan, tuburan nga pinat-inan.

13Ang imo mga tugdo amo ang katamnan sang mga granada nga may bilidhon nga mga bunga, ang alhenya nga may mga tanum nga nardo,

14ang nardo kag azafran, calamo kag canela, pati ang tanan nga kahoy sang incienso, ang mira kag aloes, pati ang tanan nga ali nga mga pahumut—

15ikaw tuburan sang mga katamnan, bobon sang mga tubig nga buhi, kag mga sapa nga nagailig gikan sa Libano.

16Pagmata, O amihan, kag kari, ikaw habagat! Huyup sa akon katamnan, agud nga ang iya mga pahumut maggowa. Magsulud sa iya katamnan ang akon hinigugma, kag magkaon sang iya bilidhon nga mga bunga.

← Chapter 3 Jump to: Chapter 5 →