1 Thessalonians 1

ibibio

Jump to: Chapter 2 →

1Bọọd, Saidas ye Timoti, Enọ etob esọk ufọkabasi mbon Tesadonika ke Abasi Ete ye Abọọñ Yisọs Krais. Mfọn ye emem aba ye ndufo.

2Ñnyịn isikọọm Abasi afịd ini ke ntak afịd ndufo, inyʌñ isịn afịd ndufo ke akam ñnyịn.

3Afịd ini ñnyịn imisitoiyo ndufo ke iso Abasi Ete ke abaña utom ndufo a-atooho ke mbuọdidem, akpọsọñ utom ndufo e-enamma ato ke ima, ye adibọ ke ime ndufo a-ademmeke ato ke idodanyen ke Abọọñ ñnyịn Yisọs Krais.

4Sia ñnyịn imidiọọñọ, nditọete ake Abasi a-amaaha, ibo ke anye imek ndufo,

5sia eti etob ñnyịn ikisañake ye ikọ inua ikpọọñ, ado ye adudu ñko, ye Adisana Sịbidịd ndin ye aditʌm nnịm ke akpanikọ ke esịd. Ndufo emediọọñọ naña ñnyịn ikidu uwem ke atu ndufo ke ntak iwuod ndufo.

6Ndufo emaikpebe ñnyịn ye Abọọñ, ikereke akpọsọñ ndutʌkkọ, ndufo emaebọ etob ke inemesịd a-Adisana Sịbidịd anọọhọ.

7Ndin ke ntodo ndufo ekappa edoñño uwọdñkpọ enọ afịd mme andinịm ke akpanikọ ke Masidonia ye ke Akaya.

8Etob Abọọñ atop awuọ ito ndufo idooho ke Masidonia ikpọọñ ye Akaya, mbuọdidem ndufo ke Abasi ediọọñọ ke afịd itie. Ke ntodo ñnyịn inieeghe aditañ ñkpọ ndomokeed aba mbaña anye,

9sia ammọ ke idem ammọ enọ mbʌk se ikitịppe ke utọ adidaara a-ndufo ekidaarake ñnyịn. Ammọ etañ naña ndufo ekappa ekeene Abasi, ekpọñ ndem, enam ñkpọ enọ ndu-ndu Abasi akpanikọ,

10ndin abet Ayịn Abasi a-atooho ke abio ubọọñ Abasi, a-anye akenamma aset ke ñkpa, a-adooho Yisọs, a-nyaañake ñnyịn asio ke ekamba ifiobesịd a-adiidi.

Jump to: Chapter 2 →